‘COVID 19ak 5 urte’ serieko artikulu guztiak esteka honetan
Pandemiari buruzko AEBko Kongresuaren txostena (I): Nola sortu zen COVID 19aren birusa
2024ko abenduaren 4an AEBn argitaratutako txostenaren lehen ondorioa hau da: Covid 19a eragin zuen birusa Wuhaneko laborategietan sortutakoa da. Eta nola heldu ziren aurkikuntza honetara? Txostenak dituen 580 orrialdeetako lehen ehunetan azaltzen da nola burutu zuten ikerketa, elkarrizketak eta mezu elektronikoak arakatuz. Eskuetan daukadan txostena automatikoki itzulita dago eta, askotan ingelesezko pasarteak baditu ere, ziur naiz kazetari presturen batek liburu bat edo gehiago argitara ditzakeela honen inguruan, Naomi Wolfek Pfizer paperekin egin duen moduan.
Hasteko, birologian adituak diren zientzialarien (Andersen doktorea eta beste batzuk) 2020ko kezkak ageri dira. Izan ere, haietako batzuek Sars-Cov-2 birusaren azterketan manipulazio zentzuak ikusi zituzten; Furina lotura bat, adibidez, naturan sortzea ezinezkoa iruditu zitzaiena. Berehala, 2020ko otsailaren 1ean, online bilera bat egin zuten argitalpen bat adosteko. Batzar horretan Fauci doktoreak parte hartu zuen, alergia eta infekzioen ikerketa-buru moduan. Fauci elementu gakoa izan da pandemiaren iruzurrean. Txostenean hainbat aldiz agertzen da eta Joe Biden presidenteak bere agintaldiko azken egunean aurre-indultu bat eman zion, hau da, jaso dezakeen zigorraren aurretiko babesa. Dena den, ikertzaileek aurrera jarraitu zuten eta 2020ko martxorako Nature aldizkarira idazlana bidali zuten. Baina lantaldeko partaide batek ez zuen lan hura onartu, “konspiranoikoen“ ideia bat zelakoan. Beraz, beste aldizkari batera bidali zuten argitalpena, nahiz eta, lana argitara zezaten lortzeko, nolabait onartu behar izan zuten saguzarretatik ere etor zitekeela birusa.
birus patogenoagoak lortu nahi zituzten, ondoren babes-neurriak eta tratamenduak garatzeko
Eta zer dela-eta sartu zituzten saguzarrak kontu honetan? Goazen azaltzera. Goi mailako ikerketen elkarte batek, EcoHealth Alliance deiturikoak, Wisconsinen dagoen birusak ikertzeko zentro bateko ikerketa-proiektu bat garatu zuen, Wuhaneko birusetan espezializatutako laborategi baterako. Ikerketa horren finantzaketa AEBko osasun ikerketarako diru-funtsetatik zetorren (3,5 milioi dolar) eta proiektuaren ardura Peter Daszak doktorearena zen. Dirudienez, Txinako kobazuloetako saguzarren birus erreserborioak ikertzen ari ziren koronabirus mota batzuen gain funtzioak lortzeko. Gain funtzioaren definizioak ezberdinak dira elkarrizketatutako ikertzaile edo ikerketa-buruen arabera; batzuek diote funtzioen hobekuntza bat dela eta beste batzuek diote birus “indartsuagoak” lortzeko dela. Orrialde askotako elkarrizketan, nabaria da norberaren erantzukizunak edo ardurak saihesteko gogoa. Eta hori zergatik? Bada, dirudienez, Wuhanen bertan esperimentu batzuk egin zirelako Sars-Cov-1 motako koronabirusak manipulatuz eta arratoi “humanizatuetan” txertatuz, bere hilkortasun handia baieztatzeko. DIFUSE deituriko ikerketa programa baten barruan, birus patogenoagoak lortu nahi zituzten (gerra biologikorako?), ondoren babes-neurriak eta tratamenduak garatzeko, baina manipulatutako birus haietako batek, Sars-Cov-2 koronabirusak, “istripuz” laborategitik kalera ihes egin omen zuen, pandemiari hasiera emanez.
egunetik egunera berri eta ikerketa gehiago argitaratzen dira iruzur mundiala salatuz
Nabarmenak izan dira “hanka sartzea” estaltzeko ikerketa-buruen aldetik egindako ahaleginak; kontrol txostenak atzeratuz, semantikarekin aldrebestatutako irizpideak erabiliz erantzunetan, mezu elektronikoetan erroreak berariaz eginez (adibidez, Eco%elath idatziz EcoHealth beharrean) edo txinatarrei errua botaz. Benetan txalogarria da AEBko Kongresuko Batzorde horretako ikerlarien grina lehen lerroko termino zientifikoak ulerrarazteko eta, haiek esan bezala, AURKIKUNTZAK azpimarratzeko. Ez dut uste gure euskal edo nafar legebiltzarretan halako grina inoiz edukiko luketenik, pandemiari buruzko ikerketa bat egitea lortuko balitz.
Gaur egun, Covid plandemiako erabakien inguruko ikerketa bat eskatzen dugunok oso gutxi gara, ikusi besterik ez dago Hego Euskal Herriko udaletxeetan aurkeztutako mozioekin gertatu dena. Baina, egunetik egunera, berri eta ikerketa gehiago argitaratzen dira iruzur mundiala salatuz, beraz, auskalo zer gertatuko den hilabete batzuen buruan. Hala ere, zoritxarrez, beranduegi izango da hildako eta gaixo ugarirentzat.
