Berehala bururatu zait baraualdiaren berri ematea

Kalean topatu dot eguaztenean, “lan-tren-lo” nenbilela fite, – ez “gük nahi dügü”, baina… – eta pozarren trenari joaten utzi (artikulu honen bukaeran notatxo bat, beste artikulu askotarako ematen duen Euskotren “bizipenari” buruz).

“Joseba!” atera zait, pozarren, aspalditxo ikusi barik (entzun zenuen hemen Bitxialdiko garai ilun-ilunetan argi, diz-diz?), eta bostekoa.

Berehala etorri zait baraualdiaren barri emotea. Irriz hartu dau, pozik, laurogeitaka urteko Artxandako osagile naturistak.

Eta jarioan hasi jata kontari, iturri oparotik, umoretsu beti, begirada bizi-biziz.

Josebaren aite zanak (Gotzon Bidaurratzaga Lazpita, 1882-1971) Ayunoterapia liburua idatzi zuela, oso argia, eta bere (Josebaren) partez, Elosura eraman ditzagun ale batzuk, bai! Hamar minutuko solasaldi ederra eta gero agur egin dit. Jarraian bere seme Angel Bidaurrazagari, Independenteko lagun eta Euskarazko Barau Astea eratzeko taldean kide dugunari, deitu diot, eta baietz, ados, liburu hori eskaneatu eta zabalduko dugula hemen ere (laster), polito!

Idatzi hau dokumentatzeko bilaketan, Karmelo Bizkarraren El poder curativo del ayuno agertu zait orain, Karmelok ere Gotzon zena aipatzen duelako, euskal aitzindari naturistatzat. Eta biratxo hau burutuz oraingoz, gure Angelek berak aititeren artikulu bati buruz idatzitako beste puska bitxi hau, EHUren bidez, Argija kirijotz-alija, 1927an Bidauŕatzaga’taŕ Gotzonek sinatutakoa eta haren itzala gai hartuta.

Plaza Biribileko topaldi pizgarrian Josebagaz hitz egindakoetatik gogoan gorde gura dodazen batzuk hona:

• Anekdota, umorez ederto kontatua, bere estiloan: “geldi-jarri-ixil!” gorputzak, begiek, arnasak… barruan zeuzkan gaixoak oso ageriko zituen ­gizon eri hari lehen-lehenik Josebak esandakoak, aspaldiko kontsulta baten bulegoan sartuta, di-da. Limoi eta kafe hutseko baraualdi luzea agindu ei zion gero. Bete zuen gizonak, gogotsu. Osatzen hasi zen. Barne indarra, txo!
• Borondate handia behar omen, baraualdiari eusteko. Elosun alde izango doguz gizarte ohiturekiko isolamendua, eta, aldi berean, talde oso baten ekina dugula topagune hau. Elkar laguntza.
• Multigaixo kasuetan, benetan, baraurik berrogeialdia komeni, irmo, limoi/laranja hutsean ia. Gura dauenak, benetan, norberak osatzen dau burua. Medikua, lagun.
• Baraualdian zehar mingainaren kolorea aldatuz doa, eta huraxe, adierazgarri. Mingaina gorri bizi izan arte, garbitzen ari omen. Esan legez, berrogei egun inguru, horretarako. Animo, Elosukoa labur egiten bazaigu, etxean jarraitzea daukagu ondoren ;-)!
• Ez du jende guztiak baraualdi premiarik. Kalte, dana dala, ez dio inori eginen. Lasaitu naiz hori entzunda.

Uztailean izango dugun baraualdi esperientziaz beraz gain (egundo egin barik nago holakorik, premiarik sentitu bez; badakit, bai, onura ugari ekarriko digula pertsonalki eta herri gisa, hori ziur), Elosurako pizgarri nagusiak hauek ditut:

• Internetik eta (in)komunikazio gailurik gabeko inguru eta taldea izango gara. Zer ote dakar horrek elkarrekikoan, gaur egungo inguru muturreko teknologikoan?
• Euskara hutsezko taldea izango gara. Ze esamolde, ideia eta proiektu bitxibarri sortuko ote han, ezezagun ugariren arteko astebeteko elkarbizitza autoeratuan? Oso aukera gutxi ditugu holakoak!
• 2020tik aurrerakoak zartatutako jende ugari ibiliko da han, eta haren ondorioz pentsamendu interesgarri ugaritan sakondu dutenak. Buru-osagarri izango zaigu, eta medioei eta eguneroko “albisteei” sobera begira ez gaudenontzat, zer ikasi ugari espero dut, bai!
• Baraualdiak pausatzea eta barnera biltzea eskatzen eta errazten ei digu. On egin deigula, bizimodu hiperaktiboan pausaldia!
• Bilgune honen sorgune xelebrea: EBA (Euskarazko Barau Astea) non ernatua? Antza, 2022ko iraileko GiGi Mundialean!
• Barau astearen erdigunean 5 eguneko Gune Irekia izango dugu! Inoiz parte hartu dudan luzeena. Jakinmintxoa, zelan emango dugun.
• Ilusioa eta esperantza, astebeteko barau eta hustasun horretatik zer sortuko den etorkizunerako.

EBA (Euskarazko Barau Astea), Elosuan (Bergaran) uztailaren 21 eta 27 artean, abian dogu jada ;-)!

Hemen informazio zehatzagoa eta izena emateko modua. Informazio gehiagorako hona idatz dezakezu: baraualdia@proton.me

Bide on!

* * * * *

Euskotreneko pantailetako bideoak. Beste gai bat, luzerako emoten dau horrek. Iruzkin laburra luzatu egin zait 😉

Beti dauzkagu tren gehiago, bai, lasai utzi joaten! Hauteskunde kanpainaurretik prezio erdian, gainera, zakuka gizakiak harat-honatzeko, zerbitzari, deslai, zentzun barik; burua garbitzeko ez-kuntza etxeetara, hainbeste gazte ere, lanerako, “arbeit”-erako, albait lehenen prestatzeko.

“Arbeit Macht Frei” kartel erraldoi argitsu haien gomutagarri (Levirena irakurtzen ari), bidaia propagandarako eta alienaziorako ederto baliatzen digute Euskotreneko arduradunek (jakina, bidaiari-bezero apalen ameto otzan eta argiaz. Gu geu ere erantzule, bai, sistema gara guztiok 🙁 .

Erreparatu diozu? Bidaia guzti-guztietan, goizeko 6etatik 23etara arte (asteburuko parrandetarako jartzen diguten gauerdikoetan baita ere, jakina!), trenetako bagoi bakoitzean pantaila ugaritan bideo nardagarri, amaiezin, distopiko hori pairatu dezakezu, Euskotrenen eskutik.

Begiari tinka heltzeko dago publi-adituek egina (ze laguntxuren txiringitoan? Zenbat ordaindua? Emanaldi bakoitzeko plusen bat hartzen ote, laguntxu horiek?) eta behin eta berriro, amaitu eta berrasi, egunero berdin-berdin, denak trenean uros, txukun, alai, irribarretsu, “eder”, moderno, interesgarri, demokratikoak. Hiritar “onak”. Eta guztiak zuri-zuriak (uste dut). Jatorrak, Jotarrak, Eajotarrak?

Gutxitan zapaltzen dozula gotorleku higikari hori? Ez diozula erreparatu suplizio eguneroko derrigorrezko horri? Beharbada trenean sartu eta atera arte, esmarfoneko txepelkeriek eta distrakzioek gogoa zurrupatuta, norbere pantaila pribatuari zilborrestez lotu-lotuak  gabiltzanetako beste bat zeu ere 😉 ?

(Tira, norbera salbu, telegram taldean ibili ohi naz aktibo, azken jakingarri ezinbestekoa edo meme-lo-rik argiena konpartitzen, mundua konpontzen 😉 )

“Arbeit Macht Frei”, ei zeukaten zapaltzailerik anker eroenek idatzita (Levik dio), handi-handi, paria pairatzaile gixajo haien barruetan ondo sakon “tatuatzeko”. Gixajoak, ideia ezin makurrago horren propaganda saihetsezinpean, askotan ke eginda zeruratu arte!