Udan zehar gero eta gehiago entzun dugu, #GuggenheimUrdaibaiStop! Orain herritarren bideotxo andana biltzen ari dira (zeuk ere bidali dezakezu zeurea hona: guggenheimurdaibaistop@gmail.com”), aldarrikapen bateratu honi gorputz emoteko.
Urriaren 28an Gernikan agerraldi argia izango dugu, milaka lagun bertara batu, turuta, kazola, txalaparta, txistu, ezetz esateko, gero eta ozenago eta argiago. Ez eta pentsatu ere!
Nahikoa dugula jada, aspaldiko tabarra honegaz. Ganora bariko proiektua dala. Kaltegarria. Zentzunbakoa. Ustela. Zentzunik ez du inoiz izan eta oihartzunik ere ez dio inoiz egin herriak. Berez jausiko zen txepelkeria bat gehiago, uste genuen, hain da tokiz kanpokoa, hain ergela. (Egia esan, susmatzeko ematen du, benetako kakatza potoloagoetan dabiltzanez, segurutik, dirutza mardulagoak ebazten dituzten benetako “bikokak” zuhurrago eta izkutuago darabiltzanez, hau jendea despistatzeko eta okupatuta izateko trikimailu hutsa dugula, benetako proiektua baino). Hain agerikoa, herritarren kalteko eta lau laguntxurentzako txantxullo bat gehiago dugula, “turismoa bizibide, ekonomia, e.a.” pelikula osoaren moduan! Aspaldi dakite Andalusian, aspaldi Ipar Euskal Herrian, aspaldi dakigu Mundakan (2015-2018 artean han jarri ziguten Mundaka Festival zelakoa, turismoa, ekonomia, aurrerabidea, blablabla. “Danona Donea!” erantzun genuen behin eta berriz, alde egin zuten arte).
Propaganda makineria osoa jo eta ke, gure buruetan ideia itsusi ezinago hori, laster politetsiko genukeen arte
Sukarrietako aspaldiko umeentzako ikastokiko eraikin ederrean egingo zutela Guggenheim hori, duela hogei urte inguru hasi ziren. Eta porrot egin, inoiz ez zuten halakorik lortu, jakina, astakeria handiagorik! Eta azken bost urteotan, Mundakako Unai Rementeria Bizkaiko Foru Aldundiko Diputatu Nagusi ohiaren eskutik, Gernika eta Muruetan egingo dutela hasi dira mehatxatzen, bi herrion arteko ibilbide “ekologiko” magiko zoragarri bat izango duela (egunero milaka lagun han atzera eta aurrera elkarri traba egiten ibiltzeko ametsetan, antza). Putza! Betiko matraka bardina, politikari txotxongiloen ahotan, Deia, El Correo. EiTB eta abarreko bozgorailuez, “aholkularitza” enpresaren batek, bitartean, “azterlanak” egiteko dirutzak jaso. Betiko modus operandia.
Propaganda makineria osoa jo eta ke, gure buruetan ideia itsusi ezinago hori, laster politetsiko genukeen arte. Baina hain da zabarra dana, hain agerikoa, auzolotsa!
Erresistentziak beste etika bat eta beste politika bat proposatzen du, ez etorkizunerako, baizik eta jadanerako
Joseba Sarrionandia, “Lapur banden etika ala politika”
Hemen dugu Gernikako manifestaziorako idatzitako aldarrikapena. Zalantzatan balebil inor, irakurri eta ingurukoekin hasi berbaz. Ohiko osagaiak ditu pastelak:
- laguntxuentzako negozio baltzak
- legeditik kanpokoa
- politikari eta funtzionario ustelen makurkeriaz bideratua
- laguntxuen aholkularitza enpresek makilatuta, dirutza publikoa jasoz
- ingurumena gogor kaltetu
- euskera beheraka eta beheraka, turisten artean galduta, espainola gero eta “naturalagoa”
- bertokoen bizimodua zartatu, etxebizitza gero eta ezinezkoago, hurrengo belaunaldiarentzat
- lan baldintza prekarioak, izaera esklabo/menpekoa hedatu herritarren artean
- auto, autobus, tren eta droga trafikoa itzel gehitu, akabo bakea
- indarkeriaz inposatu nahia. Hor beti atzean, polizia danetarikoen mehatxua
- propaganda makineria itzela matraka bera errepikatzen, burua jateko eta herritar tentelagoak bihur gaitezen
Lapur banden etika ala politika-n Joseba Sarrionandiak proposatzen duen erresistentzian ari garela dirudi: “Erresistentziak beste etika bat eta beste politika bat proposatzen du, ez etorkizunerako, baizik eta jadanerako. Eta ez da desadostasun edo protesta bakarrik. Mundua zatirik zati aldatzen hastea da politika”.
Ba gu, egunero-egunero, han eta hemen, gero eta argiago, eta urriaren 28an Gernikara, milaka lagun. Probestu dezagun aspaldiko lagunekin elkartzeko eta lagun barriak egiteko.
Bihotzez, sormentsu eta bizi-indarrez alkartzen garenean, geldiezinak garela erakusteko.
#GuggenheimUrdaibaiStop!
Urriaren 28an, ongi etorri guztiok Gernikara. Ederra izango da!
ps. Informazio gehiago: eskerrak emanez urtetan itsas-lurraldearen alde egindako lan mardularengatik, Zain Dezagun Urdaibai!
