Etxeko sua debekatzeaz hitz egiten hasi dira jada hedabideak

(Honen jarraipena da)

Ekonomia kartzinogenoa

Ekonomia errealak dirua baldintzatzen ez duenetik, erraztu egin da aberastasun pilaketa. Dirua inprimatu eta Jauntxoen artean banatzen dutenero, aberatsagoak bilakatzen dira besteekiko; hau da, darabilgun diruaren balioa jaisten da beraien diru kopurua igotzen den neurri berberean. Horrela puztu dira haien kontuak azkeneko krisietan eta kobidaroan; dirua “sortu” eta handikien artean banatu, erreskateak, next generation funtsak, aurrekontu militar, klima eta abarren labelpean.

Minbizi finantziarioak jota dago giza jarduera

Nahieran mugitzen duten diruaren indar mugagabeak areagotu egin du giza jardueraren eta Bizitzaren iraunkortasunaren arteko talka. Minbizi finantziarioak jota dago gizartea eta guk, indarrez erreklutatuta, zelula kantzerigeno lanean dihardugu.

Ez dago sendabiderik gizarte piramidalean, bertikalitateari eusten diona izpiritu lukurreroa baita

Nahi beste paparhutsez beteko dute airea, tesi eta egitasmo teknozientifiko ulergaitzez bete paperak, baina ez dago sendabiderik, gizarte hierarkikoari eusten diona izpiritu lukurreroa delako, handikeriaren fetitxismoak gobernariak itsutzen dituelako.

Burudesjabetza

Eragindako txirotze ekonomikoa erabateko desjabetze prozesuaren atal bat baino ez da. Estatuen gaineko erakundeak indartzen diren neurrian botere politikoa piramidalizatzen ari da: Europar Batasuna, NATO eta NBEren hainbat garroren eskumenak handitzearekin, estatu nazionalen papera administratzaile ustela izatera mugatzen ari da eta abertzaletasun tradizionalaren diskurtsoak desegokitzen.

Politika jada ez da udaletan hasten, udaletan bukatzen baizik, bere udaltzain armada eta auzokide funtzionarioengan

Politika jada ez da udaletik hasten; udaletan bukatzen da, bere udaltzain armada eta auzokide funtzionarioengan. Gobernatzeko modua automatizatu egin da, potrokoloak eta gobernantza moduko formulek giza harremanen eta zentzu komunaren lekua hartzen dutelarik azkar.

Ekonomia tertziarioa ari da metodikoki ordezkatzen egitura produktibo guztia: garraioa, komertzioa, zerbitzuak, burokrazia eta sekuritatea. Oinarrizko beharrak eta baliabideak kudeatzeko gaitasuna geroz eta esku arrotzagoetan dago eta hori berreskuratzeko eskumenak, baliabide ekonomiko eta juridikoak ezabatzen ari zaizkigu. Aldi berean, galtzen ari gara burujabetzarako behar diren ezagutza, kultura eta baliabide teknikoak. Kultura diodanean, ez naiz ari arteekin lotutako birtuosismoen lanketaz, baizik eta munduan egoteko eta jarduteko gune kolektibo inmaterialaz.

Estatua da gerra totala egikaritzeko aparatua

Jada etxeko sua debekatzeaz hitz egiten hasi zaizkigu hagintarien fedabideetatik. Horrek bakarrik alarma guztiak piztu beharko lituzke, baina, etxean sua piztea ere gutxi batzuen ohitura bihurtu denez, beste oharkabeko desjabetze atal larri bat burutuko lukete.

Kobidarekin entseatutako mugimugatzeak aurrera darrai, orain arte apalki aplikatzen hasi diren IGEen (Isuri Gutxiko Eremu) bidetik. Urrats larria litzateke Lapurdiko kostatik datorren berria, Cotebasque osoa frantses aberatsen gotorleku bilakatzeko bidean. Garraio “publikoak” eta kotxe garestienek mugatuko dute nondik nora mugi gaitezkeen gure herrian, planetaren hobe beharrez.

Telefono mugikorra edukitzearen obligazioa boron(o)datezko kateatze kolektibo ariketa eredugarria izan da. Trasto horri lotzeari erresistitu gatzaizkion apurrok estutzen ikusi dugu hesi soziala, praktikan ezinezko bihurtu arte bera gabe bizitzea. Administrazioak edozertarako exijitzen digu mugikor zenbakia, nik dakidala inon idatzita egon gabe mugikorra edukitzearen obligazio legala. Geuk ordainduta daramagu gainean uneoro eta edonora kamera, mikroa eta geure jardun guztien erregistroa daraman polizia; non gauden, zenbat ibili garen, lo orduak eta geure osasunaz kezkatzen den mamua.

Geuk ordainduta daramagu gainean uneoro eta edonora kamera, mikroa eta geure jardun guztien erregistroa daraman polizia

Diruaren digitalizazioa erabat kontrolpetzen ari da gure arteko harreman ekonomikoek zuten autonomia apurra, betiere iruzurra saihesteko neurriz mozorroturik.

Eta, goiko guztia, hain gustura etxekotu dugun digitalizazioaren bidez kontrolatu ahal izango du adimen artifizialak.

Desnaturalizazioa

Gizakiok Izadiaren atal bat garenez, ezinezkoa zaigu barnebiltzen gaituena menderatzea. Ameskeria horren gainean eraiki da Zibilizazioa. Horretarako asmatu zuten Amalurraren jabetza eman zigun Jainkoa, gaur egun Palestinako sarraskia zuritzeko erabiltzen den jainko berbera.

Lege naturalek ez diotenez Zibilizazioari obeditzen, umetokitik hasten zaizkigu sena bortxaz erauzten, eta gu, bizitzaren sareetatik umezurtz, gogotsu kateatzen gatzaizkio amaorde lapurrari, Zibilizazioari alegia. Hori da hezkuntza.

Baina Natura ez da hezten eta egoskor eusten dio bere izaerari

Abeltzain logika horri jarraiki hezi nahi dute Natura, baina hark egoskor eusten dio bere izaerari. Zenbat eta gogorrago saiatu menderatzen, orduan eta handiagoa da kaltea eta zailagoa irtenbidea, zabalagoa bihurtzen delako nahikeria eta ahalmenaren arteko arrakala. Desoreka ekologikoa larritzen ari da arlo guztietan batera eta kalamitatearen arduradunek, kontakizunaren gidaritza hartuta, apustu teknozientifikoa berretsi eta ludopatikoki handitzen dute. Atakan sartu gaituztenek ba omen dakite nola irten zulotik, eta, asmatzen ez dutenean, aurrerapenaren albokalteak dira.

Erraietaraino bortxatzen ari dira Bizitza, menderatze asmotan: geneak, DNA, RNA, nanopartikulak, neuronak… Jakintsutzat dute beren burua, baina niri kuriositatez jostailua apurtzen duen haurra dakarkidate gogora.

Arazoa da ez direla jostailuekin ari.

Estatua

Estatua da Gerra Totala egikaritzeko aparatua. Botere globalaren mendeko tokian tokiko kudeatzailea, bere aparatu judizial, polizial eta administratibo guztia dago jada Bizitzaren kontrako gerraren zerbitzura, inongo autonomia aztarnatik desjabetua. Geruzaz geruza, NBE, EB, Espainia, Frantzia, EAE, NFE, Diputazio, Udaletxeek osatzen duten egituran, goitik behera datozen aginduak betetzea bermatzen duen iruzur piramidala osatzen duen eraikina.