Ehun bertsotara plazan jokatuko duten egunaren zain, leprosoekin batera, gaurkoan 2021eko abuztu beroaren 12 hartan internet bidez zabaldutako bertso epiko hau jaso nahi izan dugu, sasoi hartan Independentearen jarduera etenda zegoelako ez baitzen behar zen garaian jaso.
Kaixo Felix, ni naiz lesakarra,
txakurra deitu zizuna,
modu polita ez zela aldez
aurretikan jakituna;
baña lortu dut, bai lortu ere
horrekin bilatzen nuna,
eztabaidari bide eginez,
hona nere erantzuna:
Dena ez dela ongi egina
ez da hausnarketa txarra.
Kazetariek zabaldu duten
bertsio bat ta bakarra,
zalantzan jarri ezina bera,
ez al da bitxi xamarra?
Zertara dator ados ez dena
ixilarazi beharra?
Zuk telebistan, irratietan
eta egunkarietan
lau haizetara zabaldu duzu
beldurra modu denetan,
sentiaraziz bizitza bera
beldurgarria benetan,
eta iaz hil ziren adina
hil zen aurreko urteetan.
Donostiako ospitaleko
ZIUek nolako sona
hartu duten zu zaren ezkero
bertan buru den gizona.
Bapatean, aitx!, gogoratu dut,
han larri gaixo dagona,
eta zu niri bertsoak jartzen
ze gusto txarreko broma.
‘Burua martxan ipini eta
errespetuan hitz egin’;
erabat ados naukazu, Felix,
zuk botatako hitzekin.
Antolatu zen eztabaida bat
euskal zientzilariekin,
zu gonbidatu, ta azaldu ez,
eta hori gu ezjakin.
Negazionista diozunean,
argudiotan urria
gelditzen zara, nahiz ta iraina
ez den taktika berria,
gaitza inorrek ez du ukatzen
baina bere jatorria,
isolatu ez den birus bat da?
Ze igerlek igerria?
PCR-a diagnosian
erabiltzeko hautua,
nik bezain ongi dela dakizu
maltzurkeriz gauzatua,
hola nahieran darabilzue
intzidentzi metatua,
egoera bat marrazteraino
arras manipulatua.
Gorritu gabe aipatze hutsa
asintomatikoena,
lehen algara ta gero datoz
haserrea eta pena,
mediku batek ez ote daki
ume batek dakiena,
ez dela inoiz gaixoa izan
sintomarik ez duena?
Txerto esaten diozun horrek
zer du? Barruan zer dakar?
Ez du sendatzen, ez du babesten
ta hainbat ondorio txar
sortzen ari da,
nik ez dut sartu
baña hartu zure bizkar
-idatziz noski- ardura oro
ta txertatuko naiz bihar.
Zuk badakizu farmakogintzak
gutxi daukala ‘santa’tik…
Iaz Espainian 600 milioi
medikuek hauengandik
jaso zituzten —publikoa da—,
nik horrexegatik dakit.
Euskal Herrira zenbat iritsi
ote dira hoietatik?
Nahiz ni ez naizen zientzilaria,
bertsolariak bagara,
entzuten ez den ahotsarentzat
bozgorailu eta aba.
Juanjo Martinez mediku eta
zirujau sonatua da,
bion arteko eztabaidara
animatuko al zara?
Hitzak zer duen helburu, haren
baitan da edo ez irain,
noski ni ez naiz nere burua
zuritzen hasiko orain.
Ulertzeko gai bazara, xapo!
ta bertzela ere bikain,
gaizki esanak barkatu eta
zure erantzunaren zain.
P.D.
Komunikabideetan jangoikoa zara,
ni, berriz, leproso bat; alde handia da.
Gure erronka bertso-erronka’re bada,
jeisteko prest bazaude zerutik plazara
jokatu genezake ehun bertsotara.
Asko eskertu genituen bere unean bertso hauek, gure herrikideen erdiak F. Zubiaren gisako “adituei” eta enparauei koipe-emaile eta uzki-milikari lanean ari zirenean, eta beste erdiak isil eta mutu, tartean bertsolari gehienak eta ia kulturgile guztiak.
Mila esker, Xabier Silveira!
Ainara! Ez banaiz erratzen berto hauek aspaldikoak dira. Mikel Altzuartek eta Silbeirak hasieratik aurpegia eman dute. Onintza Enbeitak modu koldarrean (nire ustez) zerbait idatzi zuen eta gainontzekoak isilik. Bertsolarirtaz gain, non egon dira borrokalariak? Abeslariak? (Sardui jauna askatasunaz hitz egiten duen horrek?) Politikari eta kazetari salduak? Herri honek zer den erakutsi du. Herri honen gainbeheraren zergatia orain ulertu dut.