Labrazako herriak, bere Administrazio Batzarreko presidentearen bitartez, Arabako Batzar Nagusietan agerraldia egin du Ingurumen eta Hirigintza batzordean, Labrazan eraiki nahi den zentral eolikoak herriarentzat izango duen inpaktu bortitza salatzeko. Izan ere, 200 metroko altuerako 8 aerosorgailuk osatutako zentral eoliko bat eraikitzeko asmoa dute Erdi Aroko hiribilduan, hainbat sari jaso dituen bere harresi famatutik oso gertu. Hasiera batean 8 aerosorgailu aurreikusten badira ere, aurrerago gehiago izango direlakoan gaude.
Agerraldian azpimarratu dute Labrazako herriak, kontzeju irekian, bere lurraldean halako industria eolikoa ezartzeari ezezkoa eman diola. Horregatik, zentral eoliko hori baimentzeak subiranotasuna eta autonomia urratzea dakarrela leporatzen diote arabar guztiena den administrazioari.
Labrazako Erdi Aroko hiribilduak muga urbanistikoak, energetikoak eta sozio-ekonomikoak ditu; kontzejuak duen babes-maila handia dela eta, debekatuta dago autokontsumorako plaka fotovoltaikoak jartzea teilatuetan. Murrizketa horiek ez dira inola ere aplikatzen proiektu industrializatzaile honetan, eta, goizetik gauetik, plan global zehatzik gabe, inposatu egin da. Izan ere, Ramiro González ahaldun nagusiari kargu hartu diote Batzar Nagusietan egindako adierazpenengatik, Labrazako zentral eolikoaren kokapena Energia Eolikoaren Lurralde Plan Sektorialaren barruan kokatzen zuelako, errealitateari muzin eginez.
Era berean, eremu natural hori babesteko eskatu dute, bere garaian Legebiltzar honetan bertan gehiengoz onartu zen Mugarri Planaren jarraibideei eta natura-ondarea, biodibertsitatea eta paisaia bikainak (horrela tipifikatuta daudenak) kontserbatzeko proposatutako estrategiei jarraiki. Estrategia horiek guztiz bateraezinak dira jurisdikzio honetarako proposatutako industrializazioarekin. Estrategia horiek Arabako Lurralde Historikoan energia berriztagarrien garapena antolatu eta arautzea dute helburu, aintzat hartuta gure lurraldeko Kapital Naturalaren kontserbazioa arriskuan ez jartzeko betebeharra eta etorkizuneko belaunaldiek ahalik eta ingurumenik naturalenaz gozatzeko duten eskubidea.
Zentral eoliko batek herriaren despopulazioa eragingo luke, horixe baita industria mota horiek dituzten eraginetako bat
Ildo horretan, adierazi dute azpiegitura hori Labrazan kokatzea ez datorrela bat Lurraldearen Antolamendurako Gidalerroekin (LAG); izan ere, gidalerro horiek aukera berrietan sakontzeko betebeharra ikusten dute, hala nola elikagaien segurtasuna, ekosistemen zerbitzuen zaintza, azpiegitura berdea, nekazaritza ekologikoa, banaketa-kanal berrien sustapena, teknologia berriak, turismoa eta abar. Aukera horiek lantzeak eremu horietan biztanleria finkatzea ahalbidetuko luke, beren nortasuna arriskuan jarri gabe. Labrazako herritik kilometro pasatxora dagoen zentral eoliko batek, herriaren despopulazioa eragingo luke, horixe baita industria mota horiek dituzten eraginetako bat.
Salaketen artean aipatzekoak dira gaur egun herrian indarrean dagoen Birgaitze Integraleko Plan Bereziak (BEPB) eta 57/2008 Dekretuaren bidez Multzo Monumental kategoriako Kultura Ondasun izendatzeak eragindako eraikuntza mugak. Adierazi dutenez, hainbat familia gaztek beste herri batera joan behar izan dute bizitzera, bi araudi horietako artikulu batzuen arau eta murrizketak direla eta.
Gainera, oinarrizko zerbitzurik ez dutela salatu dute, hala nola zuntz optikoa; hori bai, zuntz optikoa bai iritsiko zaiela proiektatutako aerosorgailuei.
Halaber, instalazioak sor dezakeen konpentsazio ekonomikoari buruzko ziurgabetasuna salatzen da; izan ere, Kontzejuei buruzko Foru Legeak ez die kontzejuei zergak biltzeko aukerarik ematen, eta beraz, kasu honetan, Oiongo Udalak izango luke onura. Iaz Oiongo Udalak Labraza eta Barriobustoko kontzejuekin indarrean zuen lankidetza ekonomikorako hitzarmena laburtu zuen, eta konpentsazio posible hori airean geratu da.
Gero eta babes handiagoa dute, besteak beste, Errioxako Kontseilu Arautzailearena eta Arabako Errioxako Upeltegien Elkartearena (ABRA), oso kezkatuta baitaude industria mota horrek Arabako Errioxan izango lukeen eraginarekin
Administrazio Batzordeak adierazi du gero eta babes handiagoa dutela, besteak beste, Errioxako Kontseilu Arautzailearena eta Arabako Errioxako Upeltegien Elkartearena (ABRA), oso kezkatuta baitaude industria mota horrek Arabako Errioxan izango lukeen eraginarekin. Otsailaren 17an, larunbata, bisita bat egin zuten, bertatik bertara, proiektuaren eragina jasango zuen eremura.
Ondorioz, Ramiro González ahaldun nagusiari eskatzen diote errespeta eta defenda dezala ingurumena babesteko eta lurraldea antolatzeko legeria, herri hau babesten duen heinean, eta errespeta dezala, halaber, Labrazako biztanleen erabakia, argi eta garbi utzi baitute bere jurisdikzioaren barruan halako industria-zentral bat ezartzerik ez dutela inolaz ere nahi.
Agerraldiak iraun duen bitartean, Administrazio Batzarrari babesa emanez, Labrazako eta Arabako Errioxako bizilagunek eta Arabako Mendiak Aske plataformako kideek elkarretaratzea egin dute Batzar Nagusien eraikinaren kanpoaldean.
Arabako Mendiak Aske, 2023-02-27
