Euskal Herrian frantsesez eta gazteleraz bizi nahi dutenak pribilegiatuak dira

Hona hemen EHEko margolariek zabaldu agiria:

Geldi erdaldunak pribilegiatzea !
Euskaraz bizi nahi dugu !

Euskararen Erakunde Publikoaren aitzinkontua 2017tik izoztua da. Euskalgintzak EEPren aitzinkontua bikoiztea galdegin du azken urteetan. EEPk, aitzinkontu berria %65 emendatzea aurreikusi du, baina Departamenduko agintariak Parisen presio egiten aritu dira halako emendatzerik ez izateko eta lortu dute, EEPren aitzinkontua %10 baizik ez dela igoko ekainean jakin baigenuen, hots, 2017tik izan den inflazioaren azpitik.

Bestalde, Estatu frantseseko agintariek, Euskal Kultur Erakundeari diru laguntzak %15 murriztuko dizkiotela irail honetan jakin dugu, diru laguntza hauek 2005etik honat ez dutelarik emendatzerik izan. Murrizketa horrek erakundea bera arriskuan ezartzen du.

Frantses Estatuko agintariak euskararekiko beti bezala itxurakerian ari direla eta euskaldunak bigarren mailako herritar gisa tratatzen gaituztela erakusten digu guzi horrek. Hain zuzen, Euskal Herrian frantsesez eta gazteleraz bizi nahi dutenak pribilegiatuak dira, hizkuntza horietan bizi daitezkeelako, euskaldunak Euskal Herrian ezin gaitezkeelarik euskaraz bizi !

“Euskaraz bizi nahi dugu” Departamenduaren egoitzan margotuz, egoera hau salatzen dugu eta bi Estatuetako agintariei erdaldunak pribilegiatzea gelditzea eskatzen diegu.

Euskararen alde, Euskal Herriaren independentziaren alde eta justizia gauzatuko duen gizarte baten alde dena eman dutenak omentzeko, ekintza hau Gudarien Egunean egiten dugu.

Ekintza honen bidez ere, palestinarrek pairatzen duten genozidioa salatzen dugu.

Bukatzeko, abenduaren 6an Euskal Herrian Euskaraz mugimenduak Durangon eginen duen manifestaldi nazionalean esku hartzera euskaltzale independentistak gomitatzen ditugu.

karrikarte
EHEko margolariak
2025/09/27

Lauak etxean gira jada. Epaiketa ezarri digute otsailaren 5erako Baionan. Komisaldegian 48 orduak luze izan dira, ziegak zikinak, pixa usainarekin eta koltxoirik ez denentzat. Ziega ezberdinetan ezarri gintuzten, baina elgar komunikatzen ahal ginuen, eta larunbatean, nola ez, Eusko Gudariak kantatu ginuen elgarrekin bakoitza bere ziegatik, irrintzina eta guzti ! Larunbatean, justu-justu polizia heldu baino lehen lortu ginuen margoketa bukatzea: Euskaraz bizi nahi dugu ! Kolorez ! Palestinarekin elkartasunean ! Eta gudarien omenez !

Gora bihotzak eta aurrera bolie !!

Hemen agiria deskargagarri:

abenduaren 6an Euskal Herrian Euskaraz mugimenduak Durangon eginen duen manifestaldi nazionalean esku hartzera euskaltzale independentistak gomitatzen ditugu

Karrikarte

EHEko margolariak