Urtarrilaren 31ko mobilizazioaren egunean eta bezperan, Topaketa Internazionalistak Baionan

Baxenabarreko EHEren

Prentsa-agiria

Urtarrilaren 31ko mobilizazioaren egunean eta bezperan, Topaketa Internazionalistak Baionan

Otsailaren 5ean, EHE mugimenduko lau kide Baionan epaituko dituzte, 2025eko irailaren 27an Departamenduaren Baionako egoitzaren horman “Euskaraz bizi nahi dugu” margotzeagatik.

Jakinik historikoki frantses Estatuko agintariek dutela euskara gutxiengoan ezarri, gutxiengo egoera horretatik ateratzeko euskarak behar duen diru kopuruari begira frantses instituzio politikoetako agintariek ematen dutena ez da batere aski. Ekintza horrekin hori salatu zuten, eta baita agintari hauek euskaldunak bigarren mailako herritar egiten gaituztela ere.

Auziperatu hauekiko elkartasuna erakusteko eta euskaraz bizi nahi dugula ozen adierazteko, urtarrilaren 31n 12:00etan egoitza horren aitzinean mobilizazio bat antolatu du EHEk. Euskaltzale guziak mobilizazio horretan esku hartzera gomitatzen ditugu.

Testuinguru horretan, joan den abenduaren 17an, 14 militantek Baionako epaitegi aitzinean prentsaurreko bat eman genuen. Euskararen aldeko, lurrarekin eta etxebizitzekin espekulatzearen aurkako eta etorkinak laguntzearen aldeko militanteen aurka azken hilabeteetan Baionan izandako zonbait auzitan epaileek 17 auziperatuei euskaraz deklaratzea debekatu digutela salatzeko prentsaurreko hori eman genuen.

Arazoa, beraz, Euskal Herrian epaileek ere bigarren mailako herritar egiten gaituztela da. Epaile hauek beraz, epaile eta arazo dira, eta ondorioz ez gaituzte zuzentasunez epaitzen.

Epaitegietan euskaraz hitz egitea frantses Konstituzioak debekatzen digula diote epaileek. Horiek hola, frantses Estatuko hizkuntza autoktonoak gutxiengo egoeratik ateratzeko borroka elkarrekin eramateko, Baionan urtarrilaren 30ean eta 31n Topaketa Internazionalistak eginen ditugu eta euskaltzale guziak topaketa hauetan esku hartzera gomitatzen ditugu. Loturik doan kartelean duzue topaketen aurkezpena.

Bukatzeko, euskaltzaleak datorren larunbatean Seaskak Baionan (urtarrilaren 24an, 15:00etan Xaho Kaian) antolatzen duen manifestaldian esku hartzera deitzen ditugu.

EHE mugimenduko lau auziperatuak

eta Baxenabarreko EHE