Laborarien eskutik dator argi berria

Urte berri on Independentezaleei! Urte berria irekitzeaz gain, 2026ak ziklo aldaketa ere badakar, ikuspuntu ezberdinetatik. Ziklo berri honek osasuna, maitasuna, oparotasuna eta askatasuna ekar ditzala guztiontzat, magia aire batek lagundurik…

Eta dudarik ez da, garai aldakor eta ziurgabetasunez beterikoak bizi ditugu, inoiz baino distopikoagoak. Haatik, itxaropen argi izpi bat ikusten dut nik negu huntako zeruan. Frantzian, Ipar Euskal Herrian, beste herrialdeetan, munduan, jende anitz gaude bukatu berri den urte bukaeran laborariek hexagonoan hasitako protestaren bilakaerari adi. Testuingurua gogoratzeko, protestak hasi dira Frantziako gobernuak, abere batzuk gaixotu ondoan, behien Dermatosis Nodular Kutsakorra eritasunari aurre egiteko, etxalde batean kasu bat agertu bezain pronto behi talde osoa akabatzeko agindua eman duenean. Berehala indarrean jarri dute neurri indiskriminatua, eta agindupean dauden albaitariak joan dira behiak ehunka hiltzera, jendarte zabalean hunkipen handia sortuz. Pariseko bulegoetan, baserri mundutik urrun, sasi-zientzialari eta politiko interesatuek sindikatu-buru erosien oniritziarekin hartu dituzten neurri zentzugabe, oinarrigabe eta arriskutsuen kontra altxatu dira laborariak. Hasi dira, mehatxatutako baserrietan, laborarien eta abereen defentsa antolatzen. Laborarien ezinegonari muzin egin eta Macronek militarrak ehunka bidali ditu; punta-puntako tresneria, helikoptero eta guzti, baserritarren kontra, behiak hiltzeko helburuarekin.

DISTOPIAREN ENEGARREN AZTARNA

Gerrarako tresneria hiltzaileena, behien akabatzeko… Bizi garen distopiaren enegarren aztarna

Gerrarako tresneria hiltzaileena, behien akabatzeko… Bizi garen distopiaren enegarren gertakari honek, bulego erosoetako agintarien enegarren erabaki zentzugabe honek, bazterrak sutsuki inarrosi ditu. Laborariak beraien artean antolatzen hasi dira, urruneko bulego erosoetan dabiltzan laborantza sindikatuen ordezkari ofizialen kontsignei bizkar emanez eta egunero arazo berdinak, neurri eroak, bizi-baldintza latzak partekatzen dituztenen herrikide, lankide artean, borroka elkarrekin eramateko bat egiten eta antolatzen.

Asko ohartu dira ere, mundua kudeatzen dutenen egutegian, DNK gaixotasunaren agertzeak eta ondorioz behi taldeak masiboki hiltzeak bat egiten duela Europar Batasunean Mercosur merkatuari ateak handizki zabaltzeko hasitako laborantzaren suntsipenarekin.

DNKren agertzeak eta ondorioz behiak masiboki hiltzeak bat egiten du Mercosurri ateak zabaltzeko hasitako laborantzaren suntsipenarekin

Horrez gain, Parisek, egoera lasaitu nahian, eta berriz ere Big Farmako laborategien mesedetan, zientzialari salbatzaileengana jo du laguntza eske; berriz ere, aterabide magikoa atera dute kapelatik, abereen txertatze orokortua martxan jartzea, alegia… Dejavu… Indarrean jarri bezain laster, txertatze kanpainaren erabateko ezereztasuna nabarmen geratu da, izan ere, gertatu diren hainbat kasu txertatutako behi taldeetan izan dira. Dejavu 2.

Enegarren krisi sanitario honek eta, berriz ere, osasun sailaren neurri zentzugabeek sakoneko ezinegona sortu dute laborarien artean zein jendarte osoan. Goiz batez bere biziko lana eta egunero zaindutako ehunka behi tiroka akabatu izana eta horren inguruan ikusi diren egoerak, alegia laborarien etsipena, amorrua batetik, eta militarren indar erakustaldia bestetik…, horrek guztiak zerbait mugitu du. Egunero elikatzen gaituztenak alde batean, eta agintari eroen agindu krudelak asumitzen dituztenak, militarrak zein albaitariak bestean; hori da jendartean gelditu den aztarna.

ELKARTASUN UHOLDEA

Laborarien protestak elkartasun topaleku eta kokoteraino dauden herritarren eredu bilakatu dira

Horrek elkartasun uholdea eragin du. Laborarien protestak eta blokeoak, elkartasun topaleku bilakatzeaz gain, Europako eta Frantziako politikarien eromenaz kokoteraino dauden herritarren eredu bilakatu dira. Laborarien altxamenduarekin bat egiteaz gain, lan sail ezberdinetako jendeak, taxiak, garraioak, ostalariak, etab… hasi dira bakoitzak ere pairatzen dituen neurri zentzugabeak, lan baldintza jasanezinak salatzen…

Eguberriko oporretan, behi hilketek segitu dute hainbat baserritan, isiltasun izozgarri batean. Laborariek protestekin aurrera egin dute hainbat lekutan, blokeoak mantenduz eta eguberri bestak bertan ospatuz.

Orain denak gaude opor ondoari begira. Laborariek Paris gelditzeko eta protestak hexagono osoan gogortzeko eta biderkatzeko deia luzatu dute, eta gerta daiteke lan sail ezberdinetako langileek bat egitea protestarekin. Egun erabakigarriak dira hauek protestaren indarra eta jendearen elkartasuna ikusteko.

Azpimarratu behar da berriz ere hainbat hedabideren zein mugimendu politikoren isiltasuna. Isiltasun adierazgarria, jada ez harrigarria

Azpimarratu behar da berriz ere, agintarien kapelatik ateratako enegarren sasi-krisi honetan, hainbat hedabideren zein egitura edo mugimendu politiko, sindikal, sozial eta ekologikoren isiltasuna, baita abere babesleen isiltasuna ere. Jarrera mingarria berriz ere, isiltasun adierazgarria, jada ez harrigarria. Gero eta argiago gelditzen da bozgorailu politikoki zuzenak bilakatu direla aspaldi batzuk, eta, oposizio kontrolatuan, etiketa guayak banatzen eroso eta lasai egoten segitu nahi dutela beste batzuek. Dejavu 3.

GIRO BERRIA ORTZIMUGAN

Artikulu honetan dejavu asko aipatu ditudan arren, urte hastapen huntako argazkiari itxura berria, ezberdina ikusten diot nik enfoke ezberdinetatik. Zeru itogarri ikusezina hautsi balitz bezala. Laborariak, herritarrak, ohiko etiketa baztertzaileez harago, beraien artean batzen dituzten leloak lehenesten hasi dira, beldurrak urruntzen diren heinean. Ohiko eskemak, hierarkiak, hankaz gora jartzen ari dira mugimendu huntan, ohiko bozeramaile gezurti eta manipulatzaileak biluztuz eta normalean haserreetan eta beldurretan xahututako energia ekintzetara eta elkartasun deialdietara bideratuz. Mugimendua itotzeko, isiltzeko edo guttiesteko hedabideen zein politikoki zuzenen ahaleginek aldi huntan eragin guttiago dutela errango nuke, eta laborarien oihuak inoiz baino oihartzun handiagoa hartu du jendartean, aurreikusi ezin den elkartasun uholde potentea sortuz. Orain arte behintzat, haserreaz harago, lur langileen mugimendu hau ilusioa pizten ari da hainbat frontetan. Oinarrizkoak diren gaiak, elikaduraren subiranotasuna, elikagaien kalitatea, oinarrizko ogibideen defentsa, bizidunarekiko errespetua bezalako konzeptuak erdian jartzen ari dira, eta etengabe herritarrok itotzen, gaitzesten eta kontrolatzen gaituzten elitea eta horien soldado mozorrotuak hatz puntarekin zuzen destatuz eta mehatxatuz.

Kristalezko bolarik ez dut 2026ko urtarril hastapen huntan piztu den argi izpi ilusionagarriaren iraupena eta indarra neurtzeko. Baina sinistu nahi dut elitearentzat lanean dabiltzan igarleek ere lan zaila dutela aldi huntan, mamitzen ari den giro berriaren norabidea eta ondorioak asmatzeko.

Isil ditzagun beraz betiko prebisionista ilun eta ezkorrak eta piztu dezagun gure barne xinparta, denen artean ziklo berriari argi bizi eta indartsua ekartzeko!