herriBiltza

Lurraren Gainditze Eguna, Lurrarendako Barau Eguna

Aurten, Lurraren Gainditze Eguna, agorrilaren 2a da.

0

Haizea Urtasun Rosano

Burujabetza kolektiboen aldekoa. Zuhatzu.

Hona hemen herriBiltzaren agiria:

Lurraren Gainditze Eguna, Lurrak urte batez berregin ditzakeen baliabideak (ura, elikagaiak, energia…) gizateriak jada kontsumitu dituen urteko data da. Data hori, Lurrak urte batez xurga ditzakeen hondakinak, besteak beste CO2, gizateriak jada ekoiztu dituen urteko data da ere.

Data hori, Global Footprint Network GKEak kalkulatua, aurten agorrilaren 2a izanen da. 2022an uztailaren 28a izan zen. Beraz, hobekuntza txiki txikia, abenduaren 31tik oso urrun baigira.

Gainditze egun ideia hori eztabaidagarria da; hala ere, eztabaidaezina den gauza bat erakusten du: planeta jaten dugu! Ideia eskasa da ere, zeren adibidez, ez du erakusten gehiegi kontsumitutako baliabideak, emakume eta gizon esplotatuen lanetik datozela, eta besteen lana gehien esplotatzen duen klase sozialak tripakadak egiten dituen bitartean, gehien esplotatua denak sabela hutsik duela; ez du agerian uzten ere, klase ertaina, gehiegi kontsumituz, egoeraren erantzulea dela ere.

Gauzak hola, planeta jatea gelditzeko helburuarekin, eta beraz, besteen esplotazioa gelditzeko helburuarekin, Lurraren Gainditze Eguna Lurrarendako barau eguna bilakatzea proposatzen dugu.

Agorrilaren 2an beraz, egun batez jateari borondatez uko egingo diogu, Lurraren Gainditze Eguna abenduaren 31 arte lehenbailehen mugitzeko eta desagerrarazteko helburuarekin.

Egun horretan, une batean edo bestean, lokalki elkartuko gira.

Lurraren Gainditze Eguna Lurrarendako barau eguna bilakatzea erabakitzen duten pertsona guziek, edonon egin dezakete.

Arima elikatzeko baraua izango da, Gainditze Egunik eragiten ez duten herriak ezagutzeko edo gehiago ezagutzeko baraua, Lurraren gainditzeari buruz dugun erantzukizunari buruz bakarka eta kolektiboki gogoetatzeko baraua, eta egin nahi ditugun jokamolde aldaketei buruz hausnartzeko baraua.

Egin nahi ditugun jokamolde aldaketak gauzatzeko baraua izanen da, eta bereziki, besteen esplotaziotik datorren gehiegizko kontsumoari gero eta gehiago uko egiteko baraua izanen da.

Norbere buruaren aurkako protesta-baraua izanen da, gure axolagabekeriaren, arduragabekeriaren, egoismoaren, adoregabekeriaren eta hipokrisiaren aurkakoa.

Tripakadak egiten dituen klase sozialaren existentziaren aurkako, eta bortizkeria polizial eta militarraren bidez Lurraren gainditze egoera hori inposatzearen aurkako protesta-baraua izanen da.

Euskal Herria, 2023 uztailaren 31a

herriBiltza

www.herribiltza.eus

Nahi baduzu, Independenteak aurrera egin dezan lagundu dezakezu. Idatziz, itzuliz, janariz, irudigintzan, bideogintzan, bertsotan, diseinuan, informatikan, psikologia klinikoan, abokatutzan edo diruz ere bai. Ziberjazarpenari aurre! INDEPENDENTEA LAGUNDU >

Honen harira

Utzi iruzkina, izen eta abizenez

Azken artikuluak