Politikak beste parametro batzuk ditu Hanburgerlandian

Amerikako Estatu Batuen gorabeherak eta Uniparty-tarren hipokrisia

Maiatzaren 11n Gara egunkarian agertu zen artikulua irakurri dut, Tucker Carlsoni buruzkoa hain zuzen ere, Urtzi Urrutikoetxeak idatzitakoa, eta, zoritxarrez, gauza asko ez dira aipatu, baina behintzat euskaraz agertu da eta hori ez da gauza makala.

Lehenik eta behin, Estatu Batuetako politikak beste parametroak ditu. “Overtonen Leihoa” guztiz bestelakoa Hanburgerlandian. Zer ote da Overtonen Leihoa? Politikaren diskurtsoa da, une jakin batean biztanle gehien-gehienek onartzen dutena. Iritzi-eremu mugatuz kanpo dagoena, guztiz onartezina da. Betiko susmagarriek iritzi-eremu hori hertsiki kontrolatzen dute; narratiba alegia.

Euskal Herrian, osasun-zerbitzu publikoa, oraingoz behintzat, kontu ukiezina da. Zenbait arlotan aurrerakoiagoa da Euskal Herria USA baino. Zoritxarrez, Overtonen Leihoa eskuinerantz jotzen ari da leku guztietan, USAn batik bat. Beti zera esan dut bertako sistemari buruz: bai, bi alderdi daude. Horietako bat oso eskuindarra da, gerrazalea, osasun-zerbitzu publikoaren aurkakoa, eta beste alderdia errepublikarra. Ondorioz, honek esan nahi du errepublikarrak Gengis Khanen ideologiakoak direla.

Bi alderdi daude: horietako bat oso eskuindarra, gerrazalea, osasun-zerbitzu publikoaren aurkakoa; eta bestea alderdi errepublikarra, Gengis Khanen ideologiakoa

Tucker Carlson familia aberatsekoa da, Swanson afari izoztu famatuen familiakoa da, “telebista-afariak” (TV dinners) alegia. Hasieran, oso “Republican man“ azaltzen zen. CNN-n, MSNBC-n, etab. Hala ere, Irakeko gerragatik, apurtxo bat aldatu zen. USA pikutara doala garbi ikusten zuenez, zentzu guztietan, Estatu Batuetako gobernuak egiten zuena zalantzan jartzen hasi zen, ageri-agerian.

Urtzi Urrutikoetxeak ez du dena behar bezala kontatu, barkatu. Zuzenki, zergatik ote da Carlson hain “maitea“ estatubatuar askoren artean? Egia esan, demokrata gehiagok ikusten zuten bere saioa, Rachel Maddow hiperdemokrataren saioa baino!!! 

Erantzuna erraz-erraza da: beste ikusbegiak dituzten pertsonak ere agertzen ziren bere programan, komunikabide nagusietan gertatzen ez den bezala, Fox News-en barne. Esaterako, Jimmy Dore oso ezkertiarra da, baina, noizean behin, bera agertzen zen, gerraren aurkako informazioa ematen. Aaron Maté ezkertiarra agertzen zen, USAren azpijokoak Sirian azalduz. Glen Greenwald ere agertzen zen. 

CNN-k aurrerakoiarena egiten du, baina CIAko espioi ohiak edo jeneral ohiak dira bertako komentaristak. Baita MSNBC-n eta BBC-n ere. Fox News-ek atzerakoiarena egiten du, eta harro, baina gerra kontuetan, Carlsonen programan izan ezik, betiko iruzkingile militarrak eta gudazaleak izaten ditu, “aurrerakoiek“ bezalaxe. 

What??? Demokrata gehien-gehien-gehienak USAren Imperium-aren aldekoak dira. Eta sutsuak gainera!

Gauzak aldatu dira USAn. Niretzat, gaztetan, demokratak bakezaleak ziren, “usoak“. Republikarrak, ordea, zerri gerrazaleak ziren, “belatzak”. Egun, alderantzizkoa da egoera: demokrata gehien-gehienak gastu militarren aldekoak, baita errepublikarrak ere (McConnell, Lindsey Graham, Mitt Romney, etab.), baina, gezurra badirudi ere, errepublikar askoren artean, gastu militarrak zalantzan jartzen hasi dira (Marjorie Taylor Green UltraMAGAzalea??!!!, Thomas Massie, Rand Paul, etab.). What????? Hau da mundua, alderantzizko mundua! Demokrata gehien-gehien-gehienak USAren Imperium-aren aldekoak dira. Eta sutsuak gainera! Baseak nonnahi jartzearen aldekoak, Pentagonoari dirua erruz emanez, Siriako okupazioa zurituz, NATO etengabe bultzatuz, baita Asiaraino ere. Laster, Ukrainan bezala, Taiwanen ere. Chuck Schumer, senatari demokraten liderra, prest-prest dago gerra berriari ekiteko! Baita errepublikar asko ere, zer arraio, zer demonio! 

Bai, egia da, zenbait puntutan, Carlson oso eskuindarra da: ordezkapenaren teoriaren oso aldekoa, zoritxarrez. Betiko kontu errepublikarren aldekoa agertzen da beti (armak, gayak eta abortuak), Txinaren aurkako txorakeriak; hori bai, tamalez, baina beste zerbait badago.

Zergatik ez dute Fox-en izarrek Tuckerrek duen indarra? Esaterako, Sean Hannity, Laura Ingram eta abarrek? Erantzuna bistan da: ez dute sistema behin ere zalantzan jartzen . CNN-k, MSNBC-k, BBC-k edo ETBk ere ez. Azken saioetan, Carlsonek Estatu Batuetako eliteen aurkako gauzak garbi esan zituen. Bai demokratak, bai errepublikarrak jorratzen zituen. Uniparty delakoaren aurka, alegia. Guztiz onartezina! Neocon zerri gerrazaleak ere gogor kritikatu zituen. Politikarien hipokrisia, beren politikakeriak, agerian utzi zituen.

Estatu Batuen politika benetan aldatzeko, beharrezkoa izango da nolabaiteko koalizioak sortzea. Bai demokratak, bai errepublikarrak sistemaren jarraitzaileak dira. Egun, dena sakabanatuta dago USAn, dena taldetxo txikietan banatuta. Klasearen kontzeptua desagertu da eta horren ordez nortasun-politika(k) agertu da. Bitartean, goian daudenek, inor konturatzeke, nahi beste diru lapurtzen, herriak zapaltzen, gerrak zabaltzen dituzte. Noiz arte? Tucker Carlson bezalakoak eta benetako ezkertiarrak bat etorri arte, zenbait auzitan bederen, hala nola bakea, langileen eskubideak bermatzea eta abar.