Desobedientzia

Loti Ezkerraren itzartze nagia

Sumatu da arnasaldia joan den astelehenean. Ia mila dira Telegram taldean parte hartzen ari direnak, ez da ere ahuntzaren gauerdiko eztula

1

Asel Luzarraga

Euskal idazle anarkista. Mundaka

Ez naiz kazetaria eta, beraz, ez daukat objektibotasun plantak egin beharrik. Hortaz, hasiko naiz esaten astelehenean, Espainiako gobernuaren neurri errepresibo berriak eta Eusko Jaurlaritzak ezarritako are errepresiboagoak indarrean sartu eta ordu batzuetara, Katalunian antolatzen ari zenaren berri izan nuenean, aspaldi galdutako itxaropenak ongarri apur bat jaso zuela. Zortzi hilabetez egon zen lo Loti Ezkerra, eta hasi zen pixkanaka nagiak ateratzen. Aurreko erabateko itxialdian protestak nondik etorri ziren eta ezker mugimenduen otzantasun eta diziplina mugagabeak ikusita, aire freskoa izan da astelehenean, urriak 26, Katalunian sumatu zen arnasaldia. “Contra el toc de queda i la privació de drets” zioen deialdirako kartelak. Hala, Kataluniako Desobedientzia Kolektiboa talde sortu berriak, laster zabaldu zuen adierazpen bat.

Deialdia, antza, ezker mugimendu independentistek egin zuten, eta harekin egin zuten bat talde eta banako anarkistek, antifaxistek eta desobedienteek. Haiek bildu zituen adierazpenak argi uzten ditu biltzeko izan dituzten zioak eta, beraz, ez naiz haiekin luzatuko. Esan behar dut uneotan ia mila direla Telegram taldean parte hartzen ari direnak, ez da ahuntzaren gauerdiko eztula, ez Loti Ezkerraren eguerdiko hasperena. Iritsi zaidanaren arabera, 20:00etan jende gutxi zegoen Sant Jaume plazan bilduta, mossoek Ferran kalea itxi eta jendeari sartzea galarazi nahi izan ziotelako. Hala ere, azkenean azkar bete zen plaza. 20:30erako bazeuden mila lagun baino gehiago bilduta. Ezker independentistak zeraman pankarta, eta hitzaldi txiki bat egin zuen. Ondoren, Vía Laietanatik abiatu zen manifestazioa, eta 20:45 aldera ez zen inor geratzen Sant Jaume plazan.

Bartzelona, pasa den astelehenean, 2020ko urriak 26. Argazkia: Kristina D.

Bartzelonan ez ezik, beste hiri batzuetan ere bildu zen jendea, Mataron, behintzat, bai, askoz gutxiago izan baziren ere (hogeita hamar lagun inguru).

Manifestazio horrek diskurtso ofiziala apurtu du, de facto. Orain arte, neurrien aurkako protestetan nork parte hartu ere, euskal hedabideek muturreko eskuinaz hitz egin digu salbuespenik gabe (beste kontu bat da halako protestetan benetan zer motatako jende zegoen, Berlinen kazetari lana egiten joandako hango kontaktuek emandako oso bestelako datuak baitauzkat nik, esaterako). Kasu honetan, deitzaileak CUP eta ezker independentistako beste talde batzuk izanda, eta bat egindako asko anarkistak, zaila da desobedientzia zibileko ariketa hau mariukatzaileei eta marilurlauei egoztea. Bestalde, beste artikulu batean adierazi dut zein eroso diren halako epitetoak kondaira ofizialean, eztabaida serio oro errotik mozteko.

Ez daude bakarrik katalanak, ordea, eta zorionez. Biharamunean, urriak 27, asteartearekin, beste deialdi bat egin zen Cadizen, haren kasuan talde antifaxistek eta anarkistek zabaldua. Seguruenik ez da egin den bakarra, baina haiek iritsi zaizkit niri. Eta penintsulatik aterata, hau da Italian matxinatuta dauden hirien zerrenda, seguruenik eguneratu beharko dena: Ravenna, Erroma, Ostia, Terni, Trieste, Napoles, Milan, Latina, Modena, Ferrara, Treviso, Sirakusa, Catania, Verona, Bergamo, Lecce, Bari, Turin, Piacenza, Cremona, Cesenatico, Viareggio, Salerno, Palermo, Livorno, Pesaro, Rovigo, Pescara, Cervia, Belluno eta Vicenza.

Gure Euskal Herrietan ere, ezker abertzalearen ahots ofizialek neurri errepresibo are gogorragoak eskatzen zituzten bitartean, hasi dira ahots kritikoak altxatzen. Twitter ezertarako termometroa bada, esan behar dut azken egun bietan beste txio haserre, sumindu eta nekatu ez dudala lehenago ikusi euskaraz. Hemen ere desobedientzia antolatzen noiz hasiko galdezka hasi denik ere ez da falta. Ea El Salton José R. Loayssa Nafarroako familia-medikuak eta Ariel Petruccelli argentinar historialariak idatzitakoaren ildotik, gurean ere ezkerraren itxialdia apurtzerik daukagun ala ildo ofizialek eztabaidari uko eginda, ahotsak isiltzen jarraituko duten…

Kataluniako Desobedientzia Kolektiboa. Hasierako aurre-adierazpena. Itzulpena: Asel Luzarraga

Erantzun bat “Loti Ezkerraren itzartze nagia” bidalketan

Utzi iruzkina

Azken artikuluak