Urtarrilak 26 astelehenean, arratsaldeko 19:00etan, Groseko Okendo Kultur Etxean, Ahoztar Zelaieta (ikerketa-kazetaria) eta Josema Azpeitia (gastronomia-kazetaria) hizlari arituko diren hitzaldi-eztabaida egingo da, hain zuzen ere Basque Culinary Centerrek (BCC) berrikuntza gastronomikoaren itxura otzanaren pean sustatzen duen elikadura eta negozio eredua eztabaidan jartzeko.
Ahoztar Zelaietak egindako ikerketen arabera, BCCren negozio-eredu publiko-pribatua euskal elikagaigintza nazioarteko gastronomia merkatuetan integratzeko “traktore” edo bultzatzaile nagusi bat da. Horrenbestez, erakunde publikoen eta Europako diru-funtsen bidez eskuratutako 1.100 milioi euro baino gehiago Fundazio horrek nahiz enpresa laguntzaileek Basque Culinary Centerren ereduaren baitan sustatutako hainbat programa eta makroproiektutara bideratu dira, besteak beste Okendo Aldeko orube publikoa okupatuz GOe izenarekin (“Gastronomic Open Ecosystem”) ezarri duen elikadurari buruzko ikerketa-zentro teknologikoa eraiki eta abian jartzeko. Honi dagokionean, diru-laguntza publiko horietako batzuk zehaztuta Ahoztar Zelaietak hitzaldian aurkeztuko duen Power-Pointa atxikita bidaltzen dizuegu. GOek bandera gisa darabilen “gastronomia eta digitalizazioa”ren arteko fusioaren xedea, berriz, garapen teknologikoak azkartuz FoodTech arloan enpresa berrien sorrera bultzatzea eta Culinary Centerrekin aliatuta dauden elikagai-industria eta janari-banatzaile handien hedapena laguntzea da. Ahoztar Zelaietak, era berean, agerian uzten du elikagaien industriako berrikuntzaren inguruan Basque Culinary Centerrek haizatzen duen “Culinary Nation” delakoaren ideologia Israelgo “Startup Nation” deiturikotik datorrela (1).
Josema Azpeitia gastronomia-irakaslea izan zen Basque Culinary Centerren eta gogor salatu du, joan den uztailean, BCCk munduko zabor-janariaren marka ezagunenak biltzen dituen “Errestaurazio Markak” deituriko elkartearekin izenpetu duen aliantza. Hots, “elikadura osasungarria eta jasangarria” sustatzeaz hitzegiten duen bitartean, BCC fundazioa aliantza horrekin “elikagaien kolonizazioaren eta globalizazio gastronomiko ikaragarrienaren eragile bihurtu dela” azpimarratzen du Josema Azpeitiak, “Basque Culinary Centerrek zabor-janariaren alde apustu egin du” artikulu argigarrian (2).
Horregatik antolatu dugu hitzaldi hau, guri behintzat geroz eta irentsi-ezinagoa suertatzen zaigun BCCren negozio eta elikadura eredua eztabaidan jartzeko asmoz. Arazoa, azken batean, honako hau da, Ahoztar Zelaietak ohartarazten duenez: “Nork diseinatzen du janariaren etorkizuna eta nork finantzatzen du?”
Hori dela eta, Donostiako hainbat gizarte-taldek antolatutako hitzaldi-eztabaida honetan parte hartzera dei egiten dugu, Manteoko lurzoruaren ondare publikoa espoliatzeagatik BCC-GOeren eraikuntzak herritarren artean eragindako gaitzespen zabalari eta joan den urrian egindako mobilizazioari jarraipena emanez. Zuen parte hartzea espero dugu beraz, baita zuen inguruan deialdia zabaltzeko eskatu ere. Kartela atxikita doa.
Antolatzaileak: Satorralaia, Manteo Bizirik, Haritzalde, Uliako Auzo Elkartea
Harremanetarako telefonoa: 695715510
ERREFERENTZIAK:
(1) Ahoztar Zelaieta: La cara oculta del turismo gastronómico: 1.100 millones públicos para el modelo Basque Culinary Center (Napike) / Riqueza privada, financiacion pública: los problemas del modelo de innovación del Basque Culinary Center (elsaltodiario).
(2) Josema Azpeitia: El Basque Culinary Center apuesta por la comida basura (Ondojan aldizkari eta webgunea)
ATXIKITAKO DOKUMENTUAK:
