Kaixo! Atxikita bidaltzen dugu joan den urtarrilak 26 astelehenean Donostian Josema Azpeitia gastronomia-kazetariak eta Ahoztar Zelaieta ikerketa-kazetariak Basque Culinary Center sustatzen ari den elikadura eta negozio eredua auzitan jarriz eman zuten hitzaldiaren bideoa.
Hitzaldi-eztabaidara bildutako jendeak Okendo Kultur Etxeko aretoa lepo bete zuen. Arreta hori, dudarik gabe, Culinary Centerrek GOe izeneko eraikina altxatzeko Okendo Aldeko lurzorua okupatuz eta Manteoko Parkea suntsituz Donostiako udalaren laguntzarekin egin duen ondare publikoaren espoliazioak herritarren artean eragindako gaitzespen zabalaren ondorio da.
Bada, horrez gain, Basque Culinary Centerren aferari beste ikuspegi kritiko batetik heldu diote hizlariek joan den urtarrilaren 26ko hitzaldian, hain zuzen ere fundazio kulinario hori berrikuntza gastronomikoaren itxura otzanaren pean sustatzen ari den elikadura eta negozio ereduari buruz kritika zorrotza eginez eta eztabaidan jarriz.
Bideoa zuen inguruan zabaltzea eskertzen dugu beraz.
Agur eta eskerrik asko.
