Pasa den apirilaren 25ean Bilboko La Bolsa jauregian Iñaki Sagredo historialariak azaldu zigun nola Iruñeko erreinuaren hasieran, Nafarroaren aurrekaria izan zen erreinuan, euskal eremu osoa barne hartzeaz gain, mugak Asturiaseraino heltzen ziren, Gaztelaren zati handi bat ere hartuz erreinu haren mendebaldean.
Barne zatiketa baten ondorioz, Gaztelako erreinuak, itsasorako irteeraren bila, Bizkaia iraungi zuen 1200 urtean zehar. Beraz, Bizkaiaren historia laburra izan zen izan dugun euskal estatu bakarrean, nahiz eta Durangaldeak urte batzuk gehiagoz iraun zuen.
Urte haietan, Araban egin zuen bezala, Nafarroak gaztelu lerro sistema bat eraiki zuen komertzio bide nagusiak babesteko. Merindadeetatik Bilborako bidean, Balmasedan bat; Altubetik Bilborako bidean, Untzeta gaztelua; eta, Urkiolako bidea zaintzeko, Astxikiko gaztelua. Horiek izango ziren gaztelu nagusiak, nahiz eta txikiagoak ere agertu Ereño mendian, Gaztelugatxen edo Bermeon.
Maiatzaren 23an, osteguna, Aitzol Altunak Bizkaia eta Bilbo Nafarroako erresuman hitzaldia emango du Bilboko La Bolsan, eta maiatzaren 25ean, larunbata, Untzeta gaztelura igoera egingo dute
Gaztelu horien arrastoetan, harri eta harresi zati batzuk besterik ez dira gelditzen, eta batzuk oraintsu suntsituak izan dira, Untzeta gazteluan esaterako, telekomunikabide antenentzako eraikin baten eraginez. Argi dago, urteetan, utzikeriagatik historia zati hau ezkutuan laga dela, bere hitzaldian Sagredok aipatu zuenez. Adibidez, Bilbotik gertu dagoen Malmasinen, industutakoak bezalako beste nafar gaztelu baten agerpenak kezka eragin zien Bizkaiko indusketetako arduradunei. Oraindik ere gune hori beste indusketa batzuen zain dago, segur aski udazkenean jarraituko dutenak.
Iñaki Sagredorekin egindako solasaldian, Orozkoko lagunek abisatu ziguten maiatzaren 25ean, larunbata, Untzeta gaztelura igoera egingo dutela, gure historia berreskuratzeko. Abadiñon ere Astxikiko gazteluaren 3D berreraikitze birtuala prestatu dute Sagredoren laguntzarekin. Bermeokoa ere hor dago, eta, egia esan, aretoa bete genuenok pozik geratu ginen eta gehiago jakiteko gogoz ere bai. Horretarako, maiatzaren 23an Aitzol Altunak gai honetan sakonduko du, Bizkaia eta Bilbo Nafarroako erresuman izenburua duen hizketaldiarekin.
Mila esker Angel, informazio hau zabaltzeagatik.