Txosnak, marrak eta ticket bai

Aurtengo edozein herriko jaixetan, ez dakit noren bidez finantzatuko ditudan elikadura korporazioak, Hautudeterminazio ariketa nekeza izango da mugimendu sozialista deiturikoari leku batzuetan ezartzen zaion beto bidegabea dela eta.

Gustura ibili ohi gara jaiguneetan herri mugimendu desberdinekiko elkartasun ekonomikoa praktikatzen, zorrozki begiratu gabe norena den txosna, denek herrigintza eta elkartasuna dutelako helburu. Garrantzitsuena batzen gaituena da; giro onean herrigintzarako dirua bildu eta jaigune herrikoiak sustatzea.

Zein gustura hartuko dudan Palestinaren aldeko kalimotxo sionista baso berrerabilgarri morean

Urtetik urtera, ordea, badirudi kakakola eta zaborjana Palestinaren alde, feminismo erradikala, transfeminismoa, etorkinak, ekologia, iraultza sozialista, euskara edo presoen alde hartzea hautatu beharra dugula. Azken finean, hiruzpalau korporaziok hornituko ditu freskagarriz, edari alkoholdun, ur botilaratu zein ogitartekoetarako lehengaiez, munduko desmasia ekosozial guztiekin aberasten ari diren diru funtsek hain zuzen ere, baaaaina dirua biltzeko orduan errentagarritasuna bilatu behar dugu, haiexek bezala. Txin, txin. Agian bokatak eta kakakolak baino errentagarriagoak lirateke putak eta kokaina, baina marra gorri batzuk gurutzatzea suposatuko luke, oraingoz aski dugu marra txuriekin. Jaiak elkarrekin gozatzeko direlako, ez halako buruhausteetarako. Ez ditzagun nahasi festak eta politika, arren.

Zein gustura hartuko dudan Palestinaren aldeko kalimotxo sionista baso berrerabilgarri morean.

Zutabetxo hau atontzear dagoela, beste detailetxo txiki batez jabetu naiz: txosnei Ticket Bai inposatzeko asmoa erakutsi omen dutela hagintariek; halako injustiziarik!

Bi urte inguru dira Ticket Bai sistema inposatu zutela: azeri digitala oilategia zaintzen

Bi urte inguru dira iruzurraren aurkako Ticket Bai sistema inposatu zutela: azeri digitala oilategia zaintzen. Txapuza digital horrek pertsiana ixtera behartu du hainbat eta hainbat langile autonomo eta beste autonomo guztiei bizitza konplikatu die, bide batez saltzaile handikiei oztopoak garbituz. Harakina, iturgina edo plazan lau letxuga saltzen dituen baserritarra dira Osakidetzaren, hezkuntzaren edo pentsio duinetarako diru eskasiaren errudun. Eskerrak baditugula atzerriko inbertsore eskuzabalak eta bertako enpresari jatorrak ekonomia suspertu eta zergak ordaintzeko.

Orain arte inork entzun al du txosnen atzean dabilen firmaren bat Ticket Bairen gaineko kezkaren bat azaltzen? Neuk ez behintzat.

Hori bai, zergarik gabeko kakakola edateko eta zaborjana jateko eskubide osoa dugu progresismo intergalaktikoaren izenean!