Arabako Mendiak Aske herri-plataformak 2022ko abenduaren 28an Gasteizen plazaratutako prentsa-oharra:
Gasteizko Mendietako zentral eolikoei EZ, Labrazako zentralei EZ
Arabako Mendiak Askek zentral eolikoen tramitazioa gure lurraldean kudeatzeko modu ilegala, ez-legitimoa eta bidegabea salatzen du. Administrazio publikoak energia enpresen eskarien alde agertu dira, eta enpresa horiek dituzten planak aurrera eramateko prest agertu dira, natura eta landa-eremu zabalak industrializatzen jarraitzeko.
Horretarako, Ramiro González Ahaldun Nagusiak ez dio inolako oztoporik jarri Iberdrolari. Izan ere, Iberdrolak, Aixeindar enpresa medio (partehartze publikoa duena), Euskal Herriko birikak diren gure lurraldeko baso autoktonoez jabetu nahi du bere negozioak zabaltzeko.
Gaur Labrazaz eta Gasteizko Mendiez ari gara, baina zerrenda zabalagoa da. Komunikabideetan jakinarazi dute zentral horiek eraikitzeko baimena badagoela, nahiz eta oraindik alegazioak aurkezteko epea amaitu gabe eta ebatzi gabe egon. Ergeltzat hartzen gaituzte! Ez dugu onartuko!
Ingurumen legeak urratzen jarraitzen dute Iberdrolari baiezko erantzuna emateko
Aldundiaren azken txosten teknikoak Aixeindarren txostenarekin (lardaskeria hutsa dena) bat egiten du; aurreko txostena kontrakoa izanik eta urtebetez bulego batean gordeta izan dutelarik. Orain ingurumen legeak urratzen jarraitzen dute Iberdrolari baiezko erantzuna emateko.
Onartzen dute kalteak latzak eta oso larriak izango direla faunarentzat, bereziki hegazti harrapari oso babestuentzat, hala nola, arrano beltzarentzat, Bonelli arranoarentzat, miru gorriarentzat, ugatzarentzat eta sai arrearentzat. Gainera, aerosorgailuen instalazio eremua kritikotzat jotzen da sai zuriarentzat, 10 km baino gutxiagoko distantziara habia bat dagoelako; are gertuago daude mirotz zuriaren, arrano galtzadaren, gabiraiaren eta aztorearen habiak.
Hegazti migratzaileen igarobide garrantzitsua dela onartzen dute. Saguzarrei, landarediaren eta floraren lehentasunezko interes komunitarioko habitatei eta baso autoktonoei ere eragiten die; izan ere, duten inpaktu maila handia dela-eta, konpentsazio neurriak hartu beharko lirateke, eragindako eremuaren bikoitza landatu eta berreskuratu beharko delarik. Baso heldu bat beste leku batean sortu ahal izango balitz bezala, behin jatorrizkoa suntsitu ondoren.
Baso heldu bat beste leku batean sortu ahal izango balitz bezala, behin jatorrizkoa suntsitu ondoren
Era berean, aerosorgailuren bat geldiaraztea aurreikusten dute urteko aldi zehatzetan, eguneko une jakin batzuetan edo arrisku handiak eragin ditzaketen baldintza klimatiko edo ingurumen-aldagai berezietan. Natura 2000 Sareari eragiten dio Aldaiako Mendietako Kontserbazio Bereziko Eremuan (KBE).
Paisaian duen eragina ezin dutela ezkutatu diote, nahiz eta aerosorgailuak margotuz neurri batean konponduko litzatekeen. Ergeltzat hartzen gaituzte!
Soinuen eragina zentrala egin ondoren neurtu beharko dela diote, gutxienez urtebetez. Ergeltzat hartzen gaituzte!
Badakigu zortzi aerosorgailu horien atzetik beste hainbeste etorriko direla, inguru honetako lur-azalerak jasan dezakeen maximoraino. Beharrezkoa baino dimentsio askoz handiagoa duen proiektatutako azpiestazioak hala adierazten digu. Ergeltzat hartzen gaituzte!
Zentzugabekeria honen eraginpean dauden lurraldeak gobernatzen dituzten kontzejuak plan horien aurka agertu dira. Oso larria da Arabako Foru Aldundiak edo Eusko Jaurlaritzak kontzejuen esanak ez kontuan hartzea. Herrietan bizi garenok ez gaituzte aintzat hartzen, gure erabakiak ezkutatzen dituzte eta zapaldu egiten gaituzte. Ez dugu onartuko!
Landa-eremu biziak eta gure izateko moduaren erakoak nahi ditugu, horiek baitira lurraldeko pertsonok elikatzen gaituztenak. Gure ahotsak bizi garen lurraldetik hurbil dauden gobernantzen alde egiten du. Kontzejuak herri-erakundeak dira, mendeetan zehar erabakiak hartzeko zentralizazioaren aurrean beren burujabetasuna mantentzea lortu dutenak. Orain alde batera utzi nahi dituzue? Isildu nahi dituzue? Lurperatu nahi dituzue?
Mendiak arriskuan daude, eta haiek zaintzeko ardura duten erakundeak Galan jaunaren ageriko nahietara makurtu dira kasu honetan. Nahaste politiko honek, erregai fosilen gabeziaren konponbide gisa eskaintzen denak (trantsizio energetikoa deitua), antzinako jabetza komunalaren erregimenaren bidez kontserbatu ditugun baliabide natural apurrak suntsitu nahi ditu. Hori, jakin badakigularik energia berriztagarriek ezin dituztela funtzio berdinak bete. Orain pribatizatu egin nahi dituzte, espoliatzeko eta ustiatzeko, aukera bakarra eremu natural hauek suntsitzea dela esanez. Dena beraien diru-irabazi lotsagarriak handitzen jarraitzeko.
Dena beraien diru-irabazi lotsagarriak handitzen jarraitzeko
Ramiro Gonzálezen etikarik ezari bere lotsagabekeria batzen zaio, landa eta natur eremuak zatitzen dituzten proiektuen aldeko iritzia ematen duenean; izan ere, proiektu horiek Lurraldearen kontserbazioaren inguruan ezarri diren aginduak ez dituzte inolaz ere betetzen. Ahaldun Nagusiaren presioa erabakigarria izan da Ingurumen Saileko foru-teknikariek txosten hori kaleratu izan dezaten. Gaiaren larritasuna eta suposatzen duen espoliazio naturala kontuan hartuta, Ramiro Gonzálezen dimisioa eskatzen dugu, eta Gasteizko eta Labrazako mendietako zentral eolikoak geldiaraztea eskatzen dugu.
Bizitzaren aldeko apustua egiten dugu, erabakiak deszentralizatzearen aldekoa, natura eta landa inguruneko biodibertsitatea kontserbatzearen aldekoa eta tokiko proiektuen aldekoa; sorkuntza sakabanatua oinarri duten proiektuak, negozioa handitzea oinarri ez dutenak. Berriztagarriak bai, baina horrela ez.
Horregatik guztiagatik, urtarrilaren 14an arratsaldeko seietan Probintzia plazan egingo den elkarretaratzera deitzen dugu, bizitzaren oinarria den eta izaten jarraituko duen ondare naturala babesteko.
ARABAKO MENDIAK ASKE
2022/12/28
