herriBiltza

1973 eta 2023an Aberri Eguna Donibane Garazin

Duela 50 urte eta gaur, askapen nazionala eta soziala bateratzen.

2

Odei Etxeberri Bimboire

Burujabetza kolektiboen aldekoa. Behorlegi

Hona hemen herriBiltzak maiatzaren lehenerako egiten duen deialdia:

Esplotazioaren aurkako herriarteko eguna + Aberri Eguna = Maiatzak 1

1886ko maiatzaren lehenean Chicagon langile anarkista batzuek esplotazioaren aurka hasitako borrokaren ondorioz, egun hau esplotazioaren aurkako herriarteko eguna bilakatu zen.

Gure iritziz:

  • Munduaren eta Euskal Herriaren egoera sozial, kultural, ekologiko eta politiko oso kezkagarriaren jatorrian, emakumeen eta oro har langileen esplotazioa dago;
  • Hemen eta munduan, Estatu zapaltzaileek, beren hizkuntzak eta beren gobernatzeko erakundeak inposatuz, herriak zapaltzen dituzte langileak esplotatzeko;
  • Ondorioz, askapen nazionalerako eta askapen sozialerako borrokak batera doaz.

Langileen esplotazio sistema mundu mailakoa denez, soilik herrien arteko elkarlanarekin esplotazioa eta herrien zapalkuntza desagerrarazten ahalko ditugu.

Nagusiak eta langileak batera ezinak dira.

Langileak esplotatzen dituenak, ez ote du bere burua herritik kanpo ezartzen?

Herria, ez ote da munduko langileriak Euskal Herrian hartzen duen izena?

Herria, ez ote da nazioak Euskal Herrian hartzen duen izena?

Ez da Maiatzak 1 internazionalik naziorik gabe.

Ba ote da naziorik Internazionala gabe?

Aberria, ez ote da gaur arte biziraun duen herria?

Internazionalismoa, ez ote da herriartekotasuna?

Internazionalismoa, ez ote da aberriartekotasuna?

Maiatzak 1, Aberrien Eguna?

Gure aburuz:

  • Abertzale izatea, euskaraz mintzatzea edota euskara ikastea, langileen esplotazioaren aurka jardutea, gure burua gobernatzeko erakunde burujabeak eraikitzea eta frantziar eta espainiar estatuen agintariek gauzatzen duten gure herriaren zapalkuntzari aurre egitea delako;
  • Aberria ospatzea, euskara, langileen esplotazio eza, gure burua gobernatzeko erakunde burujabeak eta herriaren erresistentzia ospatzea delako;
  • Langileen esplotazioaren aurka eta herrien zapalkuntzen aurka ber unean jardun behar delako;
  • Abertzaletasuna eta internazionalismoa bereizezinak direlako:

Langileen esplotazioaren aurkako herriarteko eguna eta Aberri Eguna maiatzaren lehenean ospatzera deitzen dugu

herriBiltza

Baigorrin, 2023ko apirilaren 15ean

Aberri Eguna

1973 Donibane Garazin 2023

Duela 50 urte eta gaur, askapen nazionala eta soziala bateratzen

Maiatzak 1 Donibane Garazin

(merkatu estalian, parkean, Gaztetxean eta Peña Urkulun)

13:00-15:00 Herri Jantegia: Talo eskaintza, Buruaskitasunerako Baratzeen hazi mahaia, Hausnartzen liburu mahaia, trikitixa, txalaparta…

14:30 Ereitea: Burujabetasunaren Haziak erein eta Euskal Herri osora zabaldu.

15:00 Hitzaldia: 1973-2023 Aberri Eguna Donibane Garazin; Duela 50 urte eta gaur, askapen nazionala eta soziala bateratzen. Filipe Bidart eta Eñaut Haritxelar.

16:30 Bertsolerkiak: Irakurritako olerkiak bertsolarien bertsoen gaiak.

Duela 50 urte Aberri Eguna Donibane Garazin

Aurreko belaunaldiak sortutako Enbata mugimenduari ez nahiko erradikala eta ezkertiarra izatea leporatu zion IK sortu zuen belaunaldiak. Gazte horiek 1973ko Aberri Eguneko ekitaldiak antolatzen parte hartu zuten, Enbata mugimenduarekin batera. Han islatu ziren bi belaunaldien arteko desadostasunak. Hitzaldi politikoari Ipar Euskal Herriko egoera ekonomikoari buruzko gogoetak eta aldarrikapenak txertatu zizkioten, eta hori ez zuen begi onez ikusi Enbatak, erranez Aberri Eguna eta Maiatzaren Lehena bereizi behar zirela.

IK sortu zutenak 1968ko maiatzaren giroan hezitakoak ziren, eta “burges txikiak” eta “eskuinekoak” izatea leporatzen zioten Enbatari. IK-k bere burua ezkertiar eta iraultzaile gisa definitzen zuen.

Aldarrikapen sozialari zegokionez, IK-k bat egiten zuen garai hartan, Europan eta munduan gaindi zeuden mugimendu iraultzaileekin, eta kapitalismoaren kontrako aldarrikapenekin. Ipar Euskal Herriko egoera ekonomikoa bera ere egoera politikoarekin eta kulturalarekin lotzen zuen. Frantziako Gobernuak aurreikusitako Lurralde Antolaketa ereduaren arabera, Ipar Euskal Herria turismora bideratutako eskualde bat izango zen. IK-k ez zuen onartzen dena turismora bideratzea, horrek bertako herritarren lan egoera kaxkarra eragingo zuelako: lana udan soilik, baldintza txarretan, laborantza eta arrantza krisian, industria garatu gabe, barnealdearen hustea, gazteek Euskal Herritik kanpo joan behar lan bila eta abar.

Ildo horretan, beren lehen agerraldi publikoa Baigorri eskualdeko lan gatazka bati lotutakoa izan zen: 1973ko abenduaren 11n, La Rosée elbarrituentzako Bankako (Nafarroa Beherea) zentroko zuzendaria eskuz zanpatu zuten, langileen aldarrikapenei muzin egiten ziela salatuz. Lan gatazkatik harago, ekintza harekin “Lana herrian” aldarrikatu zuten, Ipar Euskal Herri barnealdeko egoera ekonomikoaren larritasunean arreta jarriz. Horrela, “Herriak bizi behar du” izan zen IKren lelo nagusia.

(Gertakari historikoetan sakontzeko ikus aunamendi.eusko-ikaskuntza.eus/eu/iparretarrak/ar-69068/).

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

2 erantzun “1973 eta 2023an Aberri Eguna Donibane Garazin” bidalketan

  1. Lehen esplotazioa, seguru, duela 7000 urte gertatu zan Sumeria,. Patriarkatuaren eskutik,
    Maiatza 1 guztien aurretik.

    .

  2. Noiz gertatu zan Hura?

    Ez datza misteriorik un… Data eta eguna ezagutzen diren.

    Zehazki, apaiz gizonezkoek apaiz emakumezmoa jaitziarazi zutenean ZIGURAT dorretik, eta beraien esku hartu zutenean IZAR edo ASTURUEN BEHAKETA.

    Egun horrexetan sortu zen PATRIARKATUA.

    Noski, gizonezkoen ahalduntzea prozesu luzea
    izan zan.

    Lehenik, oraindik apaiz zirela, Tigris eta Eufratesen kanalizazio lanen kargu hartu zuten;
    Eta gero gerlari profe bihurtu SEMITEN INBASIOEN aitzi.

    Emakumezkoek 2.000 urte luzeko erresistentzia izan zuten Patriakatuaren aitzi, borroka armatua barne.

Utzi iruzkina, izen eta abizenez

Azken artikuluak