Azkenaldian
bertigoa loezinaren erdian,
borrokari ekin ala ihes egin
Termometroak zero;
eskuak izoztuta, bihotza bero,
takikardia ez dadila sinkopatu
Gero tunel-ikuskerak
iragartzen du amaiera
Betiko nahi dut iraun,
zurekin ikusi gerturatzen Andromeda;
gauak izutzen nau,
haur bat naiz kulunka bizitzaren magalean
Noraezean, banoa,
neu belaontzia eta ozeanoa;
haserre dut itsasoa arterietan
Idatzi ditzadan hitzak
momentu hau azkena bada niretzat,
erredentzio-eskari izan bitez
Gero tunel-ikuskerak
seinalatzen du amaiera
Betiko nahi dut iraun,
zurekin ikusi gerturatzen Andromeda;
gauak izutzen nau,
haur bat naiz kulunka bizitzaren altzoan
Betiko nahi dut iraun,
zurekin ikusi gerturatzen Andromeda;
gauak izutzen nau,
haur bat naiz kulunka bizitzaren magalean
