Pasa den azaroaren 4an Donostiara etorri ziren AP-8 Peajerik ez elkarteko bi kide, elkarte honek daraman ibilbidea kontatzera.
Ba al dakizu AP-8 autobidea orain dela 50 urte estreinatu zela? Orduan inguruko baserriak eta lur sailak desjabetu zituen enpresak 30 urterako kontzesioa hartu zuen. Denbora hori igaro eta gero, esku pribatuek kudeaketari utziko ziotela eta autobidea publikoa izatera pasatuko zela adostu zuten.
Denbora hori orain dela hogei urte gainditu zen arren, ordaintzen jarraitzen dugu.
Irundik Galiziaraino doan autobidean, Irundik Bilborainoko tartea ordaindu behar dugu; handik aurrera dohanik da. Zergatik desberdintasun hori?
Egun peaje gehiago jarri dira eta beste batzuk jartzeko bidean gaude. AP-1 Eibar-Gasteiz, N-636 Beasain-Bergara… eta Bizkaiko N-240 Gasteiz-Bilbo tartean kamioiei ezarri diete; gero kotxeei ezarriko diete.
AP-8 Peajerik ez elkarteak uste du kotxeak nahikoa zerga ordaintzen dituela eta errepide seguruetan ibiltzea oinarrizko herri zerbitzua dela. Donostiatik Bilborako N-634 errepidea ez da bide altenatibo ez onargarri, ez bideragarria. Kotxearen balioaren % 40 zerga da, erregaiaren prezioaren % 50 zerga da, eta errepideetan peajeak ordaintzea gehiegizko zerga da.
Elkarte honetako lagunek eta beste batzuek ez dugu ordaintzen bidesaririk publikoak diren autobide hauetan. Ordaintokira iristerakoan, han dagoen lagileari ez dugula ordaindu behar esaten diogu eta, besterik gabe, matrikularen zenbakia hartuta, langa zabaltzen digu. Langilerik ez badago, txirrina sakatzen dugu eta bozgoragailutik erantzuten duen lagunari berdin esaten diogu: ez dugula ordaindu behar, autobidea sobera ordainduta dagoela edo nahi duguna, eta zabaldu egiten digu.
Hau guztia kontatzera etorri zirenek oso landuta zeukaten gaia. Azaldu zuten zein alderdi politikok zer jarrera erakutsi duen une bakoitzean, noiz, nola eta zergatik. Laburbilduz, alderdi politiko guztiek jarrera berdina erakutsi dute eta komunikabide guztiek entzungor egin diote beraien borrokari. Baina hogei urte hauetan ordaindu ez diren pase horiek inoiz ez dira erreklamatuak izan.
Informazio gehiago elkarteko borrokalari zintzo horiek eman ahal dizuete.
Bidaia on!
AP-8 Peajerik ez taldeko kideek Donostian emandako hitzaldiaren bideoa ikus dezakezu hemen, Utzi Pakean kanalean.
Eskerrrik asko, Teresa, A8 Doain!