Funtzionarioak eta funtzerritarrak

Xabier Irastorza Garmendiarena etorri zait Mastodon bitartez, eta harexek piztu dit hausnarketa hau, jarraian transkribatuko dudana, zirriborro gisa.

Bizi!

Funtzionariotzaz, nola sistema osasuntsu baterantz egin?

Xabier, kaixo! Asko eskertzen dizut gai honi sakon heldu diozula (hemen; 2. zatia luzeegi zetorkidan oraingoz 😉 ) eta irakurri dudanak eragindakoa idatziko dut jarraian.

(Idazten hasi eta gozatu naizenez, luze joan jatanez, izenburuak gehitu dotsedaz tarteka, irakurketa arinagoa errazteko asmoz.

Bestetik, zirriborroa dogu idatzi hau, barrukoak eta kanpokoak entzun eta zuzentzekoa aurrerantzean).

Argi dago, konplexua da gaia, ez horren beltz ez zuri-zuri, eta askoz denbora gehiago eman behar genioke honetaz sakon eta zintzo hausnartzeko, alde askotatik.

Hasteko guk geuk, enplegu publikoetan dihardugunok.

Horrexegatik, oso eskertzekoa atea zabaltzea, Xabier!

1. Covid19 garaiko bizipenak eta funtzionariotza

Covid19 horren hegalpean ikusi izan dugu ere bai, inoiz baino argiago, muturrean, gaur egun funtzionariotza zer den, azaldu duzun aurpegi argi horretaz gain: akritikotasuna, ilegalkeria goitik beherainokoa, otzankeria, agintekeria, biolentzia. Hedabideetan, osasun sistema publikoan, polizian, garraiobideetan eta danean. Hemen ere irakurri dezakegu horretaz labur eta argi.

2020ko urrian karnet espainola eskura eman nahi ez izateagatik (erakutsi bai, erakutsiko geniola lasai, identifikatzeko eskatu zigunean, legez-legezkoa dena) atxilotu gintuen eta txostena gezurrez osatu zuen ertzaina ere funtzionarioa da; gure seme-alabei legez kanpoko hainbeste agindu ematen zizkieten hainbat irakasle eta zuzendaritza taldekoak ere funtzionarioak dira; jendea ikaraz eta larri-larri jarriz muturretarainoko propaganda faltsu etengabea zabaldu eta informazioa eta elkarrizketa publikoak ukatu eta zentsuratu zizkiguten hainbeste kazetari, ere bai, langile publikoak; burkideei inposatutako hainbeste legez kanpokokeria onartu eta sustatu zituzten sindikatutetako langileak, ere bai.

Atxilotu gintuen eta txostena gezurrez osatu zuen ertzaina ere funtzionarioa da; gure seme-alabei legez kanpoko aginduak betearazi dizkieten irakasle eta zuzendaritzakideak ere bai; propaganda faltsua zabaldu duten hainbeste kazetari ere bai; burkideen kontrako legez kanpokokeriak onartu dituzten hainbat sindikalista ere bai; langile publikoak

Eta zer esan osasun sistema publikoan eta nagusientzako egoitzetan gertatu izan denari buruz? Gutxi dakigu horretaz, barrukoak isilik egon direlako, ia guztiz. 

Noiz idatziko digute han eta orduan emandako zentzungabekeriei eta bidegabekeriei buruz? 

Noiz eta nola garbitu iragana eta osasun sistema osatu?

Ez, ez dugu, gertatutako guztia gertatu eta gero, apenas balantzerik egin, aitortzarik, ez eta etorkizunerako ezelango zuzenketa asmorik agertu ere.

Izutzekoa.

2. Automatak funtzionariotzan, funtzionariotza automatikorantz?

Herriaren alde, onena emoteko gogoz dabilen jende argi askoren ondoan, agintari politikoen edozein agindu zentzunbako bete eta “azpikoei” (izatez, klasekeria galanta arnasten dogu funtzionarioon artean, Frantzia/Espainiatik legez inposatuta dugun egitura hierarkikoa barneratzen baitugu egunez egun, jabetu ere egin gabe!) eta herritarrei betearazteko, buru eta bihotz gaixoko automata antzeko pilo bat lagun ere bagabiltza funtzionariotzan.

Edo ohiko-ohikoa hau ere: horrelako agintekeriak muturren aurrean sentitu-antzeman-pairatu-ikusita, ez-ikusi egingo dutenak, isilik egongo direnak, beste aldera begiratuko.

Areagotuko dut: zenbat eta urte gehiago funtzionario jardun, gero eta horrelakoagoak bihurtzen gara funtzionario gehienak. Administrazio-sistema horrela (horretarakoxe?) dago diseinatuta eta horretantxe da efikaza.

Zenbat eta urte gehiago funtzionario jardun, orduan eta automatagoak bihurtzen gara funtzionario gehienak. Administrazio-sistema horretantxe da efikaza

Areago, automatetan automatenei errazago ematen dizkiegu ardura eta soldata handiagoak, gorago egin ohi dute, ikusita dekogu argi-argi gure inguruan hamaika horrelako!

Uste dut sistemak berak eta mendeotako giza-historiak errazten dutela urratze hori, utzikeria pertsonala eta kolektiboa. Tamalgarria.

Zenbat gazte hasten dira funtzionario, gizartearentzat lan egiteko ilusioz, eta urteen poderioz beratzen, kamusten, usteltzen, gaixotzen edota zerraldotzen bertan?

3. Funtzionarioentzako kontratu “blindatuak”?

Kontratu “blindatuak” izateak ez du gauza askorik aldatzen. Bardin ikusten dodaz isilik, akritiko, otzan, ustel-zuritzaile, epel, hainbeste funtzionario finko, ”betiko” plaza latz hori eskuratutakoak. Nolatan, ba, hain uzkur bizi, horren baldintza “pribilejiozkoetan”? Bake itxurako baten alde? “Gora” egiteko grinagatik? Ingurura moldatze hutsa?

Ez ote gaitu gizakiak erosokeria handiegiak txepeltzen, desgaitzen, “hiltzen”?

Eta ez ote gaitu erosokeria larreko horrek politikan ardura dutenen gehiegikeriaren eta zentzungabekeriaren tresna errazago bihurtzen?

Zenbat lege eta arau hausten ditugu eguneroko lanean politikariek eta funtzionariook, legearen joko-esparrua zaintzen bereziki trebe ibili behar ginatekeenok?

Zer egiten dugu, lankide gaituzten funtzionariook, horren aurrean? Eta langileok ordezkatzen ei gaituzten sindikatuek?

Gentza Eleder Aurtenetxe Pildain

Bizkaiko Foru Aldundian antolaketa teknikari bitartekoa

(Jarraitzen du).