Hara herriBiltzak atzo idatzitakoa:
Agiri hau eta euskara Euskal Herrian bigarren mailako hizkuntza bezala tratatzen duen kendu dugun bide seinale taula bat, Donibane Garaziko Posta arduradunari UNESCOri igortzea eskatu diogu.
Hemen prentsa agiria:
Euskararen Nazioarteko Egun honetan, mundu osoari Euskal Herrian euskaraz bizi nahi dugula adierazten diogu: gure eguneroko aktibitate guziak euskaraz egiteko posibilitatea ukan nahi dugu!
Euskara munduko gainerateko hizkuntza guziekin, munduko ondare kulturala da!
UNESCOk, heziketa, zientzia eta kulturarako Nazio Batuen Erakundeak, dio:
- munduko ondare kulturala babestea funtsezkoa dela;
- soilik kulturen arteko begiruneak eta eztabaida irekiak bake iraunkorrera eraman dezakeela;
- gaur egun aniztasun kulturala erasotua dela.
Karrikan euskararen erabilpena neurtzen duen Soziolinguistika Klusterrak, 2022ko maiatzean argitaratu zuen ikerketaren arabera, Euskal Herri mailan ezer gutxi aldatu da 2016tik 2021era: zortzi lagunetik batek hitz egiten du euskaraz (%12,6).
Hizkuntza batek, bizitzeko, lurralde bat nun herritarrak lehentasunez eta nagusitasunez hizkuntza horretan mintzatzen diren behar du. Beraz, euskara desagertzeko bidean da.
Frantziar eta espainiar Estatuen konstituzioek eta legeek, euskararentzat ez dute begirunerik, euskara gutxiesten dute eta Euskal Herrian bigarren hizkuntza bezala tratatzen dute.
Frantziar eta espainiar Estatuen agintariek, UNESCOren helburuen aurka egiten dute: euskararen biziraupenerako ez dute eztabaida irekirik egiten, aldiz euskara erasotzen dute eta hiltzen ari dira.
UNESCO egoera honen aintzinean mutu egoiten dela salatzen dugu, eta mundu osoari “Euskal Herrian, lehenik eta nagusiki euskaraz!” aldarrikapena gauzatzeko laguntza eskatzen diogu.
2022ko abenduaren 3an
herriBiltza
