Presta gaitezen

Totalitaristen aurrean, kontzientziak agintzen dit mezu monoteista gezurtatzeko

Lotsarik gabe diote “desinformazioaren aurka” egin behar dela, eta beren “egiak” bideratzeko neurriek ez dute atzerapausorik.

0

Angel Bidaurrazaga Vandierdonck

Medikuntzan doktorea, EHUko irakasle ohia. Bilbo

Totalitarismoaren plandemiak ez du etenik. Etorkizun hurbilerako prestatzen ari direnaz jabetzeko, El Correok antolatutako Innovación y vacunas ARNm podcastaren bideoa ikustea besterik ez daukazue. Ordubeten zehar, botere faktikoen aurpegiak: prentsa (Vocento), etxe farmazeutikoak (Moderna), Osakidetza (txertoen arduraduna), osasungintzaren plangintza (Rafael Bengoa) eta botere politikoa (Jaurlaritzaren Osasun saila). Horiek dira mezu monoteistaren bozeramaileak, eta azken hiru urteetako ildoaren jarraipena iradokitzen dute, batere damurik gabe. Diskurtso osoa entzutea gogorra egin zitzaidanez, eta gaizki ez pasatzearren, hemen doa nire laburpen-bertsioa.

Hasteko, haien tesi nagusia, hau da: “Covida gainditua izan da txertoen bidez eta ez du albo ondoriorik eduki”. Gezur nagusi honen aurrean, ez dago eztabaidarik. Beraz, RNAm-an oinarritutako terapiarekin jarraitu beharra dago. Gainera, Modernaren ordezkariak aipatu zuenez, milioiak inbertitu dituzte ikerkuntzan, eta, beraz, “sendatzeko” (edo diru gehiago irabazteko) aukerak agorrezinak dira.

Penagarria da bertan agertzen diren medikuen morrontza. Pandemiaren esperimentuaren akatsik ez da aipatzen, eta bizitzaren medikalizazioaren orgia bat iradokitzen dute, gure immunitate naturala ez omen delako nahikoa datozkigun arriskuen aurrean (Herpes Zoster, Gripea, Ebola edo hurrengo pandemiak). Horretarako, nanoteknologia, genetika edo adimen artifiziala bezalako hitz ponposoak erabiliz, diru irabazietan eta iruzurrean oinarritutako ideologiaren ideiak zabaltzen dituzte, benetako zientziari eta ebidentziei kasurik egin gabe.

Lotsarik gabe, Bengoak aipatzen du desinformazioaren aurka egin behar dela (kasurako, Independentea, agian), eta bere “egiak” bideratzeko neurriek ez dute atzerapausorik. Beraz, hau ez da bukatu, presta gaitezen datorkigunerako.

Angel Bidaurrazaga Vandierdonck

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina, izen eta abizenez

Azken artikuluak