Duela aste batzuk, Teleberriko albisteen artean, Arrigorriagan dendari txinatar batek jasandako erasoa agertu zen. Arrigorriagako alkateak Teleberrin azaldu zuenez, herri horretan “soberan daude arrazakeria eta eraso sexistak”. Azkenik, kronika egin zuen kazetariak adierazi zuen Ertzaintzak ikerketa hasi zuela ustezko gorroto-delitu bat egon zitekeelako.
Handik bost minutura, Teleberri bereko beste albiste batean, New York-eko (AEB) Marcy-ko kartzelako erizaindegian, polizia batzuek R. Brooks presoa, arraza beltzekoa bera, nola itotzen duten ikusten da.
Orduko horretan, ordea, ez zen balizko krimen arrazista bati buruzko iruzkinik egin albistegian, nahiz eta AEBn bertan, G. Floyd-en hilketaren ondorioz, herritar beltzen aurka poliziak egindako gehiegikerien aurka protesta izugarriak egin ziren.
Gainera, Marcy-ko espetxeko kasu horretan arazoa larriagoa da; izan ere, New York-eko kartzeletako ikuskaritza-talde batek (CANY delakoak) duela bi urte dokumentatuta zituen espetxeko langileen basakeria orokorrari eta arrazakeriari buruzko txostenak, Marcy-ko presondegira egindako ikuskapen-bisita batean jasoak, eta bertan hil zuten poliziek R. Brooks.
