Herri mugimenduen ahulgunea aurkitu dute botere faktikoek

Gaur egun, gizon eta heterosexual izatea gero eta zailagoa da. Gaur egungo gaizki deitutako feminismo faltsuarekin, gizon heterosexualak bortxatzaile eta tratu txar emaile gara de fakto, eta gure errugabetasuna lotsaz frogatu behar dugu. Badira feminista faltsuak esaten dizutenak horrela ikasiko dugula historian zehar azpiratuta eduki ditugula emakumeak, eta hemendik aurrera aldatu egingo dela hori. Nik eta guk, mundu honetan eta mundua orain den bezala jaio garen gizonok, jaio aurretik beste batzuek egindakoaren errua bagenu bezala; barregarria da. Benetako feminismoaren parte aktibo naiz, eta beti izan naiz, jaio nintzenetik programatutako ideietatik desprogramatzen joan naizen neurrian. Eta gizon gisa nuen betebehar feministari heldu nionean, inoiz ez nuen pentsatu mendekuan edo tortillari buelta ematean zetzanik auzia; borroka berdintasunagatik eta ekitateagatik zen. Europarra eta azal zurikoa ere banaiz, eta arrazakeriaren aurkakoa naiz, nire idealak gizaki guztien arteko berdintasuna eta ekitatea baitira, arraza, sexua, sexu-joera edo inori kalterik egiten ez dion beste edozein arrazoi kontuan hartu gabe.

Baina eliteak herri mugimenduen ahulgunea aurkitu du. Botere faktikoek, gizaki aberats nahasi, xelebre, berekoi eta psikopaten ehuneko irrigarri horrek; mundua nahi bezala menperatzen eta gobernatzen dutenek; teorian demokratikoak diren edo zuzenean antidemokratikoak diren erakunde guztiak kontrolatzen dituztenek, beren garroek dena harrapatzen baitute; horiek herri mugimenduen Akilesen orpoa aurkitu dute, mundu hobe, berdintzale eta orekatu baterako lanean ari ziren mugimendu eraikitzaileen ahulgunea, eta Troiako zaldiak nola, barrutik usteltzen dituzte boteredunek kolektibo herrikoi horiek, beren printzipio teorikoen kontrako mugimendu bihurtuz. Elite globalista totalitarioek herriaren zatiketa bilatzen dute: divide et impera, zatitu eta garaituko duzu.

ez zaie berdintasuna interesatzen, ezta ekitatea ere, horrek indarra ematen baitigu bat egiteko

Eliteei ez zaie berdintasuna interesatzen, ezta ekitatea ere, horrek indarra ematen baitigu bat egiteko eta mundua guztiontzat hobera aldatzeko, eta, beraz, are okerrago dena bereganatu nahi duten horientzat. Zer hobe mugimendu legitimo eta beharrezkoak aberrazio bihurtzea baino? Berdintasunaren eta ekitatearen ordez errugabeen kontrako mendekua, gizonen kriminalizazioa eta gizartea sexuen arabera banatzea bilatzen dituen feminismo faltsua, adibidez.

Eta hori gutxi balitz, oraindik zati gehiagotan banatzen dute jendartea; izan ere, gizonen eta emakumeen artean, badira joera sexualak, gay eta lesbianak, erabat zilegiak, eta garrantzitsua da haiekiko berdintasuna eta ekitatea aitortzeko borroka horren parte izatea. Baina, era berean, boteredunek mugimendu zuzen eta beharrezko horiek ere kolonizatzen dituzte, eta usteldu egiten dituzte, gay izatea autobarregarri geratzeko ariketa hutsal bihurtuz, kasu askotan. Esaterako, telebista-saio arrosetan gay xelebre eta erridikuluak jarriz homosexualen irudi faltsu bat saltzeko, edo haien joera exageraziora eta ia apologiara eramanez. Eta orain sexuen biderkatzearekin datozkigu: ez daude bi sexu eta bi sexu-joera bakarrik. Orain arte, nik nekienagatik behintzat, gizon eta emakume heteroak zeuden, eta emakume eta gizon homosexualak, hau da, lesbianak eta gayak, eta, kirurgian izandako aurrerapenekin, transexualak (a grosso modo esanda, sexu batetik bestera trantsitatzen duena okerreko gorputz batean preso egoteagatik). Niri, honaino, dena zuzena, errespetagarria eta defendagarria iruditzen zait, inor inola ere baztertua izan ez dadin.

zoritxarrez, etorkizun hurbilean suizidio edo nahaste mental larrien uholdea etorriko da

Kirurgiaren kasuan, ordea, informazio asko behar da. Ezin dugu hain arin hitz egin interbentzio hormonalei eta ebakuntza fisikoei buruz, atzera bueltarik gabeak baitira. Transexual batek bere bizitza osoan hormonatu behar du, eta hori ez da esaten, eta bizitza osoko beste albo-ondorio batzuk ere baditu. Izan ere, horiek onartu egin beharko ditu baldin eta aldaketak bere bizi-kalitatean mesede egingo badio. Ez dago nondik heldu sexu-aldaketa hain arin saltzearen kontua, eta are gutxiago adingabeekin, orain ikastetxeetan egiten den bezala. Ez dut uste oker nagoenik esaten dudanean sexua aldatzeko ebakuntza bat egin aurretik psikologiaren arloa kontuan hartzea oso garrantzitsua dela. Oinarri hartuta psikologia ez dela zientzia perfektua, lehenengo urratsa da adinez nagusia izatea subjektua, ez bakarrik urteetan, baita heldutasun psikologikoan ere, eta psikologo-talde oso kualifikatu batek zehaztu beharko luke, behin sexu-aldaketaren beharra bermatu ondoren, nola gauzatu ebakuntza operatu beharreko pertsonaren arrisku fisiko eta mental minimoekin. Sexuz aldatu diren pertsonen suizidioak ezkutatzen ari zaizkigu, horrek bizitza osorako dakartzan ondorioekin bizitzeko gaitasun nahikorik ez baitute. Horri gehitzen badiogu orain adin goiztiarrean hasi nahi dutela aldaketa horiek egiten, zoritxarrez, etorkizun hurbilean suizidio edo nahaste mental larrien uholdea etorriko da.

Intersexualitatearen gaia ez dut baloratuko, horri buruzko informazio asko falta zaidalako. Termino orokorra da eta afekzio ugaritarako erabiltzen da, pertsona bat jaiotzen den ugalketa- edo sexu-anatomia itxuraz anatomia femenino edo maskulinoaren definizio tipikoekin bat ez datorrenean. Soilik esan dezaket ebakuntza kirurgiko bat egiteko orduan lehen planteatu ditudan baldintza berak bete beharko liratekeela: adinez nagusi izatea eta heldutasun psikologiko nahikoa izatea, eta oso ondo prestatutako psikologo-talde batek bermatuta egitea ebakuntza, damu-arriskuak eta etorkizuneko ondorioak minimizatzeko. Eta nola ez, gainerakoan, kolektibo hori ere errespetatzea ezinbestekoa da. 

Edonola ere, oraintxe bertan, feminismoa bezala, homosexualitatea eta transexualitatea ere manipulatzen ari dira beren burua suntsitzeko, nahasmen soziala, liskarra eta zatiketa sortzeko, bizitzaren esparru guztietan askatasuna suntsitzeko eta, horrela, txotxongiloen modura gu erabiltzeko, imajinatu ezin den botere globala duten lau eroren onurarako. Bukatuko dut nire heterosexualitatea eta gizontasuna aldarrikatuz; horrela jaio naiz, harro nago naizena naizelako, eta nire eskubideak defendatuko ditut, emakume, homosexual eta transexualenak defendatzen ditudan bezalaxe, edozein dela ere haien eskubideak urratzen dituena.