Garikota – Silene Vulgaris eta Silene Latifolia
Ezagunak dira garikotaren loreak, zorrotxo baten forma hartzen dutelako eta jolas moduan esku ahurrean (edo beste nonbait) leherraraziz egiten duen hotsarengatik.
Kimu gazteak zein hostoak gordinik jaten dira entsaladan; Vulgaris delakoak gozo punttua du, Latifoliak ez. Sukaldatuak ere jan daitezke barazki moduan: zopan, saltsatan, tortillan, kroketetan eta abar.
Behar garaietan sustraiak ere jan izan dira. Mallorkan ozpinetan gordetzen omen dituzte.
Liseriketa errazeko elikagaia da: zuntza, A, B, C eta E bitaminak ditu, baita potasioa eta fosforoa ere. Flabonoideak, Omega 3 eta polifenolak ere bai.
Saponinak ditu: hauek, toxikoak izan arren, gorputzak ez ditu ondo irensten; beraz, kalterik eragin gabe libratzen ditugu. Hala ere, egosita suntsitu egiten dira. Saponinak landare askotan aurkitzen dira, haietako batzuk ohiko elikagaiak: babarrun mota batzuk, espinaka, tomatea… Ez da gomendatzen saponinak dituzten elikagaiak neurri handitan jatea.
Garikotak ondo jasan ditzake metal astunak; horregatik garrantzitsua da leku kutsatuetan ez biltzea, eta batez ere lurrak eta urak EZ KUTSATZEA, aipatutakoagatik eta beste guztiongatik.
