Itxuraz normaltasun egoera bat saltzen diguten bitartean, azken 2 urteetan bizitakoaren ondorioen, Errusiara atentzioa desbideratuz sortzen ari diren hainbat akordioren eta mundu mailako proiektua zehazten duen 2030 Agendaren jakitun garenok, herritar guztiei deia luzatzen diegu plazetan elkartu eta hausnarketa sakon bat egiteko. Elkartasuna eta Auzolana gure iraganaren ondare bizia diren bezala, gure etorkizunerako baliabide izatea nahi dugu.
Gizakion izaera sortzailea da eta egitasmo eta proiektu ezberdinak sor ditzakegu
GizaArteGintza pertsonen arteko bilkura bat da, elkar entzunez, elkar elikatuz, giza harremanen oinarri sano eta sendo bat sortzeko helburuarekin. Gizakion izaera sortzailea da eta egitasmo eta proiektu ezberdinak sor ditzakegu, baina, berez, GizaArteGintza ez da erabaki gune bat, harremantzeko eta elkarrekin hausnartzeko espazio bat baizik.
GizaArteGintza zabalik dago pentsaera ezberdin guztietako jendea biltzeko, elkarren arteko itxurazko trabak erortzen utziz, itxuratik kanpo ez baikara hain ezberdinak. Adin ezberdin guztiei irekia ere bada, aniztasunak gizartea bere osotasunean hobeto ulertzen lagunduko baitigu.
Pentsaera eta adin guztietako jendea biltzeko
Gure herrikide eta lagunen arteko topaketa, alaia, benetakoa izatea bilatzen dugu. Azken hamarkadetan nagusitu diren gizarte dinamiketatik, benetako burujabetza bideratuko duten beste batzuetarantz joan behar dugu eta, hazi berriak erein eta ernetzeko, lurra ongarritu beharra dago. Horra hor GizaArteGintzaren gogoa eta asmoa: auzolana eta burujabetza.
Mahai gainean izango dugun gaia honakoa izango da: nolako mundua utzi nahi diegu ondorengoei?
Apirilaren 3an Beasainen egingo den saioan lau hizlarik parte hartuko dugu: Pako Iriarte, Joseba Argintxona, Alfonso Longo eta nik neuk. Mahai gainean izango dugun gaia honakoa izango da: nolako mundua utzi nahi diegu ondorengoei? Hasierako hitzartzeen ondotik, bertaratutako guztiei luzatuko zaie gonbidapena talde txikitan jarrita gaiaren inguruan sakontzeko.
Ondoren, elkarrekin mokadutxo bat egiteko bazkari elkarbanatu autokudeatua izango da.
Oso ekimen interesgarria eta beharrezkoa, Idoia, bejondeizuela!
Oso gogoko ditut planteamenduan honako hauek:
* “elkar entzunez, elkar elikatuz, oinarri sano eta sendo bat sortzeko.”
* “ez da erabaki gune bat, harremantzeko eta elkarrekin hausnartzeko espazio bat baizik.”
* “pentsaera ezberdin guztietako jendea biltzeko”
Bestetik, zera aldatuko nuke denbora antolaketan: zuzenean emango nioke goizeko tarte osoa parte hartzaileen ekarpenei eta talde txikiei, hasierako 4 hizlarien tartea kenduta.
Agenda zuri izan hasieran, eta bertaratutakoei eskaini aukera, nahi dituzten gaiak plazaratzeko eta taldetxoen ardura hartzeko, ondoren jendea taldeka autoeratu daiten. Aldi berean, gaikako talde ugari bor-borrean. Eta taldeetako bileretako laburpenak jaso eta zabaldu, ahal bada.
Norbanako batzuen ekarpenei pisu berezia eman nahi izanez gero, aurrez bidali haien dokumentazioa (testu, audio, edo dena delakoa), baina elkartze denbora osoa bertaratutakoen esku utzi berdintasunean partekatzeko.
Sorpresa eder ugari agertu ohi dira horrela eginez gero!
Uste dut horrela askoz emankorragoa eta arinagoa izango litzatekeela topagunea.
Zorterik onena opa dizuet, oso ondo pasa igandean!
Baita!
https://eguzki.org/2022/01/21/libro-connstruir-euskal-herria-desde-la-ecologia/