Espainiako Estatuko gobernuak baserriko hegazti guztiak konfinatzeko agindu du

Hegazti-gripea eta Covid pandemiaren arteko paralelismoa

Duela gutxi oiloak konfinatzeko agindua ezarri da, pandemian populazioaren konfinamenduarekin egin zen bezala, irizpide zientifikorik gabeko erabaki tamal eta kaltegarria berriz ere.

Dioskutenez, hegazti-gripearen kasuan, oiloak konfinatzeko arrazoia da libre ibiltzean gorotzekin, lumekin edo ur kutsatuekin kontaktuan jartzeko arriskua dutela, eta etxeratzeak murriztu egiten omen duela kutsatzeko aukera. Hegazti-gripea jariakinekin kontaktu zuzena edukita transmititzen dela diote. Konfinameduaren neurriarekin kutsatutako hegaztiak beste osasuntsu batzuekin kontaktuan jartzea saihesten da, eta kanpoko basa-hegaztiekin kontaktua murrizten da.

Bestalde, hegazti-gripearen detekzioa PCR teknikarekin egiten da, sintomatologiaren arabera eta baieztatzeko birus-isolamenduaren bidez, baina oilo asintomatikoek kutsa dezaketela ere esaten digute.

Era berean, gizakiarekiko transmisioa oso arraroa dela baieztatzen digute, eta, betiere kasuren bat gertatuz gero, kutsatutako hegaztiekin oso gertuko kontaktua izateagatik izango litzatekeela, eta inolaz ere ez pertsonatik pertsonara kutsatzea, ezta arrautzak edo oilasko-haragia kontsumitzeagatik ere.

zientziaren absentzia erabatekoaren aurrean gaude berriro

Pandemian zehar gertatutakoarekiko paralelismoa aztertuz gero, hegaztien gripearekin akats berberak egiten direla ikusiko dugu:

• Baldin eta, diskurtso ofizialak dioen bezala, birusa oiloen edo hegazti basatien arteko sekrezioekin kontaktuan egoteagatik transmititzen dela onartzen bada, esan beharko da konfinamenduan aire zabalean baino kontaktu zuzen handiagoa izango dutela eta — pandemiarekiko paralelismoa bilatuz — ofizialismoaren baieztapen horrek zera esatera garamatza: Covid delakoa ezin izan zela inoiz ere eman saguzar edo pangolinekin izandako kontaktu zuzenagatik.
• Detekzioa PCR bidez egiten bada, denok dakigu zer gertatu zen pandemian sintomarik gabeko positiboekin. PCRa ez da diagnostiko teknika bat ez baldin bada laborategiko kultibo batekin berresten, eta ez dut uste etxaldeetan kultibo mota hori egingo denik. Covid pandemian zehar Osasun Ministerioak berak aitortu zuen Sars-Cov-2aren laborategiko kultiborik ez zela egin.
• Halaber, berriro ere zientziari muzin eginda oilo asintomatikoek kutsa dezaketela eta transmisioa kontaktu zuzenaren bidez egiten dela onartzen bada, orduan konfinamendua erabat kaltegarria da, haien estresa handitzen delako eta kutsatzeak areagotuko liratekeelako.
• Oiloak konfinatuta eta haien arteko kontaktu zuzenarekin egotea hobe dela dioen baieztapenaren aurrean, zientziaren absentzia erabatekoaren aurrean gaude berriro; izan ere, kanpoan egonda, kontaktu hori txikiagoa izango litzateke haien artean, eta ez legoke aukera handirik basa-hegaztiekin kontaktu zuzen hori izateko.

ahaztu egin behar dugu behingoz euskal erakunde eta alderdiek Euskal Herriaren aldeko apustua egingo dutenik. Pandemian horixe erakutsi ziguten

Espainiako Estatuko gobernuak baserriko hegazti guztiak konfinatzeko agindu du, baina, adibidez, EAEn, Elixabete Etxanobe Bizkaiko Diputatu Nagusiak esan du ez dela kutsatzerik izan; beraz, neurria gehiegikeria da.

Neurri azientifiko garratz horren aurrean, euskal erakundeek eta alderdi politikoek, subiranotasuna eta autogobernuaren aldeko apustua baztertuz, Espainiako Estatuko gobernuak ezarritakoa obedituko dute. Burujabetzaren eta autogobernuaren alde gaudenok ahaztu egin behar dugu behingoz alderdi horiek Euskal Herriaren aldeko apustua egingo dutenik. Pandemian horixe erakutsi ziguten.