Herri Jantegiak, herriBiltzak bere web gunean azaltzen duen bezala, “Denek janari osasungarria ukaiteko posibilitate berdina izan dezagun” ahalegin burujabea da. Hona hemen herriBiltzaren gogoeta eta proposamena:
Bizitzeko, Berdintasuna! Denentzat, hemen eta munduan, bizitzeko behar ditugun gauzak ukaiteko posibilitate berdina!
Frantziar eta espainiar Estatuen konstituzioek, eta ondorioz beren instituzio politiko guziek, tartean Herriko Etxeek eta Udalek, Ipar Euskal Herriko Hirigune Elkargoak eta Euskadiko eta Nafarroa Garaiko “autonomiek”, euskaldunen eta munduko gainerateko biztanleen bizi baldintzak funtsean hobetzea ezinezkoa egiten digute.
Hain zuzen, bizitzeko behar ditugun gauzak (bizitegia, elikagaiak, energia, sendagaiak…) ukaiteko posibilitate berdina denek ez izaitea konstituzioek legalizatzen dute, hau da, ezberdintasuna (inegalitatea) legalizatzen dute.
Berdintasuna elikaduran
herriBiltzaren helburua, hemen eta munduan, denek janari osasungarria ukaiteko posibilitate berdina izaitea da.
Zer egin, hemen eta munduan denek janari osasungarria ukaiteko posibilitate berdina izaiteko?
- janari osasungarriaren ordainketa, bakoitzaren ahalei egokitua izaitea bermatu behar da;
- elikatzeko landareak ereiteko, denek lurra erabiltzeko posibilitate berdina izaitea bermatu behar da;
- atzerritik datozen elikagaien ekoizleei ordaintzen zaiena eta hemengoak diren elikagaien ekoizleoi ordaintzen zaiguna berdina izaitea bermatu behar da.
Instituzio politikoek hori bermatzen ez dutenez, guhaurek Herri Jantegien bitartez bermatzeko ahaleginak egiten ditugu.
Herri Jantegiak, jantegi berdintzaile herritarrak
Denek janari osasungarria ukaiteko posibilitate berdina izan dezagun, hau da, elikadura osasungarrian berdintasuna (egalitatea) bermatzeko, Herri Jantegiak sortzen ari gira, jantegi berdintzaile herritarrak.
Herri Jantegiek, janari osasungarria merkatuaren prezioan ordaintzen ahal duten eta ahal ez duten herritarrak ber mahai inguruan biltzen dituzte.
Herri Jantegietan, harremanak elgar eskaintzan oinarritzen dira:
- Herri Jantegiek janari osasungarria jaleei eskaintzen diete;
- jaleek elikagaiak, sukaldatzeko-zerbitzatzeko-garbitzeko eskulana edota nahi duten diru kopurua Herri Jantegiei eskaintzen diete. Diru eskaintzak anonimoak dira; jantegiko txoko batean den diru kutxan egiten dira.
Elgar eskainitako janaria eta elikagaiak, elikagaien ekoizpen buruaskia garatzeko helburuarekin hautatuak dira. Horretarako, bereziki herriBiltzaren Buruaskitasunerako Baratzeen landare moten kontsumoa bultzatzen dugu.
Herri Jantegietan lehentasuna eta nagusitasuna euskarari emaiten diogu.
herriBiltza
Hurrengo Herri Jantegiak noiz egingo diren jakiteko, ikusi “herriBiltzaren ondoko hitzorduak” orrialdea edo jarri harremanetan herribiltza@riseup.net helbidearen bitartez.
