Euskararen aldeko iraultza eta iraultzaren aldeko euskara

Hona Maiatzak 1, Langileen esplotazioaren aurkako herriarteko eguna eta Aberri Eguna, Donibane Garazin ospatu ondoren herriBiltzak zabaldutakoa:

Eguerditan Herri Jantegiko taloak jan ondoren, Euskal Herri osora zabaltzeko Burujabetasunaren haziak erein genituen.

Ondotik, Filipe Bidart eta Eñaut Haritxelarrek, “1973-2023 Aberri Eguna Donibane Garazin; Duela 50 urte eta gaur, askapen nazionala eta soziala bateratzen” gaiaren inguruan, 60 pertsonen aurrean hitzaldia eman zuten.

Hitzaldiaren bukaeran, “herriBiltzaren deiadar hirukoitza” agiria irakurri ginuen (azpian doa) eta Ikurriñari xingola beltza lotu genion. Euskal Herritar guziei eta Euskal Herriko erakunde guziei, Pertur, Naparra eta Popo nun diren jakiteko Frantziar eta Espainiar Estatuek ahalegin guziak egin arte, Ikurriñari xingola beltza lotzea proposatzen diegu.

Jarraian, Bertsolerkiak egin genituen. Irakurritako olerkiak Xabier Silveira eta Eñaut Marikorenaren bertsoen gaiak izan ziren.

Eguna bukatzeko, euskara bigarren mailako hizkuntza bezala tratatzen duen euskarria irauli ginuen. Ekintza honen bidez, euskarak biziraun dezan, euskara bigarren mailako hizkuntza bezala tratatzen duten euskarriak iraultzera deitzen dugu eta Euskal Herriko eragile guziei, euskaraz lehentasunez aritzea eskatzen diegu.

herriBiltza

2023ko maiatzaren 2an

herriBiltzaren deiadar hirukoitza

Aberri Egun honetan, euskararen aldeko iraultzara deitzen dugu

Hizkuntza batek, bizitzeko, lurralde bat nun herritarrak lehentasunez hizkuntza horretan mintzatzen diren behar du.

Euskara hiltzen ari da, bere herrian ukatua delako eta bigarren mailako hizkuntza bezala tratatua delako.

Euskal Herriko eragile guziei, euskaraz lehentasunez aritzea eskatzen diegu.

Euskarak biziraun dezan, euskara bigarren mailako hizkuntza bezala tratatzen duten euskarriak iraultzera deitzen dugu.

Esplotazioaren aurkako herriarteko egun honetan, iraultzaren aldeko euskarara deitzen dugu

Euskara, langileen esplotazioa eta herrien zapalkuntza desagerrarazteko mintzaira izan dadila.

Maiatzak 1 honetan, “Nun dira Pertur, Naparra eta Popo?” galdetzen dugu

Aurten,

– Popo desagertu zenetik 40 urte beteko dira;

– Naparra desagertu zenetik 43 urte beteko dira;

– Pertur desagertu zenetik 47 urte beteko dira.

Oraino doluan gira.

Pertur, Naparra eta Popo iraultzaileak nun diren dakitenei, nun diren erraitea eskatzen diegu.

Frantziar eta Espainiar Estatuei, Pertur, Naparra eta Popo nun diren jakiteko ahalegin guziak egitea eskatzen diegu.

Euskal Herritar guziei eta Euskal Herriko erakunde guziei, Pertur, Naparra eta Popo nun diren jakiteko Frantziar eta Espainiar Estatuek ahalegin guziak egin arte, Ikurriñari xingola beltza lotzea proposatzen diegu.

herriBiltza

Donibane Garazin, 2023ko Maiatzak 1