Satorralaiaren deialdia, ostiralean Donostiako Metroaren San Martin kaleko obragunean elkarretaratzeko eta igandean Turistifikazioaren Aurka egingo den manifestaziora biltzeko
Donostian hilabete honetan zehar BizilagunEkin plataformak antolatu duen TURISTIFIKAZIOAREN AURKAKO URRIA dela eta, Satorralaia bizilagunen mugimenduak datorren urriaren 27an, igandean, eguerdiko 12:00etan Alderdi Ederretik abiatuta egingo den manifestaziora biltzeko dei egiten du, “Arriskuan gaude: Desazkunde turistikoa orain!” lemapean. Bestalde, urriaren 25ean, ostiralean, Donostiako Metroaren San Martin kaleko obragunean elkarretaratzea egingo dugu, arratsaldeko 18:30ean (Urbieta kalearen izkinean), hain zuzen ere gure hiriaren turistifikazioa salatzeko Jauzi Ekosozialak arratsalde horretan deitu duen bizikleta martxari sustengua adierazteko. Hori dela eta, turistifikazioaren ondorio larriak salatzeko datozen egunetan egingo diren ekintzetan eta manifestazioan parte hartzeko dei egiten dugu.
Satorralaiaren ustez, Donostiako Metroaren eraikuntza ez da gure hirian nozitzen ditugun turistifikazioaren eta hirigintza espekulazio hazkorraren arazoekin zerikusirik ez duen afera bat. Donostiako Metroak Erdialdeko eta Kontxako zonalde turistiko eta komertzialaren inguruan trazadu zentralizatzaile bat ezartzen du, nabarmenki, eta hori gure hirian nozitzen ditugun turistifikazioa, merkataritzako “frankizia” handien hedapena eta negozio inmobiliarioak indartzera dator. Herritar gehienen iritziz zeharo behargabekoa den garraio azpiegitura-lan handi hori Donostian kosta ahala kosta sustatzen ari den hiri-ereduaren parte da beraz: turismo gehiago, kontsumo gehiago, hirigintza-espekulazio gehiago.
Hortaz, ostiralean elkarretaratzera biltzeko animatu eta igandeko manifestazioan parte hartzeko dei egiten dugu.
Satorralaia bizilagunen mugimendua
(Tlfnoa 695715510)
