Guggenheim Urdaibai Stop Herri Mugimenduko Eider Gotxik txiokatutako testua moldatu, eta hark proposatu legez Eusko Jaurlaritzaren postontzian sartutako idatzia da honako hau. Animatu zeu be antzera egiten, entzun dezaten argi herritarren ahotsa.
Dagokionari:
Bizkaiko Foru Aldundiak, Eusko Jaurlaritza eta Solomon. R. Guggenheim Fundazioarekin batera, zergadunon 40 milioi euro gorde ditu Guggenheim Urdaibai makroproiektuaren parte diren museo bi Urdaibaiko Biosfera Erreserban eraikitzeko. Lege urraketa ugari tarteko, eta eskualdeko herritarren aurkako iritzi zabala egonda ere. Zentzunik eta ganorarik gabeko proiektua dugu, aspaldikoa. Susmagarria oso, herritarrei begira barik, interes ekonomiko murritz batzuei begirako proiektua dirudi, argi eta garbi.
Ondorioz, EAEko biosfera-erreserba bakarra suntsituko lukete. Baina, zorionez, azken hilabeteotan gora eta goraka dator ere bai herritarren erantzuna. Horren lekuko udan izan ditugun hainbeste bilera, hitzaldi eta agerraldi. Eta, aste bi barru, urriaren 28an Gernikan izatekoa dugun manifestazio zaratatsu handia. (Bide batez, gonbidapen ireki hau, ahalik eta gehien zabaldu dezakezue, zuek ere, segurutik ezagutzen dituzue aldarrikapen hauekin poztuko diren hainbeste lagun eta familiako kide).
Adierazten dut guztiz gaitzesten dudala nire eta inoren diruarekin espazio publiko zeharo zaurgarri eta guztiz babestu honetan inolako ekimen pribaturik ezartzerik.
Busturialdean eta mundu osoan badira finantzaketa-behar handiagoa duten hainbat proiektu publiko; tartean, gure eskualdearen etorkizuna bermatzeko ezinbestekoak diren hainbat egitasmo ekonomikoki eta sozialki bideragarri eta ingurumenaren aldetik jasangarri, bazterrean geratuko direnak.
Beste alde batetik, horrelako proiektu handietan ezkutuka murgildu ordez, askoz lehenago eta premiazkoagoa da herritarren arteko elkarguneak eratzea, inguruko eta munduko bizimodua hobetzeko egitekoak eta ez-egitekoak adimen kolektiboaren indarraz erabaki ditzagun, epe luzerako erabakirik onenak hartuko ditugula bermatzeko modu bakarra da hori eta.
Bizkaiko Foru Aldundiko Ekonomia Sustatzeko Saileko aspaldiko antolaketa teknikari gisa, eta Gune Irekiaren Lagunak taldeko aitzindarietakoa izanik, prest nauzue honetan guztian laguntzeko.
Bitartean, argi eta garbi eskatzen dut proiektu honetarako diru-laguntza berehala kentzeko eta Urdaibaiko Biosfera Erreserbari kalterik txikiena eragin diezaioketen ekintza oro bertan behera uzteko.
Adeitasunez,
Mundakan, 2023ko urriaren 13an
Diruaren aldarean sakrifikatzen dute Bizitza hagintariek eta artalde zintzoak amen.