Gizakiak mundua konkistatu du
Gizakia oso aurreratua da, mundua konkistatu du eta beste gizaki batzuk menderatzen ditu bi gauza pentsarazteko: zientzia eta aurrerapena fetitxeak dira. Animaliak akabatzen ditu eta lurra espoliatu, bere buruarekin asmatu du eserita egonda lan egitea. Beti aurrerantz ibiltzea alboetan zer duen ikusi gabe; gizakia handia da, gizakia oso handia da, gizakia handia bezain tontoa da. Bere zientzia eta garapena dira bere hondamendia eta porrota; konkistatu eta menderatu bai, baina inoiz ez du ezer ulertu.
nahiago dut punk zarata, koldarraren isiltasuna baino
Hori da La Polla Recordsen Progreso y ciencia 1987ko kantaren letra. Erreferentzia asko egiten diet punk abestiei, eta batez ere La Polla Recordsen askori. Batzuek uste dute punk talde bat aipatzea kategoria baxukoa dela. Gehienok pentsatuko duzue punkak pertsona landugabeak garela, gordinak, sentimendurik gabeak, drogazale konbentzituak, zaborra, beste gauza askoren artean. Eta ni harro nago punk sentitzeaz. Bai, inolako konplexurik gabe diot punka naizela; izan ere, punk filosofia ez da desinformaziorako hedabideek sinetsarazi dizuetena, ez da historiako une zehatz batean belaunaldi batzuk heroinaren eta beste droga batzuen atzaparretan, marjinalitatean, delinkuentzian, azken baliabide gisa indarkerian harrapatu zituena… Hori istorioaren zati bat baino ez da, jende baliotsu asko, eta ez punkak bakarrik, bide bazterrean utzi zuen zati mingarri bat. Punk musika zaratatsutzat jotzen da; bueno, zenbat buru hainbat aburu. Gainera, nahiago dut zarata koldarraren isiltasuna baino. Nik punk musika entzuten dut, eta kantautoreak euskaraz, batzuk gazteleraz ere bai, baita musika klasikoa eta opera ere, eta beste musika mota batzuk, musika-generoak ez baitaude elkarren aurka. Baina punk musikak mezu zuzena, argia, mingotsa, desatsegina izaten du askotan, ez delako anbiguotasunez ibiltzen eta gauzak argi esaten dituelako, bere mezuari buruzko zalantzarik utzi nahi ez duelako. Kasu honetan nik ez dut Punk Rocka egiten, kasu honetan Punk Narratiba egiten dut, zuzena, argia, mingotsa, batzuetan desatsegina, anbiguotasunik gabea.
askori ez zaio gustatzen ustel eta heriotza kiratsa darion gezur santu eta erreal batean bizi dela esatea
Jatorrizko punk taldeen letra honek eta beste hainbestek, gaurkotasunik galtzen ez duten letra horiek, gaur egun askok oraindik ere onartzen ez duten errealitatea esaten dute. Askok ez dute onartzen ez zaielako egia gustatzen, eta horregatik ez zaie punka gustatzen, ez zaielako gustatzen ustel eta heriotza kiratsa darion gezur santu eta erreal batean bizi direla esatea.
Eta amaitzeko, La Polla Recordsen beste letra handi bat, 1984koa, oso egokia hurrengo hauteskunde hauetarako, El Alcalde:
Motel, izan ez duan bizitza eskaintzen diagu, dena eskaintzen diagu gure alderdia bozkatzen baduk; dena, hi heu izatea izan ezik, hori inoiz ez.
Bozkatu hemen! Kontrolatu egingo haugu! Bozkatu han! Zikiratuko haugu! Hire buru politean sartuko gaituk, eta, ukitu batzuekin, gutarra izango haiz!
Egin dohaintza bat: entregazak hire askatasuna; ez galdetu zergatik, nik ere ez baitzekiat. Egin dohaintza bat, behar haugu, hire burua nahi diagu, horrelakoak gaituk!
Hitzematen dizuet nahi duzuena, hitzematen dizuet hau eta bestea, hemengoa, horkoa eta haraindikoa, herriak behar nauelako. Behar nauzue, behar duzuen pertsona naiz. Bozka nazazue, bozka nazazue, bozka nazazue!
