Sollube-gane proiektu eolikoaren aurkako alegazioak aurkeztu ditu SOS Sollube herri-plataformak

SOS SOLLUBE herri-plataformaren prentsa-oharra:

SOS Sollube herri-plataformatik komunikabideei dei egiten diegu gaur erakundeei erakusteko Sollube-gane proiektu eolikoaren aurka gaudela, argi eta garbi. Gaur hemen aurkezten ditugun herri-alegazioak taxutzeko eta zabaltzeko izan dugun epea oso laburra izan bada ere, 3.289 sinadura, eta, sinadura horiekin batera, hirigintza- eta ingurumen-eraginak baloratzeko alegazio teknikoak ere aurkeztuko ditugu.

Proiektu honen ibilbidea 2023ko abenduan EAEko Aldizkari Ofizialean argitaratu zenean hasi zen. Harrezkero, proiektu hori ezartzeak ekarriko lituzkeen arriskuez kontzientziatzeko lanean ari gara.

Gaur Industria Administrazioaren Bizkaiko Lurralde Ordezkaritzan aurkezten ditugun alegazioek agerian uzten dute Grupo Arenak gure mendietan jarri nahi duen megaproiektuaren aurkako jarrera eta kezka.

Kezkaz ikusten dugu 2023az geroztik eta Nafarroan bakarrik 51 proiektu izapidetu dituen enpresa batek Sollubeko baliabideak ustiatu nahi izatea, gero Zamudioko Parke Teknologikoan dauden enpresek energia hori kontsumi dezaten.

Salatzen dugu administrazio-prozesu honen erabateko opakutasuna, industria-proiektu horien instalazioa arautzen duten legeak eta araudiak urratzen dituena. Kezkatzen gaitu gaur egungo testuinguruan, energiak eta bere ekoizpenak hainbesteko garrantzia hartu duten testuinguruan, planetaren zati handi bat hamarkadetan pobretzen jarraitzen duen espoliazio-eredu bera errepikatzeak. Ezin dugu onartu beharraren banderapean eredu bat erreproduzitzen jarraitzea, pasatzen diren lurrak suntsitzen eta pobretzen dituzten erauzketa-enpresei baino mesede egiten ez diena.

Ez dugu ulertzen administrazioak beste alde batera zelan begiratzen duen proiektu horien ezarpena arautu behar duen araudia betetzen ez duen bitartean. Ez dugu ulertzen nola izapidetu daitekeen 195 metroko 6 aerosorgailuz eta 117 metroko dorre meteorologiko batez osatutako proiektu industrial bat, Bermeo, Meñaka eta Arrietako landa-guneetatik 500 metro eskasera eta zenbait herritatik 2 km eskasera dagoena.

Nola hitz egin daiteke iraultza berde eta ekologikoaz, kontuan hartzen diren interes bakarrak inplikatutako enpresenak badira?

Horrez gain, 12,5 km-ko linea elektrikoak Meñaka, Gamiz-Fika, Arrieta eta Zamudioko udalerrietan ere izango du eragina. Ez dugu ulertzen Eusko Jaurlaritzaren eta Aldundiaren aztarnategi arkeologikoak, fauna, flora, paisaia, biosfera-erreserbak… kontserbatzeko planak ez betetzea eta erakunde horiek berak aritzea proiektu hau izapidetzen.

Lotsagarria da, horretaz guztiaz gain, auzorik eta herririk kaltetuenei horren berri eman nahi ez izana. Nola egon daiteke interes publikoko proiektu bati buruz hitz egiten, jende kaltetuenaren informazioa, galdera eta kezkak jasotzen ez badira? Nola hitz egin daiteke iraultza berde eta ekologikoaz, kontuan hartzen diren interes bakarrak hemen inplikatutako enpresenak badira?

Eredu energetikoa birplanteatzea eskatzen dugu

Horregatik guztiagatik, Sollube-ganeko proiektu eolikoa geldiaraztea eta Euskal Herri osoan zehar 100 proiektu baino gehiago izapidetzen izatera eraman gaituen eredu energetikoa birplanteatzea eskatzen dugu. Era berean, udalei eta gainerako erakundeei eskatzen diegu SOS Sollube plataformarekin eta lurralde osoan urte hauetan zehar sortu diren gainerako plataformekin inplikatzeko eta horiei laguntzeko. Gure ustez, bere baliabideekin eta gure sarearekin fronte zabala sor daiteke, Sollubeko proiektua bezalako beste proiektu industrial eta espekulatiboei aurre egin ahal izateko.

Lurra, bertako baliabideak eta jendea defendatuko ditugu. Beren beharrak asetzeko herritik sortzen diren ekimenak defendatuko ditugu. Eta, jakina, proiektu megalomano hauei laguntzarekin, senidetasunarekin eta elkartasunarekin egiten eta egingo diegu aurre.

Solluben makroeolikorik ez!

Bilbon, 2025eko azaroaren 10ean

SOS SOLLUBE