Gaur hedabideetan agertuko ez diren emakumeen izenak

Emakume disidenteei gorazarre

Martxoaren 8a hurbildu ahala, emakume langileen eguna, azken egunotan hainbat hedabidetan agertu dira emakumeen zapalkuntzari aurre eginez aritutako borrokalariak, zientzialariak, profesionalak, kristalezko sabaia bezalako kontzeptuak eta abar. Pandemian ere muga asko egon ziren, eta artikulu honetan aipatu nahi ditut niretzat eredugarriak izan diren emakumeen izen batzuk, ezkutuan geratu direnak azken urteotan. Edo, are larriagoa dena; noizbait aipatu izan badira, negazionista bezalako terminoekin iraintzeko izan da.

Atzerritik hasita, nire lehen hautaketa Karina Acevedo-Whitehouse da, mexikarra bera eta Querétaroko Unibertsitateko irakasle aparta. Albaitari izanik, bere ikerketa eremua animalien minbizia izan zen hasiera batean; orain immunitate ekologotzat aurkezten du bere burua. RNAm txertoen arriskuei buruzko 2020ko bideo baten bidez ezagutu nuen eta, orduz geroztik, bere hitzaldien, liburuen eta Akasha Telegram foroaren bidez jarraitzen dut ikerlari nekaezina, zientziaren ezagutza sakonaren eta zintzotasunaren adibide ezin garbiagoa delakoan. Berarekin batera Costa Ricako immunologoa den Roxana Brunok dihardu, gure defentsa sisteman txerto genikoek eragiten dituzten kalteak ikertuz eta zabalduz. Oso interesgarria da haien azalpenak entzutea; adibidez, nola aldatzen den haurdunaldian immunitatea umekia babesteko eta zein kaltegarria den txertoak epealdi horretan jartzea.

Nahiz eta kazetaria izan, Naomi Wolf estatubatuarrak zientziari eta egiari asko lagundu zion Pfizer behartu zutenean RNAm bakunen inguruko 450.000 orrialdeko txostena argitaratzera. Wolfek 3.000 zientzialari koordinatu zituen orri mordo horretatik egia azalarazteko, Independentean agertu zen moduan.

Frantziako Alexandra Henrion-Caude genetista Les apprentis sorciers (Azti ikasleak) liburu labur bezain argigarriarengatik ezagutu nuen eta erreferente garrantzitsu bat da Europako disidenteen artean.

Katalunian Teresa Forcades medikua daukagu, 2010 urtean famatu bihurtu zena hegazti gripearen sasi-pandemiari aurre egin ziolako. Covidarenean ere ezaguna izan da, Bartzelonako mediku elkargoak zigortu egin zuelako farmako alternatibo baten aldeko adierazpenak egiteagatik. Euskal Herrian ere egona da Forcades, eta hitzaldi arrakastatsuak eman ditu. Galizia aldean Natalia Prego aipatu nahi nuke, hura ere Pontevedrako mediku elkargoak zigortua eta Médicos por la verdad elkartearen sortzaileetako bat izateagatik ezaguna. Natalia Prego, Karina Acevedo-Whitehouse bezala, albiste disidenteen iturburu bat da eta hainbat harreman ditu pandemiaren errelato ofiziala desmuntatzeko lanean aritu direnekin.

Eta, Euskal Herrian, aipatu nahi nituzke Independentearen sortzaile eta ekintzaile diren Ihintza eta Irati, eta bertan argitaratu duten Ane Miren, Teresa, Ainhoa, Maite, Jasone, Ainara… Ziur batzuk ahaztuko ditudala, baina gogoan dut 2023ko uztailean, Elosuko lehen baraualdian, nola kontatu zizkiguten Ertzaintzaren atxiloketak, epaiketak (Santurtziko erizainarena adibidez), isunak, kaleratzeak, garraiobideetatik botatzea musukoa ez eramateagatik, lantokiko jazarpenak… eta zenbat ekimen ausart burutu zituzten garai ilun haietan. Noizbait testigantza horiek liburu batean bildu beharko dira pandemiaren kontakizun osoa egin dezagun, eta historian jasota gera dadin nola gizakiaren aurkako zapalkuntza horren aurrean emakumeak altxatu ziren, lege injustuen aurka Rosa Parksek 1955ean egin zuen moduan.

Noizbait testigantza horiek liburu batean bildu beharko dira pandemiaren kontakizun osoa egin dezagun, eta historian jasota gera dadin nola gizakiaren aurkako zapalkuntza horren aurrean emakumeak altxatu ziren

Guztiei, eskerrik asko.