Hamaika – erakusketa Agurainen maiatzaren 7tik 19ra
HAMAIKA lurraldearen birjabetze sinbolikoa bilatzen duen diziplina anitzeko proiektu artistiko bat da. Etxalarren hasi zuen bere ibilbidea, hainbat makroproiektu eolikorekin mehatxatzen duen indarkeria administratiboari eta industria berriztagarrien jarduera kriminalari erantzuteko, beren zekenkeriarekin, hiltzeko eta suntsitzeko irrikarekin, txandakako politikarien konplizitatearekin, berdin dio zein alderditakoak.
HAMAIKA Irantzu Piquero (Haizeak Bizirik) editore eta ilustratzaileak eta José Delicadoren (Malerreka Bizirik) diseinu grafikoak sortutako proiektua da, eskulturak Iñaki Sanchezek eginak dira. Bertan, ilustrazioa, kartelismoa, mikroedizioa eta bitartekaritza kulturala uztartzen dira, testigantzak eta tailerrak jasoz, lurraldearen defentsaren esparruan.
Erakusketa honetan Euskal Herri osoko 11 irudigilek parte hartzen dute, baita Euskal Herri osoko 11 pertsona eta familiak ere, euren testigantzekin. Haien bizitzak industria berriztagarrien proiektuek mehatxatuta daude. HAMAIKA lur honetan bizi den edertasun infinituaren inbentarioa da. Dena marraztera goaz. Gertu edukitzeko, ostu ez diezaguten. Horrela ulertuko dugu ezin dugula galdu. Begiak irekitzeko ordua da.
ARABAKO MENDIAK ASKE
