Goi Talaiako Herri Unibertsitateko gradu amaierako lanak aurkezteko deialdia

Trantsizio ekosozialeko lana burutzeko jarraibideak:

1- Aipatu Klima Aldaketa* eta Krisi Energetikoaren* ikuspegi transbertsaletik zeintzuk diren desoreka, hondamendi eta arazo ekosozialak post-it gorri banatan idatzita.

2- Arazo bakoitzeko hainbat konponbide aipatu, proposamen bakoitzeko post-it berde bat erabiliz. Hobetsi zilegitasun zientifikoa duten iturriak, adituen ikerketetan oinarrituak, ospedun sariak jasotakoak eta abar, baina ez gutxietsi bururatzen zaigun edozein konponbide aukera, ideia asko behar ditugu, ahalik eta gehien, prozesu parte hartzaileetan ideia guztiek balio dutelako.

3- Grafikoak, estatistikak eta zenbakidun taula aunitz pilatu.

4- Konponbideak jendarteratzeko euskarriak proposatu; logoak, sentsibilizazio kanpainak, argazkiak, pegatinak…

Erdi-erdian, errealismoak ezinbestean eskatzen duen gaitzerdi bat sartu. Adibidez: makroproiektu jasangarri baten maketa

5- Kutxa handi bat ekarri eta, erdi-erdian, errealismoak ezinbestean eskatzen duen gaitzerdi bat sartu, zenbat eta handiagoa hobe. Adibidez: makroproiektu jasangarri baten maketa, dagozkion albo-kalte guztiekin.

6- Kontu handiz hartu post-it gorriak, post-it berdeak eta 3. atalean aipatutako paperak eta ongi nahastu. Ondoren, paper bakoitza kontu handiz hartu eta bolatxo bat egin. Paperezko bolatxoekin, maketak kutxan utzitako hutsune eta tartetxo guztiak ondo-ondo bete. Kontuan hartu Proiektua oso hauskorra dela eta paper bolatxo horiek izango direla era guztietako ukazionisten kolpeetatik babestuko dutenak.

7- Kutxa bete eta kontuz itxi ondoren, dotore atondu kanpoaldetik logo eta sentsibilizazio kanpainekin, opari erakargarri baten itxura eman arte.

Adituen epaimahaiak sakon aztertuko ditu aurkeztutako lan guztiak. Onenen artean bekak, dirulaguntzak eta proiektuetarako babesak banatuko dira erakunde publiko zein enpresa mundutik.

Talaiako Herri Unibertsitatean ikasi eta mailaz maila igo ahal izango zara Jakintsuen Olinpora!