EBko Justizia Auzitegiak dio medikuak ez zeudela Covid txertoa preskribatzera derrigortuta

‘COVID 19ak 5 urte’ serieko artikulu guztiak esteka honetan

Disidentziako albisteak

Ezin dut jasan aspalditik euskal hedabideetan dagoen zentsura eta, horregatik, azkenaldi honetako notizia batzuk aipatuko ditut jarraian:

Europar Batasuneko Justizia Auzitegiak 2025eko urtarrilaren 30ean argitaratutako epai batean adierazi du txerto baten merkaturatzeak ez dituela medikuak behartzen farmako hori beren gaixoei agintzera. Nahiz eta txertoak Europako Medikamentuen Agentziaren (EMA) baimena eduki, horrek ez ditu medikuak derrigortzen txertatzeko agindua betetzera. Hortaz, epai horrek indargabetu egiten ditu hainbat sendagileri mediku elkargoek zein osasun zerbitzuek inposatutako zigorrak. EMAk Covid txertoari emandako baimena larrialdi egoera baten eraginez emandakoa zen eta, beraz, ez ziren txertoen ondorio kaltegarriak behar zen moduan ikertu. Horregatik, txertoa ez jartzea erabaki zuten sendagileek haien oinarrizko printzipioa (Primum non nocere) ondo bete zuten, farmako horren seguratsuna ez baitzegoen bermatuta.

Pazienteen osasuna babesteak ez luke delitu izan behar

Epai horren harira, Albaceteko (Espainia) Alejandro Alonso Jareño erizainari epaileak arrazoia eman dio. Erizain horrek txerto esperimentala emateari muzin egin zion sendagile baten agindua betetzeari uko eginez. Bere bizipenak liburu baten argitaratu ditu: De covidiota a negacionista. Espero dezagun aurtengo irailean Santurtziko erizainari berdin gertatzea eta epaileak errugabea dela aitortzea. Pazienteen osasuna babesteak ez luke delitu izan behar.

Europa mailan, North taldeak kanpaina bat hasi du eta EMAri eskatu dio Comirnaty (Pfizer) eta Spikevax (Moderna) txerto genetikoen segurtasunari buruzko datuak publiko egin ditzala. Zehazki eskatzen dutena da PCR teknikaren bidez DNA arrastoak bilatzea txerto mota horietan, baita RNAm kopuruak eta beste konposaketa batzuetako osagaiak (nanolipidoak) ere. 2023an, ikertzaile independente batzuek DNA molekulak aurkitu zituzten txerto marka horietan eta, beranduago, beste ikerketa batzuek ere osagai horren mekanismo biologikoak aurkitu zituzten, turbo-minbizien jatorria azalduko luketenak. DNA molekula horien giza jatorriak ahalbidetzen du gure giza genoman integratzea eta spike proteina kaltegarriak ekoizteko ahalmena etengabekoa izatea gaixo batzuen kasuan. Lehenago ere EMAri beste 900 eskari egin zitzaizkion arazo hori argitzeko, baina oraindik ez du erantzunik eman. North taldearen kanpaina berrian, norbanakoez gain elkarteei ere eskaerarekin bat egiteko dei egiten zaie.

AEBko zortzi estatutan debekatuta daude RNAm-an oinarritutako txerto genetikoak: Washington, Montana, Idaho, Texas, Tennessee, Florida, Hego Karolina eta Kentucky dira estatu horiek.

Amerikako Estatu Batuetako (AEB) gobernuan osasun arloko ardurak Covidaren disidenteak hartzen ari dira. Oro har, gauza jakina eta publikoa da Robert Kennedy Jr-k osasun idazkaritzaren ardura hartu duela (senatuko bozketan 52 aldeko eta 48 kontrako bozkarekin), aurtengo otsailaren 13an. Bere asmoen artean dago autismo kasuen tasa jaistea; orain dela 20 urte 10.000 umetatik batek garatzen zuen autismoa eta gaur egun 35 haurretatik batek. Kennedyren curriculumean Merck eta beste konpainia farmazeutiko batzuen kontrako epaiketak daude. Covidaren kasuan, Fauci doktorearen kontrako salaketa egin zuen Kennedyk, Faucik ivermectina eta hidroxiklorokina farmakoak blokeatu zituelako eta gaixotasuna sendatzeko edo prebenitzeko bide bakartzat txerto genetikoak utzi zituelako. 285 ikerketa daude aipatutako bi farmakoen ingurukoak, eta erakusten dute haien erabilpenak gaixotasuna sendatzea lortzen zuela kasuen %80n. Faucik, ordea, Remdesivir izeneko botika bultzatu zuen Covidaren tratamendurako, eta gaixoen hilkortasuna handitu egin zen. Txinan, aldiz, klorokinaren antzeko substantzia batekin askoz emaitza hobeak lortu zituzten eta bi hilabetetan gainditu zuten pandemia. Txinan, datu ofizialen arabera, milioi bat biztanleko 3 lagun hil ziren ustez Covidarengatik; AEBn, berriz, milioi bat biztanleko 2.200 hil ziren.

disidentzia zientziaren oinarria dela eta erakundeek sustatu duten sasi-zientziaren aurka egingo duela esan du Bhattacharya doktoreak

Beste disidente batek, Bhattacharya doktoreak, hau dio: disidentzia zientziaren oinarria da eta erakundeek sustatu duten sasi-zientziaren aurka arituko da AEBko Osasun Institutu Nazionalaren (NIH, ingelesezko siglak) zuzendari kargua hartzen duenean. Orain arte egin den diskurtso ofizialaren aurka agertu zen aspaldi Bhattacharya doktorea, itxialdiak eta hartutako beste neurriak gogor kritikatuz, Great Barrington Adierazpenaren sinatzaile bezala. Dokumentu horretan, zaurgarriak bakarrik babestu beharra eskatu zuen, eta beste guztiek libreki jarrai zezatela haien bizitzarekin. Oinarrizko zientzia kontuan hartuz, txertaketa orokorraren kontra agertu zen. Bere ustez, NIH erakundea guztiz ustelduta dago, Bigfarmaren eraginpean. Bhattacharyaren ondoan, beste kritiko batek, Makary doktoreak, FDAren zuzendaritzarako proposatu du bere burua; ez du lan makala izango FDAren izen ona berreskuratzen. Lehenik opioideen inguruko baimenak, ondoren gantz naturalenak, gero ivermectinarenak eta azkenik txerto genetikoenak; ugariak izan dira konpainia farmazeutikoen aldeko ebazpen okerrak, sasi-zientzian oinarrituak hain zuzen. Makary famatua izan da erabaki horiei kontra egiteagatik. FDAren diru-iturri nagusia Bigfarma denetik, OMEren kasuan bezala, medikuntzaren ustelkeria nabarmen agertu da. Blind Spots (Puntu Itsuak) izenburudun bere liburuan, Makaryk azaltzen du dogmatismo medikuak zenbat kalte eragin duen osasun publikoan. Txertaketa orokortuaren kontra azaldu da bera, eta immunitate naturalaren alde.

AEBko Missouri estatuko epaile batek 24.000 milioi dolar eskatu dizkio Txinako estatuari, egindako Covidaren kudeaketagatik. Epaile horren ustez, Txinak estali egin zituen gaixotasunaren hasiera eta gizakien arteko transmisioa, horren berri eman zuten medikuak erreprimitu zituen eta babes-ekipoen bahiketa egin zuen, eta, ondorioz, mundu osoan kaosa zabaldu zen. Egindako epaiketan, epaileak Txinari egozten dizkio Missouriko hildakoak (20.000), 8.000 milioi dolarreko galerak, negozio ugariren itxiera eta osasun sektorearen kolapsoa. Sententzia betetzeko, Txinako aktiboak erabiltzeko eskatzen dio AEBko agintaritzari. Ikusteko dago zer egingo duen Trumpek.

Munduan pandemiaren kontakizuna aldatzen ari den bitartean, Euskal Herrian txerto genetikoak jartzen eta ostrukarena egiten jarraitzen dute

Eta Euskal Herrian zer? Iazko abenduan, Iparra sendagile eta osasungintzako profesionalen taldeak Nafarroako eta EAEko osasun arduradunei datuak eskatu zizkien txertaketaren ondorioen ikerketa epidemiologiko bat egiteko. Nafarroako osasun sailak erantzun du datu horiek lortzeko zailtasun handiak daudela eta lan handia dela esanez, eta bere webguneko estatistika publikoen zerrenda bidali dio Iparrari. EAEko gobernu autonomikoaren aldetik oraindik ez dago erantzunik. Bizitza plataformak EAEko legebiltzarreko osasun batzordearen aurrean pandemiari buruzko iritzia emateko aukera eskatu du; auskalo noiz emago dioten aukera hori. Munduan pandemiaren kontakizuna aldatzen ari den bitartean, Euskal Herrian txerto genetikoak jartzen eta ostrukarena egiten jarraitzen dute.