Nadiya Popel eta Laguntza Integralerako Mugimendua
Joan den martxoaren 8an, emakume disidenteei buruz argitaratu nuen artikuluan, izen batzuk falta zirela idatzi nuen eta iruzkinetan horietako batzuk agertu ziren. Gaur beste bat gehitu nahi dut izen zerrenda horretan: Ukrainan jaiotako Nadiya Popel (1979) medikua, pandemia garaian ezagun egin zena Menorkako (Balear Uharteak) bere ospitaletik kanporatu zutelako Covid txertoen aurka agertu zuen jarreragatik. Movimiento por el cambio izeneko liburua idatzi du Popelek eta bertan bere ibilbidea azaldu du: bere jaioterrian medikuntza ikasketak hasi ondoren, 2001ean espainiar estatura joan zen eta han burutu zituen unibertsitate ikasketak. Ondoren, MIR azterketa gaindituta, Menorkara joan zen familia medikuntza espezialitatean jardutera. Gaztaroan ezagutu zuen Sobiet Batasuneko bizimoduak eta Ukrainaren izaerak baldintzatu zuten erabat Covid pandemiaren aurrean Nadiyak izan zuen jarrera.
2007tik aurrera, Maó hiriburuko ospitaleko larrialdi zerbitzuan lanean jardun zuen eta 2020. urtean gertatutako egoerak sobieten diktaduran jasandakoa oroitarazi zion, gehienbat osasun arloan egindako beldurraren erabilpenagatik. Hasieran hala moduzko irtenbideak bilatu bazituzten ere, Osasunaren Munduko Erakundetik (OME) bidalitako protokolo eta aginduek gehiago aztoratu zuten; izan ere, Covid gaixotasuna identifikatzea zen helburu nagusia eta, gerora, bakuna genetikoen ondorioak estaltzea, horiek agertzen hasi zirenean; adibidez zainetako tronboak, inoiz ikusi gabeko modukoak. Egunero zetozkien aginduek ez zuten ez hanka eta ez bururik (musukoak, batak, PCRak, autopsien debekua..) eta helburua den-dena Covid izendatzea zen, nahiz eta hezur haustura bat edo minbizia izan.
nahiz eta kideekin eta zuzendariekin hitz egin, jarrera nagusia sumisioa eta beste alde batera begiratzea izan zen
Zorigaiztoko egoera horretan, berebiziko aldaketa ekarri zion Nadiya Popeli 2021eko apirilaren 8an Es Diari Menorkako egunkarian artikulu bat argitaratu izanak. Testu horretan larrialdietako mediku gisa izan zituen bizipenak eta iritziak azaldu zituen eta Covid bakunen arriskuez idatzi zuen. Berehala, bere ospitaleko agintariek mehatxu egin zioten, txertaketa masiboa oztopatzen ari zelakoan. Berak ospitalean bakunen ondorioak ikusten zituen, Guillain-Barré paralisiak, iktusak, zefaleak, aurpegi paralisiak, takikardiak… Popelek idazten duenez, jende guztiarekin egindako saio esperimental baten lekuko izan zen, eta inoiz bizi izan gabeko larritasun eta zabalkundearekin. Salaketa hori egiteak ospitaleak espediente bat zabaltzea ekarri zion, eta 2021eko maiatzean bere lanpostutik bota zuten. Nahiz eta bere kideekin, zuzendari medikuekin eta gerentearekin hitz egin, nahiz eta haiei berak bizitakoa azaldu eta kasu askoren historial klinikoak erakutsi, jarrera nagusia sumisioa eta beste alde batera begiratzea izan zen. Asko jota laguntza psikologikoa eskaini zioten. Laster, negazionista izendatu zuten eta, horrekin, gizartearen “areriotzat” hartu zuten.
Segidan, Médicos por la verdad taldearekin bat egin zuen Nadiyak eta, 2021eko udazkenean, laguntza medikoa emateko talde bat osatu zuten, 30 kiderekin, albokalteak pairatu zituzten gaixoak tratatzeko. Hasieran, mugimendu horrek telefono bidezko artapena eman zuen; hortik aurrera, egindako bilera, manifestazio eta hitzaldien bidez, ezagunagoa egin zen. Urte hartako gabonetan, Pfizer txertoak eragindako kalte baten ondorioz gaixo madrildar bati zangoa moztu behar izan ziotenean, Popel doktorea konturatu zen talde multidiziplinarra (zirujauak, psikologoak, fisioterapeutak,…) beharrezkoa zela halako kasuen aurrean. Sare sozialetan laguntza dei bat egin zuen eta 200 lagun laguntzeko prest agertu ziren. Horrela hasi zen Movimiento de Asistencia Integral edo MAI (Laguntza Integralerako Mugimendua). Hiru astetan 600 lagun artatu zituzten.
paradigma berri bat beharrezkoa da osasungintzan eta Euskal Herrian ere horrelako saiakera bat egitea pentsatu zen
Gaur egun, ehunka lagun biltzen ditu MAI mugimenduak. Nahiz eta hasiera batean Covid pandemiaren ondorioak artatzea izan haren zeregin nagusia, denboraren poderioz garapen bat izan dute eta, orain, beste medikuntza mota bat eskaintzeko daude eta behar berriei aurre egiteko aukera ugari jartzen dute denon eskura; horien artean, terapia alternatibo deiturikoak. Movimiento por el cambio liburuan MAIko partaideen gida bat dago, eta bertan laburki azalduta zer terapia mota egiten duten. Autoreak dioenez, paradigma berri bat beharrezkoa da osasungintzan. Euskal Herrian, pandemia garai gogorretan, horrelako saiakera bat egitea pentsatu zen Elgoibarren. Natalia Pregok ere noizbait osasun-etxe alternatibo bat eratzeko asmoa azaldu zuen. Argi dagoena da gogotsu dihardutela emakume horiek.
