Kaixo! Usurbil eta Orio arteko trenbidean Aginagako tunela eraikitzeko Proiektuari alegazioak egiteko epea abenduaren 28ra arte luzatu da. Izan ere, Jaurlaritzako Garraio Azpiegituren Zuzendaritzak Ingurumen-Inpaktuaren Azterlanaren zenbait Anexo edo Eranskin “akats batengatik” jendaurrean ez zituela jarri onartu du eta informazio publikoaren epea luzatzeko agindu.
Aipagarria da, falta ziren Eranskin horien artean, joan den urtean zenbait erakundek egindako informeak zeudela, hala nola Gipuzkoako Diputazioko Basa Animalien eta Landareen Zerbitzuak 2021. urteko abenduan egindako txostena, non erakunde honek Garraio Sailburuordetzari kritika gogorra egiten dion proiektuak Oriako Itsasadarreko Babes Bereziko eremuan eragiten dituen kalteengatik azaldutako eragozpen nagusiak “ez direlako aintzat hartu”.
Jaurlaritzak jendaurrean jarritako dokumentazioan Ingurumen-Inpaktuaren Azterlanari dagozkion 9 Eranskin falta zirela ikusita, herritar batek salaketa bat aurkeztu zuen. Garraio Sailburuordetzak arrazoia eman dio, esanez “giza akats batengatik” ez zutela webguneko estekan dokumentazio guztia jarri. Horrenbestez, dokumentazioa osatu etaazaroaren 22an amaitzekoa zen alegazioak egiteko epea abenduaren 28ra arte luzatu behar izan dute.
Usurbilgo Urdaiagako Txoko-Alde auzo kaltetuko hainbat bizilagunek, Eguzki eta Usurbilgo Aranerreka talde ekologistek, Haritzalde eta Mutriku Natur Taldea ingurumenaren defentsako elkarteek, Satorralaia bizilagunen mugimenduak, eta Donostialdeko hamarnaka herritarrek, Proiektua bertan behera uztea eskatzen duten alegazioak izenpetu dituzte. Dokumentua esteka honetan dago eskuragarri:
ALEGAZIOAK URDAIAGAKO TXOKO-ALDE AUZOKO “ZUMETA” OSTATUAN IZENPETU DAITEZKE BESTALDE.
Hori dela eta, zuen inguruko pertsonei eta taldeei alegazio horien berri emateko eta jendeak izenpetu ditzan –edota beharrezkotzat jotzen diren gaiak landu daitezen– animatzeko proposatzen dizuegu.
Iritziak trukatzeko edota proposamenik egin nahi baduzue, harremanetan jarri: 695715510 tlfnoa.
Agur eta eskerrik asko.
