Eusko Legebiltzarreko Osasun Batzordean gogorarazi dugu medikuak garela eta gure irizpideak zientzian eta etikan oinarritzen direla

Eusko Legebiltzarreko Osasun Batzordearen aurrean

Atzo, 2025eko maiatzaren 5ean, orain dela sei hilabete Bizitza plataformak eskatutako aurkezpena izan genuen Eusko Legebiltzarreko Osasun Batzordean. Eskari horren gidalerroak Covid 19 pandemiaren kudeaketaren ebaluazioa eta txertaketaren ondorio kaltegarrien ikerketa epidemiologiko bat eskatzea izan ziren. Iparra kolektiboko hiru kide aurkeztu gara Eusko Legebiltzarrean, medikuak hirurok: Silvano Baztan, Juanjo Martinez eta ni neu, eta hogei minutuko aurkezpena burutu dugu.

Agerraldiak iraun duen tartean, salatu ditugu pandemian hartutako neurri nagusiek (itxialdiek, musukoek, PCR diagnostikoek eta distantzia sozialak) ez zutela oinarri zientifikorik. Bereziki sakon jorratu ditugu Covid txerto genetikoen kalteak eta Covid ziurtagirien bidez politikoek bultzatutako inposaketa. Saiatu gara txerto genetikoen kalteak zerrendatzen eta haien ondorio fisiopatologikoak nolabait ulerrarazten. Azaldu dugu nola azken bost urteetan ezin izan dugun iritzi eta azalpen zientifikorik inon aurkeztu, jasandako zentsurarengatik. Aldarrikatu dugu benetako eztabaida bat zabaltzearen beharrezkotasuna. Labur geratu zaigu denbora, baina goazen orain politikarien erantzunak aipatzera.

EH BILDUko ordezkariak eskertu egin digu egindako aurkezpena eta kitto, ez digu galderarik egin edo oharrik aipatu. VOXeko bozeramaileak eskertu du gure azalpena eta aipatu du nola musukoekin batzuk diruz aberastu diren. Ados omen dagoen arren umeen txertaketaren arriskuez ohartarazi dugunarekin, galdetu digu ea txertaketa guztien aurka geunden. Juanjo Martinezek erantzun dio bera ez zela txertaketen aurkakoa eta bere alaba biak txertatuta zeudela, baina, orain dakienarekin, ez duela utziko bere biloba txertatzerik. Nik ez dut astirik izan azaltzeko ni ez naizela inoiz ezertaz txertatu eta, gainera, txerto genetikoak ez direla txerto normalak, terapia genetikoa baizik. Alderdi politikoen galderei erantzuteko hamar minutuko tartea izan dugu eta, Osasun Batzordeko lehendakariak esan digunez, hasieratik zorrotz bete ditu denbora-mugak. PPko kideak aprobetxatu du Eusko Jaurlaritzaren pandemiaren kudeaketa zeharka kritikatzeko eta aipatu ditu zahar-egoitzetan izandako hildakoak. Galdetu digu ea daturik dugun ostalaritzari eragindako kalteak neurtzeko, eta guk, mediku gisa, hori ezin genuela erantzun esan diogu.

Osasun Batzordean ez dago osasun arloko ia inor, gehienak abokatuak dira

Edonola ere, Euskal Sozialistak (PSE-EE) talde parlamentarioko ordezkariaren hitz-hartzea antologikoa izan da. Deitoratu ditu guk aipatutako zentsura eta totalitarismo salaketak, kexatuz esanez ea nola adieraz genezakeen halakorik, eta azaldu du berak ez zukeela baimenik emango gu bezalako negazionistak mezu arriskutsuak jaurtitzera Legebiltzarrera etortzeko. Oso erabaki okerra izan dela gu bezalakoei Osasun Batzordean hitz egiteko aukera ematea. Guk azaldutako arrazoiak kontsentsu zientifikoaren kontrakoak zirela eta gu ez ginela inor txertaketen arrakasta zalantzan jartzeko, eta konspiranoiko hutsak ginela. Benetan harrigarriak eta argigarriak izan dira PSE-EEko bozeramailearen hitzak eta gogorazi behar izan diogu gu medikuak garela (Osasun Batzordean ez baitago osasun arloko ia inor, gehienak abokatuak dira) eta gure irizpideak zientzian eta etikan oinarritzen direla. Bere hitzak zentsuraren adibide garbienetako bat izan dira. Azkenik, EAJ-PNVren ordezkariak berriro aipatu digu zientziaren aurkakoak direla guk agertutako irizpideak, eta OMEren ikerketa batek diola munduan 14 milioi lagun salbatu direla txertaketen bidez. Bizitza plataformaren aurka jaurti izan diren ohiko irainak bota ditu: txertoen kontrakoak, gezurtiak, konspiranoikoak, etab. Pandemia garaian bera alkate zela azaldu du EAJ-PNVkoak, eta nola jasan omen zituen plataforma horren “mehatxuak” eta, “Euskal Sozialistek” bezala, ez ziela gure eskaerei erantzungo. Guk berriro azaldu diogu gure esanak ikerketa zientifiko ugaritan oinarrituta daudela eta, ez badigu sinisten, prest gaudela behar diren erreferentzia zientifiko guztiak bidaltzeko. Egia esan, nik zorro batean nituen Karina Acevedo-Whitehouseren liburua (Efectos adversos. Una revisión crítica de las vacunas genéticas anti-COVID. ¿Eliges comprender?), Alexandra Henrion-Caude genetistarena (Les apprentis sorciers) eta baita AEBko Kongresuko txosten famatua ere, baina ez dugu denborarik izan horiek guztiak erakusteko eta azaltzeko. Bigarren parte-hartzeen txanda VOX alderdiak erabili du esateko “ongi ulertzen gaituztela zentsuraren salaketan”.

gure eskakizunak (txertatuen eta txertatugabeen gaixotasun-indizeak konparatzeko datu epidemiologikoak lortzea eta txertaketa genetikoen kanpainak bertan behera uztea) hutsean geratu dira

Eta horrela, ordubeteko iraupenera iritsi ez den agerraldia eginda joan gara aretotik, gure eskakizunak hutsean lagata, hau da, datu epidemiologikoak lortzea txertatuen eta txertatugabeen gaixotasun-indizeak konparatzeko eta txertaketa genetikoen kanpainak bertan behera uztea, oraingoak zein etorkizunekoak. Bagenekien ia ezinezkoa zela, ez gara inozoak, baina gure ordezkari politikoen mailaz jabetzeko balio izan digu; benetan, Euskadi/EAE deituriko Euskal Herriaren zati hau, behintzat, gaixo dago.

* * *

P.D.: Diario.es izeneko hedabideak gure berri eman du; “El parlamento vasco abre la puerta de la comisión de salud a una plataforma negacionista de la COVID-19 y antivacunas” izenburuarekin. Bertan Euskal Sozialisten kontakizuna irakur dezakezue eta gu Voxen laguntzailetzat uzten gaitu artikuluaren egileak. Hedabideena ere penagarria da.