Xabi Irastorza Garmendiak hemen idatzitakoak piztu dizkit hausnarketa hauek, zatika eta zirriborro gisara jasotzen joan naizenak. Oso eskertzekoa da atea zabaldu eta sakon heldu izana Xabik gai konplexu honi.
Funtzionariotzaz, nola sistema osasuntsu baterantz egin?
(Honen jarraipena da).
7. Funtzionariotza, noraino?
Bestalde, eta hau ere polemikoa izango da, administrazio publikoa arrunt puztuta dagoela uste dut (sistema idealean halakorik ez genuke ezer behar, arbolek ez dute behar, planetak ere ez).
Guztion poltsikoetatik ordaintzen dugu. Batzuetan absurdoraino, herritarrak kaltetzeko “zerbitzuak” emoteko muturreraino (badaukagu adibide ugari gutako bakoitzak buruan, bai?).
Benetan Bizkaiak behar du Turismo jarduera bultzatzeko Sail bat? Dirutza bat eta funtzionario pilo bat jarri behar dugu hori sustatzeko (eta saihets, hainbeste jende kaltetzeko?). Ze logika, ze historia eta ze interes daukate horrelako egitateek? Ze beste zeregin publikotan jarri genezake energia hori guztia?
Zeintzuk dira oinarrizko zerbitzuak eta zer dago puztuta? Ze tamainako administrazioa behar dugu? Ze alorretan? Eta ze alorretan dago sobera(koa)? Argi dagoena zera da: alderdi politikoek eta hainbat politikarik euren “laguntxuei” pribilegioak emateko baliatzen dute hainbeste lanpostu publiko, eta etengabeko propagandan ari dira herritarroi burua jateko asmoz.
Alderdi politikoek eta hainbat politikarik euren “laguntxuei” pribilegioak emateko baliatzen dute hainbeste lanpostu publiko, eta etengabeko propagandan ari dira herritarroi burua jateko asmoz
Eta, susmoa; batzuetan sindikatuak ere joko horretan ote dabiltza, euren bezero/bazkideen mesedetan?
8. Orekaren bila, sistema osasuntsuaren alde
Beste galdera aspaldiko batzuk nire ganbaran, 2020tik gogor-gogor berresten zitzaizkidanak sarri.
Ze ratio daukagu Euskal Herrian, funzionario/herritar? Eta polizia/herritar? Politikari/herritar? Ze bilakaera izan dute ratio horiek azken hamarkadetan? Ze logika dauka honek guztiak?
Zein litzateke maila egokia edo beharrezkoa? Zenbat eta ratio handiagoak, hobe?
Ze eginkizun zehatzetan eta ze neurritan behar ditugu benetan langile eta sistema publikoak?
Zertarako, ze eginkizun zehatzetan eta ze neurritan behar ditugu benetan langile eta sistema publikoak?
Noraino murriztu behar dogu? Non da oreka?
Nola orekatu eta osatu dezakegu sistema gaixo eta arriskutsu hau?
Eta, bestetik, zelan lortu benetan gogotsu, sormentsu, zerbitzu emoteko gogoz gainezka dabilen (langile publikoen?) komunitate ireki, pozezko eta osasuntsu bat?
Funtzionariotzatik kanpo eta barru ibili gogo duena eta pozik ibiliko dena, sistema bera haizeberrituz, aberastuz, zabalduz?
9. Konponbideak, nondik hasi?
Problema konplexua da (eta polita). Eta guztiok gara parte. Konponbidean ere bai. Eta katramila hau askatzen hasiko bagara, herritarrongandik, funtzerritarrongandik eta gure organo ordezkariengandik hasita aldatuko dogulakoan nago. “Behetik gora”. Bestela, jai!
Bai, oso gai polita zait hau. Hausnarketa zintzoa, zabala, jarraia eta sakona behar dugu sistema biziberritzeko.
Eskerrik asko berriz ere, Xabier, atea zabaltzearren!
Gentza Eleder Aurtenetxe Pildain
Bizkaiko Foru Aldundian antolaketa teknikari bitartekoa
