Aginagako tunela eraikitzeko proiektuari alegazioak

Kaixo! Informazio honen bidez, Usurbil eta Orio arteko trenbidean Aginagako tunela eraikitzeko Eusko Jaurlaritzak jendaurrean jarri duen eta alegazioak egiteko epean dagoen proiektuaren eta haren ingurumen-inpaktuaren azterketaren analisi kritikoa egiten duten ALEGAZIOAK zabaltzen dira. Ikusiko duzuenez, alegazioetan gaia luze eta zabal jorratzen da, hain zuzen ere proiektu hori lehen begiratuan eztabaidagarria izan ez daitekeela iruditu arren, zinez auzitan jarri behar dela ondorioztatzen delako xehetasun handiagoz aztertzen denan.

Lehenik eta behin, Oria Itsasadarreko naturgunean eragiten dituen ondorio kaltegarriengatik jartzen da auzitan egitasmo hau (alde horretatik, aipagarria da Gipuzkoako Diputazioko Basa Animalien eta Landareen Zerbitzuaren eta Jaurlaritzako Biodibertsitate Zuzendaritzaren erantzun argia jaso duela proiektuak), baita Irisasiko baso eremuan dakartzan kalte larriengatik ere. Eta bigarrenik, Kostaldeko trena tarte horretan hobetzeko badirelako hain erasokorrak ez diren eta azpiegitura berririk eraikitzea eskatzen ez duten bestelako aukera alternatiboak, egungo trenbidearen optimizazioan oinarriturik.    
Gai horiek zehatzago azaltzen diren alegazioetan.
Hori dela eta, ingurumenaren hondamenak kezkatzen gaituen eta azpiegitura-lan handien auzian gobernuek egin ohi dituzten gehiegikeriak onartzen ez ditugun pertsona eta talde guztiei, gaia aztertzeko eta alegazioekin ados bagaude, dokumentua izenpetzeko eta Jaurlaritzari zuzentzeko dei egiten zaigu beraz.

ALEGAZIO-DOKUMENTUA atxikitako artxiboetan doa (.doc formatoan), batean euskaraz eta bestean gazteleraz. Halaber, dokumentua honako estekan dago eskugaragarri (pdf formatoan), bi hizkuntzetan:  

https://alegazioakaginaga.wordpress.com/

ALEGAZIOAK AURKEZTEKO EPEA AZAROAK 22an amaituko da.
Alegazioak aurkezteko bideak:

– Jaurlaritzaren “ZUZENEAN” zerbitzuan erregistratu daitezke (bulegoak Donostiako Andia kalean daude, Alderdi Ederren). Hortarako aurretiko zita eskatu behar da.

– Korreo zertifikatu baten bidez (postaz): kasu honetan alegazioak izenpetu eta honako helbidera bidali behar dira: EUSKO JAURLARITZAKO LURRALDE PLANGINTZA, ETXEBIZITZA  ETA GARRAIO SAILA. Donostia-San Sebastián kalea, 1. 01010.GASTEIZ. (Oharra: Posta bulegora alegazio-dokumentuaren bi kopiarekin joatea komeni da, kopia  zigilatu bat norberak gordetzteko).

Hortaz, gaia aztertzeko eta alegazio hauek  zuen inguruan zabaltzeko eskatzen da.

Bestalde, alegazio hauek landu dituen pertsonarekin iritziak trukatzeko edo proposamenik egin nahi baduzue, harremanetan jarri.

Agur eta eskerrik asko.

Mikel