Tesiak pilatuz hazten dira jakintzaren papermendiak. Garaiera haiek, Himalaiakoak bezala, arrotzak zaizkio bizitzari. Papermortu hotzotan nahieran hegaldatu daiteke Gogoa, baina euskarri fisikoari atxikita, behar arruntenen menpe; arnasa, jana, edana, epeltasuna… Behar zaharkitu horiek nonork hornitu behar ditu.
Zenbat eta libreago gogoa, Sherpa-Expres hornikuntza zerbitzuen menpekoagoa gorputza. Hor nagusitzen zaio Jakindirua Jakinduriari.
Aurrekoen arrastoari jarraituz hurbiltzen dira dotoregaiak ilaran Jakintza ofizialaren paradisurako txartel eske. Umetan paperak metatzen jarri zituztenetik urrutiraino jaso dira jakintsugaiak, papermendian gora, aspaldi atzenduta lurrarekiko harreman zuzena. Paperak dena eusteko gaitasuna omen du, frogatu behar ez den artean, eta paperarekiko fedeak gidatzen ditu zuritasunaren distirak itsututa, betaurreko eta betondoko egokiak jantzita betiere.
Paperez eragiten du Jakintzak Lurrean eta paper bidez jasotzen Jakintsuak emaitza, ez dagokio berari emaitzaren lekukotza zuzena. Jarduna behe mailako langileei dagokie, haiek gauzatzen dute Papermendia eta Bizitzaren arteko talka, zelulosazko erroek etengabe zurrupatu behar dutelako mundu bizitik goimortutuak elikatzeko.
Denak gara deituak, baina gehiegi batzuk baino ezin dira iritsi Jakinmetaren gailurretara
Denak gara deituak, baina gehiegi batzuk baino ezin dira iritsi Jakinmetaren gailurretara. Oztopo asko gainditu behar dira aldapan gora; desbideraketak, ezintasunak, pasabide arriskutsuak eta bide luze malkartsua. Bidetik baztertuentzat kaskezur hautsezko porlanarekin eraikitako aterpetxeak daude, paperezko saihesbidez bide nagusiari lotuak, zenbat eta gorago orduan eta dotoreagoak. Hor nonbait doa gelditzen maldan gora jarraitu ezin duen jendea, ahalik eta mailarik jasoenean, baina betiere Jakinmetari atxikia, hondamendira amildu nahi ez baldin badu. Han hondoan pilatuta bizi da gehiengoa, zanpatuta; Papermendiari eusten, papergabeak.
Katedrak zorrotz zaintzen du, bide zurrunaren katebegiz katebegi, jendearen gorabehera. Adimen fina behar izaten da gailurretara gerturatzeko, baina garrantzitsuagoa da Jakintsuek jorratutako ildoak otzanki jarraitzea, uneko iritzi hegemonikoek zedarritutako bideari adi egotea, eta jarraibideak aztertuko dituzten guraso ponteko akademikoekiko ezagurtza.
Jakintza maila jasotzeak ez du tontoa sendatzen, justu kontrakoa baizik
Jakintza maila jasotzeak ez du tontoa sendatzen, kontrakoa baizik. Tximua gorago eta ipurdia ageriago. Harrotasunak, gas arinek bezala, igoarazten du Papermendian gora ergeltasuna, iragarki puzgarri bilakatzeraino sarri.
Dakitzaketenek gailurrean zizelkatutako tronuetatik dioskute nondik, nora, nola eta noiz den egokia azpitarron bidea.
Askatzailetzaren kate-dratikoek goitik ikusten dituzte munduko pribilegio eta zapalkuntzak eta zapalduon ordezkaritza eta defentsaz jabeturik dihardute geure alde, gobernatzen gaituztenean gobernua geu garenaren iritzian.
Beste jakintsuek, ordena egoki antolatuta dagoela dakitzaketenek, jakintsu askatzaileekin eztabaidatzen dute sutsuki elkarrekin afaldu eta gero. Guk, hemen behetik, bataren edo bestearen aldeko hautua eginez elkar egurtuko dugu, zirkuko hondarra odolez ongarritzeko.
Jakintza hain gora jasota, nahikoa dugu lainora begiratzearekin jakinminak asetzeko
Eta Papermenditik gora? Handik gora laino sabaia.
Geroz eta laino trinkoagoan lurruntzen ari da giza jakintza, paperaren astuntasunetik hegan.
Gizaki arruntenak ere ez du jada paperetan arakatzen ibili beharrik ezer jakin nahi duenean, nahikoa duelako lainora begiratzearekin jakinminak asetzeko.
Lainoen gainean gizaki Jainkotuak bizi dira, Jakinmetaren ifrentzutik azpi guztiak gobernatzen, goitik beherako jakintza eta behetik gorako jakindirua mugiarazten dituzten kateen jabe.
