Milaka herritar baztertzen dituzte Euskal Herriko hainbat herritan ezartzen ari diren ‘trantsizio ekologikorako’ neurriek

Ekologiaren izenean, Mundua salbatzeko aitzakia faltsupean, lobby boteretsuen irabaziak biderkatuko dira eta herritarren kontrola areagotuko da. Gizartearen parte zabal baten isiltasun kezkagarria hautsi nahian eta politikari edo erakunde gehienen gelditasunaren aurrean, herritarrak mobilizatzen ari dira, bazterketa modernoen kontra.

Segregazio modernorik ez!

IGE – ZFErik EZ!

2025eko udaberrian indarrean jarriko dira, Euskal Herriko hainbat hiritan eta zonalde zabalagoetan, milaka herritarren bazterketa eragingo duten IGE ZFE-ZBE edo halako izendapen exotikoekin etiketatu dituzten Isuri Guttiko Eremu ‘babestuak’. Trantsizio ekologikoaren aitzakiapean sortu dituzte 2030 Agendaren jarraitzaile politikoek kolore polita duten pegatina segregazionista modernoak; Planetaren alde saldu nahi diote herritarrari, ibilgailu zaharrarekin Lapurdiko kostara, Donostiara eta IGE zigilupean jarritako leku horietara joaten bada, etxera automatikoki iritsiko zaion ehunka euroko isuna. Ekologiaren izenean, Mundua salbatzeko aitzakia faltsupean, berriz ere lobby boteretsuen irabaziak biderkatu eta herritarren kontrola areagotuko da, gizartearen zati zabal baten isiltasun kezkagarri baten erdian. Non dira herritarren defentsa egiten omen duten egiturak, elkarteak, politikoak? Zer diote manipulazio honen aitzinean? Onargarria al da gizartearen parte handi baten segregazio mota berri hau? Zinez sinisten al dute eta sinetsarazi nahi digute, nire auzoaren 4L zaharra mehatxua dela, lobbyen eta politika kutsatzaile eroen aurrean isilik daudenean?

Covid garaian bezala, errotik zatikatzen gaituen diskurtso eta egin molde baten aurrean gaude

Berriz ere, Covid garaian bezala, errotik zatikatzen gaituen diskurtso eta egin molde baten aurrean gaude: hedabide gehienen laguntzaz hedatzen den diskurtsoa, kolektiboaren onerako dela eta denoi inposatzea zilegi ikusten dutenak daude alde batetik; eta, bestetik, diskurtso txukunaren atzean dauden manipulazio eta helmuga ilunak ikertuta, gizartea zatikatzeko ahalegin berria onartu ez eta goi mandatarien hipokrisia gelditu nahi duten herritarrak daude, garai bateko etiketa politikoez harago.

Euskal Elkargoari milaka izenpedura bidaltzen ari dira neurri baztertzailea atzera bota dezan eta protestak iragarri dituzte

Hain zuzen ere, hainbat eragileren gelditasun jasanezina apurtu nahian eta ZFE neurriaren atzean dauden gezurrak eta manipulazioak salatu nahian sortu da NON ZFE PAYS BASQUE mugimendua Ipar Euskal Herrian. Iparraldeko Euskal Elkargoari milaka izenpedura bidaltzen ari dira ZFE neurri baztertzailea atzera bota dezan, eta protestak iragarri dituzte laster.

Beherean uzten dizuet NON ZFE PAYS BASQUE mugimendukoek sare sozialetan agertu duten oharra, euskaratua:

EUSKAL HERRIKO ZFEri EZ, BAZTERKETA HANDIKO ZONALDEARI EZ.

IRUZUR EKOLOGIKOARI ETA NEURRI ANTI-SOZIALARI EZ!

2025eko apirilaren 1ean, ZFE sailkatu gabeko ibilgailuen zirkulazioa debekatua izanen da Ipar Euskal Herriko Elkargoko hainbat herritan. Ipar Euskal Herriko ZFE-m- izendatu zonaldeak (euskaraz: IGE – Isuri Guttiko Eremua) Lapurdiko kostaldeko 9 eta Landetako 2 udalerri hartuko ditu: Hendaia, Urruña, Ziburu, Donibane Lohizune, Getari, Bidarte, Miarritze, Angelu, Baiona, Bokale eta Tarnose. A63ak mendebaldera eta D810ak Urruñan mugatzen duen perimetroaren barruan kokatutako errepideetan zirkulazio murrizketak aplikatuko dira, asteko 7 egunetan eta eguneko 24 orduetan.

ibilgailuen zirkulazioa debekatzen dute motor motaren eta ibilgailuaren adinaren arabera, baina ez dituzte kontuan hartzen ez ibilgailuaren pisua, ez CO2 isuriak

Azaltzen digutenez, ZFE-m- delako zonaldeak inposatzeak airearen kalitatea hobetzea izango luke helburu, mikropartikulen eta nitrogeno oxidoaren (NOX) isurketak murriztuz, bizilagunen osasuna zaintzeko. Horretarako, kutsatzaileentzat jotzen diren ibilgailuen zirkulazioa debekatzen dute, motor motaren eta ibilgailuaren adinaren arabera. Dena den, irizpide hauek ez dira oso eraginkorrak partikulen isuriak murrizteko, ez baitute kontuan hartzen ez ibilgailuaren pisua, ez CO2 isuriak!

Espainiatik etorrita Euskal Herria egunero zeharkatzen duten milaka ibilgailu astunek ez lukete debekurik jasango. Hipokrisiaren gailurra

Hipokrisiaren gailurra; Espainiatik etorrita Euskal Herria egunero zeharkatzen duten milaka ibilgailu astunek ez lukete debekurik jasango. Norbanakoak ibilgailu funtzionalak berritzera bultzatu nahi dituzte, oso kutsatzaileak diren zenbait ibilgailuk ZFE-m-n sartzeko baimena duten bitartean. Adibidez, SUV astun handi erosi berri bat Crit’air 1 sailkatuko litzateke, eta 90eko hamarkadako auto arin txiki bat, gutxiago kutsatzen duena, Crit’air 4 edo 5. Herritarra ergeltzat hartzen dute berriz ere.

Gure herrikideen gehiengo zabalak ez du autoa plazeragatik hartzen, beharragatik baizik! Azken hori askotan gastu handia izaten da, eta begi bistakoa da denek ezin dutela ibilgailu berri bat erosi, asko dagoeneko erregaia eta beharrezko konponketak ordaintzeko borrokan ari direnean.

Dena den, lanera joan eta ezinbesteko zerbitzuetara (medikua, ospitalea, familia, eskola, supermerkatua, etab.) hurbiltzeko bide bakarra autoa da gehienetan, izan ere, konponbide alternatiboak, garraio publikoko zerbitzuak adibidez, gaur egun ez daude behar bezain garatuak eguneroko bidaiak bermatzeko.

langile klaseak zigortzen dira

Neurri honek dagoeneko debekatu egiten du Crit’Air 3, 4 eta 5 sailkatutako ibilgailuak Frantziar estatuko hainbat hirigunetan zirkulatzea, batez ere langile klaseak zigortuz. 2019an, etxe txiroenen % 38k Crit’Air 4 edo 5 sailkatutako ibilgailu bat zuten, etxe aberatsenen % 10en aldean.

Hemen izenpetzen dugunok, Euskal Herriko Hirigune Elkargoari galdetzen diogu:

Lapurdiko ZFE-m gunea berehala indargabetzea, bere eragin diskriminatzaile eta desorekatuaz gain, Frantses Errepublikaren eta Europako Erkidegoaren oinarrizko printzipioaren aurka doalako, hots, joan-etorriko eskubidearen eta merkantzien eta pertsonen zirkulazio askatasunaren aurka.