Garraio Sailburuordetzak Aginagako tunelaren alegazio-epea luzatzea agindu du

Gaur azaroaren 22an amaitzekoa zen alegazio-epea abenduaren 28ra arte luzatu da.

Eusko Jaurlaritzako Garraio Azpiegituren Zuzendaritzak Aginagako tunela eraikitzeko proiektuaren Ingurumen-Inpaktuaren Azterlanaren zenbait txosten “akats batengatik” jendaurrean ez dituela jarri onartu eta informazio publikoaren epea luzatzeko agindu du. Horrenbestez, gaur azaroaren 22an amaitzekoa zen alegazioak egiteko epea abenduaren 28ra arte luzatu da.

Garraio Sailburuordetzak jendaurrean jarritako dokumentazioa “osatzeko” eta alegazio-epea luzatzeko hartu duen erabaki honek, joan den urriaren 20ean herritar batek egindako salaketari erantzuten dio, hain zuzen ere Jaurlaritzak urriaren 7tik aurrera web orriaren bidez jendaurrean jarritako dokumentazioan Ingurumen-Inpaktuaren Azterlanan aipatzen diren 9 Anexo edo Eranskinak falta zirelako. Herritar harek Usurbilgo Udaletxera jo zuen aurrenik dokumentu horiek kontsultatu asmoz, baina udal arduradunek erantzun zioten informazio hori Udaletxean ere ez zeukatela, Jaurlaritzak ez zielako helarazi.

Irregulartasun hori dela eta, Jaurlaritzan salaketa bat aurkeztu zuen herritar horrek, hain zuzen ere Ingurumen- Inpaktuaren Azterlanaren parte diren Eranskin horiek jendaurrean jar zitezela eskatzeko. Aipagarria da, falta ziren Eranskin horien artean, joan den urtean zenbait erakundek egindako informeak zeudela, hala nola Gipuzkoako Diputazioko Basa Animalien eta Landareen Zerbitzuak 2021. urteko abenduan egindako txostena, non erakunde honek Garraio Sailburuordetzari kritika gogorra egiten dion proiektuak Oriako Itsasadarreko Babes Bereziko eremuan eragiten dituen kalteengatik azaldutako eragozpen nagusiak “ez direlako aintzat hartu”.

Azaroaren 14ean, salaketa egin zuen herritarrarekin harremanetan jarri zen Garraio Sailburuordetzako Azpiegituren Arduradun, Jabi Bereziartua, eta “arrazoi guztia duzu, giza akats batengatik ez genuen webguneko estekan dokumentazio guztia jarri”, adierazi zion. Egun berean, Garraio Azpiegituren Zuzendaritzak jakinarazpen bat igorri zion Eguzki talde ekologistari, “www.euskadi.net webgunean Aginagako tunela eraikitzeko Proiektuaren Ingurumen-Inpaktuaren Azterlanari buruz argitaraturiko dokumentazioa osatu egin dela iragartzeko (…) Jakinarazpen hau jasoko den egunetik zenbatzen hasita 30 egun balioduneko epean, egokiak iruditzen zaizkizuen alegazioak egin ditzakezue.“

Horrenbestez, gaur azaroaren 22an amaitzekoa zen alegazioak egiteko epea abenduaren 28ra arte luzatu da.

Hamarnaka herritarrek eta elkartek proiektua bertan behera uztea eskatzeko alegazioak aurkeztu dituzte:

Usurbilgo Urdaiagako Txoko-Alde auzo kaltetuko hainbat bizilagunek, Eguzki eta Usurbilgo Aranerreka talde ekologistek, Haritzalde eta Mutriku Natur Taldea ingurumenaren defentsako elkarteek, Satorralaia bizilagunen mugimenduak, eta Donostialdeko hamarnaka herritarrek, Proiektua bertan behera uztea eskatzen duten alegazioak izenpetu dituzte. Dokumentua esteka honetan dago eskuragarri: https://alegazioakaginaga.wordpress.com/

ALEGAZIOAK TXOKO-ALDEKO “ZUMETA” OSTATUAN IZENPETU DAITEZKE BESTALDE.

Hori dela eta, ingurumenaren hondamenak kezkatzen gaituen eta azpiegiura-lan handien auzian gobernuek egin ohi dituzten gehiegikeriak onartzen ez ditugun pertsona eta talde guztiei, alegazio horiek izenpetzeko edota beharrezkotzat jotzen ditugun gaiak planteatzeko dei egiten da.

Atxikitako artxiboetan doaz:

– Urriaren 20ean egindako salaketa.

– Azaroaren 14ean Azpiegituren Arduradun, Jabi Bereziartuak, emandako erantzuna.

– Azaroaren 17an Eguzki talde ekologistak jasotako jakinarazpena.

Iritziak trukatzeko edota proposamenik egin nahi baduzue, harremanetan jarri: 695715510 tlfnoa.

Agur eta eskerrik asko.