Kaixo! Datorren urriak 22 igandean, Gipuzkoako Mendiak Aske koordinakundeak “ENERGIA(K) EZBAIAN” izenburupean bertso saioa eta herri bazkaria antolatu ditu Zizurkilen, mendietan zentral eolikorik nahi ez dugula aldarrikatzeko eta Tolosaldeko udalerri honetan Green Capital enpresak Ezkeltzu mendian sustatzen duen egitasmo txikitzailea gelditzeko borrokan Andatza-Ezkeltzu Bizirik elkartearekin bat egiteko. Eguerdiko 12etan, Andoni Egaña, Maialen Lujanbio, Aitor Bizkarra eta Oihana Iguaran bertsolariak arituko dira, Zizurkil goiko elizan, energiaren gaiari ikuspegi anitzetatik kantuan. Ondoren herri bazkaria egingo da zimiterioan (oharra: bazkarirako izena eman behar da honako helbidera idatziz: gma@ni.eus).
Hori dela eta, urriaren 22an Zizurkilen biltzeko animatu eta deialdia zabaltzeko eskatzen da.
Antolatzaileek ekimen honen inguruan informazio gehiago emanez kaleratu duten deialdia honako hau da:
«Orain dela urtebeteko urrian, Elosun elkartu ginen, mendiak babestu nahi ditugula eta mendietan zentral eolikorik nahi ez dugula aldarrikatzeko.
‘Energia berriztagarria bai, mendiak txikitu ez’ lelopean bat egin genuen honako taldeek: Oletan ere ez (Azkoitia), Sañu bizirik (Azpeitia), Sainu Bizirik (Zestoa), Karakate Bizirik (Elgoibar, Soraluze, Bergara), Urretxu-Zumarraga Bizi! (Urretxu-Zumarraga), Andatza-Ezkeltzu Bizirik (Zizurkil) eta Andatza-Ezkeltzu Bizirik (Ursurbil). Eta elkarrekin bidea abiatu genuen, Gipuzkoako Mendiak Aske izenpean.
Urtebeteko ibilbidearen ondoren, Zizurkilen elkartuko gara, ospakizuna eta aldarrikapena bateratu nahian, urriaren 22an.
Ospatuko dugu Gipuzkoako mendiak babesteko sarea sortu eta sendotu egin dugula urtebete honetan eta aldarrikatuko dugu mendiak aske nahi ditugula, industrializatu barik, gure gazteen eta seme-alaben etorkizuna izaten segi dezaten.
Horretarako, honako egitaraua antolatu dugu:
Energiaz hausnartzeko, 12:00etan, ‘Energia(k) ezbaian’ izenburuko BERTSO SAIOA, herritarrei energiaren inguruko gaiei buruz iritzi ezberdinak jasotzeko aukera eskainiz; bertso saioa San Millan elizan izango da, punta-puntako bertsolarien partaidetzarekin:
Aitor Bizkarra
Andoni Egaña
Maialen Lujanbio
Oihana Iguaran
Gai-jartzailea: Saroi Jauregi
Sarrera 10 euro; umeek borondatea. Aldez aurretik zein egunean bertan eros daitezke.
14:00etan, HERRI BAZKARIA kantaldi eta guzti, eta amaieran kalejira. Herri bazkariko produktu guztiak bertakoak eta ekologikoak izango dira.
Bazkaria: 15 euro; umeek borondatea.
Bertso-saiorako zein bazkarirako txartelak honako lekuetan eros daitezke (bazkarirakoak urriaren 15a baino lehen): ANTZUOLA (Aitz Garbi), AZKOITIA (Etxe-Aitz eta Atraskua), AZPEITIA (Urtzi), LAZKAO (Biziola), ELGOIBAR (Jai Alai eta Lanbroa), ITZIAR (Burugorri), SORALUZE (Arrano eta Pil Pilean), ZESTOA (Uztapide), ZIZURKIL (Plaza Etxeberri, Iriarte eta Egarri).
Nahi izanez gero gma@ni.eus korreoan eskatu daitezke sarrerak, betiere urriaren 15a baino lehen ».
2023-10-09
Antolatzaileekin harremanetan jartzeko telefonoa: Ainhoa Gil (679387345).
Agur eta eskerrik asko.
