Elkarren berotasunaren bila etorri gara goiz hotz honetan Besainera, gizatasunez, errespetuz, maitasunez eta askatasunez denon hitzari tokia eman dion espazioa sortuz: modu dinamikoan, horizontalean eta borobilean.
Idoia, Joseba, Alfonso eta Pakoren hitzartzeekin hasi da saioa eta bakoitzak bere baitatik kontatu digu zerk bultzatu dituen plazara ateratzera: bizi dugun errealitateaz jabetuta, gezurretan itsututa eta beldurretan itota amildegira zuzendu nahi gaituzten honetan, zentzuna berreskuratu eta elkarbizitza eraikitzeko aukera hau eskaini nahi izan dute.
Azken bi urteetan inozentzia galdu izana sentitu du zenbaitek, gogorra suertatzen den arren dinamika inperial batean gaudela: uniformatu eta zentralizatu, ganadua bezala kontrolatzeko gizakiak. Nola aurre egin horri? Eskuekin, tribuarekin, berezkoak ditugun gaitasunekin, plazetara ateraz, ospatuz…
Lan-taldeetan bilduta sakondu dugu ondoren 6-7 lagunen artean, prozesuaz disfrutatuz, elkar entzunez eta epairik gabe. Zer mundu uztea gustatuko litzaiguke gutako bakoitzari?
Ideia ezberdinak plazaratu ditu ondoren talde bakoitzak, baina asko izan dira errepikatu direnak ere.
Hagina landatu eta Pellok gaurko prestaturiko bertsoa entzunez amaitu da goiza:
Aldatu dugu hagina
konpromezuaren zuhaitza
handia izango baitugu
lortuko dugun emaitza
koronabirusa ez da
gu gaixotzen gaituen gaitza
guretzat prestatu dute
oso etorkizun beltza
Plazara irten gara
ta askatasunez mintza
menperatu nahi gaituzte
baina alferrik dabiltza
gaur haginaren aurrean
ziur ematen dugu hitza
defendatuko ditugu
duintasuna eta bizitza.
