Estatu Batuak, Gaza eta armamentuaren eragina
Trumpek esandako azken astakeriak erreakzio ugari eragin ditu. Baina ez gaitu ustekabean harrapatu, aurretik beste batzuk ere esan baitzituen, Groenlandiaren edo Panamako kanalaren ingurukoak.
Orain arte Palestinaren gaia Bidenekin ankerra izan bada, Estatu Batuen armekin Israelgo Armadak ospitaleak ere bonbardatzen baitzituen, badirudi ez zela nahikoa. Izan ere, orain Trumpek marka guztiak hautsi ditu AEBk Gazako zerrenda hartzeko asmoa dauka, eta palestinarrak kanporatu nahi ditu. Alde egiteko gomendioa Israelgo Estatuak ur et argi mozketekin edo lur-lapurretarekin ezartzen dizkien bizi-baldintza txarren aitzakian egin da.
Trumpek esan duen horrek argi uzten du Mendebalde osoa dela Palestinako herriaren aurkako genozidioaren jakitun; beraz, nire ustez, 2023ko urriaren 7ko atentatuak ez luke harritzekoa izan behar eta, gainera, Israelek legea bete izan balu, saihestu egin zitekeen.
Laburbilduta, esan beharra dago Trumpek aurreko legegintzaldian ezarri zuela Estatu Batuen enbaxada okupatutako Jerusalemen, eta gero Marokorekin negoziatu zuen herrialde horrek Israelgo Estatua onar zezan, AEBk Mendebaldeko Sahararako legez kanpoko autonomia plana onartzearen truke. Horren ondoren, eta Gaza bonbardatzen ari zirenean, Bidenek, Nazio Batuen Segurtasun Kontseiluan Estatu Batuen beto-eskubidea erabiliz, Mendebaldeko aliatuen isiltasunarekin eragotzi zuen Palestina eskubide osoko kide gisa sartzea Nazio Batuen Erakundean.
arma-gastua nabarmen handituko duela iragarri du Sanchezek
Azken hori diot argi gera dadin gure politikari gehienek ez dutela ezer esan israeldarren bonbardaketa kriminalei buruz. Horren harira, eta AEBk sustatutako arma-testuinguru honetan, Sanchezek amore eman du Trumpen presioen aurrean, eta datozen hilabeteetarako arma-gastua nabarmen handituko duela iragarri du. Beharbada, Sanchezi ahaztu egin zaio, besteak beste, osasun publikoko itxaron-zerrendetan 850.000 pertsona daudela. Argi dago, etorkizun duina izan nahi badugu, herritarrok mobilizatu egin behar dugula interes soziala bermatzeko.
