Gobernatzen gaituen olde aurrerakoiak zientzian eta materialismoan oinarritzen dela diosku. Ilustrazioaren distirak itsututa, suak sitsa bezala ari da gizartea erakartzen.
Jainkoaren karta eztabaida guztien hogeita hamaika eskutik izan den bezalaxe, edota iraultza proletarioa edo aberriaren aldaerak; argudio guztien gainetik Zientzia ezarri zaigu gaur eta bere aipamen hutsa hogeita hamaika erreala bihurtu da.
Eta, predikatzaile bakoitzak komeni zaizkion pasarteak aireratzen dituela jakinda, Zientziaren apostolu handi baten mandamenduetako bati helduko diot gaur eta ez edonondik hartuta gainera, geure dibulgatzaile zientifiko kuttunenen katixima bendeinkatutik baino, Guikipediatik alegia:
Newtonen hirugarren legea edo akzio-erreakzioaren legea
“Indar guztiak binaka gertatzen dira, eta bi indar hauek modulu eta norabide berekoak dira, baina aurkako noranzkoa dute”.
“Gorputz batean eragiten duen indar bakoitzeko, gorputz honek indar hori sorrarazi duen gorputzean indar berdina baina aurkako noranzkoduna egingo du (lege hau ez da betetzen indar magnetikoen kasuan). Bi gorputzek elkar eragiten dutenean, lehenengo gorputzak bigarrenean sortutako indarra, bigarren gorputzak lehenagoan sortutako indarraren berdina izango da magnitudean, baina aurkako norantzan.”
“Akzio-erreakzio indarrak eragiten dituzten adibide batzuk:
- Pertsona batek antzeko pisua duen beste pertsona bat bultzatzen badu, biak mugituko dira abiadura berarekin baina kontrako norantzan.
- Salto egitean lurra beherantz bultzatzen dugu, baina bere masa dela eta ez da mugitzen eta intentsitate berarekin bultzatzen gaitu gorantz.
- Txalupa baten gainean doan pertsona batek arraunarekin ura norabide batean bultzatzen du eta urak, ordea, txalupa kontrako zentzuan bultzatuko du.
- Ibiltzerakoan gure oinekin lurra atzerantz bultzatzen dugu, eta lurrak, ordea, gu aurrerantz bultzatzen gaitu.
- Gainazal batek bere gainean dagoen objektu baten gain eragiten duen erreakzio indarrari indar normala deritzo. Indar normalak gainazalerekiko norabide perpendikularra izango du.”
Hau hala bada, esaidazue, teknofededun progresistok, nora ote garamatzan lasterketa aurrerakoi zoro honek: aurreraka, atzeraka ala leherraraziko gaituen tentsio baterantz.
esaidazue, teknofededun progresistok, nora ote garamatzan lasterketa aurrerakoi zoro honek
Ez da izan nire ezagupen zientifiko exkaxa indarren arteko harreman honetaz gogoetatzera ekarri nauena, Txikung eta Taoismora egindako beste bixita turistiko magufo batzuk baino. Ez zaituztet horiekin aspertu nahi gaurkoagatik.
Baina, adi denarentzat, bide anitz dago honelako oinarrizko gaiak ulertzeko. Iñaki Segurolak Sed Quia Sua liburuan kontatzen du, gutxi gorabehera; behin Txirrita eta bere koinatua gurdi bat mugitu nahian zebiltzala, ezinean edo, eta koinatuak galdetu ziola ea mugitzea lortuko ote zuten eta Txirritak erantzun:
— Gurdia aurrera ala mundua atzera mugituko dizkiagu baina ez duk hor geldituko.
Harrapazank Neuton.
Eskerrik asko, Asier.
Indar “aurrerakoiak” bere lan atzerakoia eta suntsitzailea bikain burutzen ari dituk. Indar “atzerakoiak” zein erdipurdukako denak bezain ongi (zori txarrez), berberen aginduetara daudelako. Jarraitzaile sutsu, botante eta hiritarren gehiengo nabarmenak ezertxo ere ez du jakin nahi eta hau guztia salatzen ari garenok iraindu eta isiltzearekin nahikoa dute.
Agenda bakarra, aginte bakarra, helburu bakarra, baina bakoitzak bere papera. Herritarrak…
Errealitate gordinak ez diezaien bere titularrik hondatu. Kontuz!!
Eskerrik asko, berriz, Asier.